Read wanga 1 TIMOTSEYO 3 Bible Online

1 TIMOTSEYO 3 - wanga bible

1 TIMOTSEYO 3

¹Amakhuwa kano nakobwatieli mbu; omundu niyakhekoomba omulimo kwobubishopu[2] yenyanga omulimo omulayi.

²Bishopu akhoyeele okhubula eshikha; abe owomukhasi mulala, alaba omumesi ta, habula abe omwitembelesi, oweshironyo owokhwinjisia abacheni, khandi okhuula abe ounyala okhwechesia;

³alaba omumesi kata owobusolo ta, habula omuholo khandi owomulembe, kata owalaheela amapesa tawe.

⁴Akhoyeele okhuruka abeinzuye obulayi, nakhola abaanabe okhumuhulila noluyali lwosi.

⁵Okhuba omundu nalanyala okhulinda abeinzu yiye ta, yakhanyala arie okhulinda abelikanisa elia Nyasaye?

⁶Abe omundu wayindila mubusuubili, kho mbu aleshe okhuba owokhwilola okhunji ne nakhukhalachilwa shinga Setani yakhalachilwa.

⁷Akhoyeele okhuba omundu owahebwa oluyali kata nende abandu abalasuubilanga mu Kristo ta, kho mbu aleshe okhufimbibwa omurwe nende okhukwa mumireko chia Setani.

⁸Abadikoni boosi khandi bakhoyile okhuba nebiima ebilayi khandi abolulimi lulala; shibakhoyele okhuba abamesi kata abalang'u bamapeesa tawe.

⁹Bakhoyele okhwikhoonyela amayililisio kabwe amalayi komukari okhutinya khubusuubili bwatoto obwabisulwa.

¹⁰Bakhoyele okhuchelwa mbelio, mana nibabira amachelo ako bakhalabane shinga abadikoni.

¹¹Abeshikhasi boosi khandi bakhoyile okhuba abebiima ebilayi, balaba abamoonyi, kata abamesi ta, habula babe abesiikwa mumakhuwa koosi.

¹²Omudikoni akhoyeele okhuba nomukhasi mulala,[3] khandi abe ounyala okhulinda abaanabe nende inzuye obulayi.

¹³Abadikoni bakhola emilimo chiabwe obulayi benyoolelanga ifuma indayi khandi banyala okhuboola neitswoni khu busuubili bwabwe mu Yesu Kristo.

¹⁴Ekhuhandichilanga ibarwa yino nendi nobusuubili mbu nenditse okhukhucheniha ahambi hano.

¹⁵Nebutswa nimba neshinda okhwitsa ibarwa yino yilakhumanyia shinga ifwe abakristo khukhoyeele okhwilinda. Khuli abeinzu ya Nyasaye, eyili likanisa elia Nyasaye ouliho mwoyo. Likanisa elo nilio isiilo nende omusinji kwobusuubili obwa abakristo.

¹⁶Libulaho elishila lilolelo lieyidiini yefwe lino mbu; Kristo yabisulilwa mumubili, obulunjishibwe bwalolosibwa mu Roho wa Nyasaye, nalolwa nende abamalaika. Yayaalwa mumahanga, nasuubililwa nabandu mushialo shiosi, nayilwa mwikulu muluyali.