Read wanga 1 TIMOTSEYO 4 Bible Online

1 TIMOTSEYO 4 - wanga bible

1 TIMOTSEYO 4

¹Roho akhumanyinjia obulayi mbu mutsinyanga tsitsanga abandu bandi balilekha obusuubili; balihulila abaroho bobubeeyi nibalonda amechesio kamadimoni.

²Amechesio shinga kano katswanibungwa nende abekaati abo aba obuyililisi bwabwe bwomukari bwafwa shinga obwarerwakhwo eshimanyilo[4] shieshibia shiyile pia.

³Abandu bano bechesinjia mbu, nobubi okhuteshia nende okhulia ebiokhulia bindi. Nebutswa Nyasaye yalonga ebiokhulia ebio mbu, abo abasuubila nende abamanya obwatoto babikhoonyela nibakhamala okhupila Nyasaye orio.

⁴Buli shindu eshia Nyasaye yalonga neshilayi; ne shibulaho eshikhoyeele okhulobwa nebutswa biosi bikhoyeele okhulibwa namasaayo kokhupa orio,

⁵shichila likhuwa lia Nyasaye nende amasaayo ako, bikholanga ebiokhulia ebio okhufuchililwa nende Nyasaye.

⁶Niwakhechesia abakristo bashio amechesio kano olaba omukhalabani omulayi wa Yesu Kristo, olaba niwilisinjia eshiokhulia shieshiroho eshiamakhuwa aka obusuubili nende amechesio katoto aka olondanga.

⁷Nebutswa wihanye okhurula khutsingano tsiabutswa etsilakhoyeele ta, winasie okhweka amakhuwa amalayi kobulamu obwa eshikristo.

⁸Ebikhole biomubili ebielwanyi bikhukhonyanga okhuba omulamu, kho nebiobukhonyi; nebutswa ebikhole biomukari bieshiroho nebiobukhonyi okhushila, shichila birelanga inganga khulwa obulamu obwa bulano nende obwitsanga.

⁹Amakhuwa kano nakobwatieli, akokhufuchililwa elala nende okhusuubilwa.

¹⁰Khulwananga nikhukhalabana namaani, shichila khwara obunaayi bwefwe mu Nyasaye ouliho mwoyo, omuhonia waboosi nokhushila muno wabenabo abasuubilanga.

¹¹Obahelesie amebaalo namechesio kano.

¹²Olafuchilila omundu okhukhulechelesia shichila mbu oli omubukha tawe, nebutswa obe eshilolelo khubasuubili mububooli, mumwima, mubuheeli, mubusuubili nende mubweleleshe.

¹³Rakhwo omwoyo okhusooma Amahandiko ebulafu, nokhuyaala nende okhwechesia okhuula olwa enzitsa.

¹⁴Buli lwosi wikhonyelenje eshihaanwa eshia Roho Omutakatifu yakhuhelesia olwa abalakusi barakula ne abakofu nibakhurakhwo amakhono.

¹⁵Okholenje amakhuwa kano khandi wihaanile elala khuko, kho mbu abandu boosi balole shinga lwoli nende okhuula mubulamubwo obwa eshikristo.

¹⁶Wilinde omwene khandi olinde obwechesibwo. Olumilile okhukhola amakhuwa kano shichila nokhola orio, Nyasaye alakhuhonia iwe omwene nende abo abakhuhulilanga.