Read wanga 1 TIMOTSEYO 5 Bible Online

1 TIMOTSEYO 5 - wanga bible

1 TIMOTSEYO 5

¹Mulakondesheelanga omundu omukofu ta, habula mumuhotselesinjie shinga senywe. Mukholelenje abasiani ababukha shinga abasiani benywe,

²abakhasi abashiele shinga bamama benywe ne abakhasi ababukha shinga abakhaana benywe, mubweleleshe bwosi.

³Muhelesinjie abakhasi abalekhwa abalalikhwo nomundu wubakhoonya ta oluyali.

⁴Ne omukhasi omulekhwa naba nali nende abaanabe, noho kata abetsukhulube, bakhoyile okhuranjilila okhweka amakhuwa keidiini yabwe akabakhoyeele okhukholela abeinzu yabwe ne munjila yino balarunjilamwo abebusi babwe nende abakuuka babwe akababakhusilia, shichila akenako niko akachamisinjia Nyasaye.

⁵Omukhasi omulekhwa oulalikhwo nomundu wokhumukhoonya ta aretsanga obunaayibwe mu Nyasaye, ne alumililanga mukhusaaya nende okhusaba Nyasaye obukhoonyi eshilo neshiteere.

⁶Nebutswa, omukhasi omulekhwa owihaana khubwilaasi kata namenyanga, yamala khale okhufwa.

⁷Obahelesie amebaalo kano, kho mbu omundu yesi aleshe okhubanyoola neshikha.

⁸Ne omundu yesi oulalinda abekho bebe, okhushila muno abeinzu yiye omwene, ye aleshile obusuubili, kho nomubi okhushilakhwo omundu wulasuubila ta.

⁹Olameeta omukhasi omulekhwa oushili okhusia emiyika amakhumi kasasaba khusabu yabakhasi abalekhwa mukanisa tawe. Okhumeeta khwako okhuula abe niyali niyatekha khumusaatsa mulala.

¹⁰Abe omukhasi weyifuma yindayi khulwe ebikhole biakholanga ebilayi, nibio bino; owakhusia abaanabe obulayi, niyenjisinjia abacheni, niyetutuyinjia nakhalabanila Abakristo, oukhonyanga abali muminyakhano, khandi oulumililanga okhukhola amalayi.

¹¹Habula mulameete abakhasi bashili abakhaana khusabu yabakhasi abalekhwa tawe, shichila lwobwikombi bwabwe bwomubili bumeetekha balenya okhutekha khandi, ne munjila yino balashukhana okhurula khu Kristo.

¹²Elienelino lilachila banyoole eshinyasio okhurula khu Nyasaye khulwa okhufunaka eshitsubo shiabali nibetsuba.

¹³Khandi bamalanga ebise nibachendachendanga munzu yino okhutsia muyindi; ne obubi bushila yako, bamonyanga abandu nibeyinjisia mumakhuwa kabandu bandi akabalakhoyeele okhwiyinjisiamwo ta.

¹⁴Khulwako ndakhekoomba mbu abakhasi abalekhwa abeshikhaana bateshibwe, bebule abaana, mana balinde tsinzu tsiabwe, kho baleshe okhuhaana obwiyangu khubasuku befwe okhukhukokonyela.

¹⁵Okhuba abakhasi abalekhwa bandi baleshile okhulonda amakhuwa aka Kristo, ne balondanga aka Setani.

¹⁶Omusuubili yesi ouba nali nende abekho abali abakhasi abalekhwa, akhoyeele okhubalinda, ne aleshe okhura obusiro obwo khu kanisa, kho mbu likanisa linyalilwe okhulinda abakhasi abalekhwa abalalikhwo nomundu wokhubakhoonya tawe.

¹⁷Abakofu belikanisa abakholanga emilimo chiabwe obulayi bakhoyile okhurungwa akhandi khabili, okhushila muno abayaalanga nibechesia nomwoyo kwosi.

¹⁸Okhuba Amahandiko kaboolanga kari, “Olabohanga iheyi omunwa lwoba nochiokhoonyelanga okhuhula imele tawe.” Khandi mbu, “Omukholi akhoyeele okhuhebwa omurungokwe.”

¹⁹Olarechelesia obwinjililwi bwosi obwomukofu welikanisa nibularererwe nende abaloli babili noho abanji okhushilaho ta.

²⁰Ohalabile abandu boosi abonoona imbeli wabasanji kho mbu abandi boosi baritsenje okhwonoona.

²¹Ekhulaka imbeli wa Nyasaye nende imbeli wa Kristo Yesu nende imbeli wabamalaika abatakatifu mbu, olonde amebaalo kano nolachamisiakhwo omundu yesi noho kata okhukhola emiawukho mumakhuwa kokhola koosi tawe.

²²Olatetekhana okhura amakhono khubandu khulwa okhubahula okhukhalabanila Nyasaye tawe. Olasanjilana mubwonooni biabandu bandi tawe; obe omweleleshe.

²³Shiolanywetsanga amaatsi konyene ta, nebutswa onywetsenjekhwo idivai indiiti khulwa okhusilikha indayo nende khulwa obuteshelebwo.

²⁴Ebionoono biabandu bandi bilolekhanga habulafu, ne obwonooni bwabwe ebio biranjililanga okhubayasia, nebutswa obwonooni biabandu bandi bilolekhanga olunyuma.

²⁵Munjila ndala eyo ebikhole ebilayi bilolekhanga ebulafu, ne kata ebilali habulafu ta shibinyala okhufiswa tawe.