Read wanga 1 TIMOTSEYO 6 Bible Online

1 TIMOTSEYO 6 - wanga bible

1 TIMOTSEYO 6

¹Abakhalabani boosi okhuula bahelesie abami babwe oluyali lwosi, kho mbu abandu baleshe okhunyeka eliira elia Nyasaye nende amechesio kefwe.

²Abakhalabani bakhalabanilanga abami Abakristo balachaya abami abo tawe, shichila boosi nabakristo bashiabwe. Habula bakhoyile okhubakhalabanila obulayi okhushilakhwo shichila abo abanyoolanga inganga yobukhalabani bwabwe nabasuubili babaheela. Okhuula wechesie nende okhuyaala amakhuwa kano.

³Omundu yesi owechesia amechesio kandi akahukhane, ne nalafuchilisania nende amechesio katoto aka Omwami wefwe Yesu Kristo nende amechesio kediini yefwe eya eshikristo tawe

⁴noweisunga inyinji, khandi shiamanyilekhwo eshindu shiosi tawe. Ali nobwikombi obumayanu okhuyingana nende okhusolana khumakhuwa amakhaya, ne kano karelanga imbalikha, isila, amanyeko, okhupaara okhubi khubandi,

⁵nende obusoolo obubula eshiakamo okhurula khubandu abamakani kabwe kamala okhubiya mana babula obwatieli, abandu bano bakalanga mbu idiini yilabaha obuyinda.

⁶Toto idiini nobuyinda obukhongo khu oyo ouchamisibwa nende ebiali ninabio.

⁷Shikhwetsa nende eshindu ta, khandi shikhulinyokha nende eshindu ta.

⁸Kho nikhuli nende ebiokhulia nende ebiokhufwala bikhuhelile.

⁹Nebutswa abandu abekoomba okhuyindahala bakwitsanga mumateemo nende mumireko chio bwikombi bwobusilu bwobusalili obunyala okhubasishia nende okhubatibia.

¹⁰Okhuheela amapesa muno nishio eshisina shiobwonooni bwosi. Abandu balala bakekoomba okhushila mbu barulanga mubusuubili nibererela obutsuni obunji.

¹¹Nebutswa iwe, omundu wa Nyasaye, wiyahule khubindu bino biosi. Teema akonyalilwa okhuchamisia Nyasaye, okhuba nobunyasaye, obusuubili, obuheeli, obwisumilisi nende obuholo.

¹²Olwane lihe lilayi liobusuubili, mana winyoolele obulamu obwobumeli bwa Nyasaye yakhulanjila olwa weyama obutinyu imbeli wabaloli abanji.

¹³Ekhureeba imbeli wa Nyasaye ouhaananga obulamu khubindu biosi, nende imbeli wa Kristo Yesu oweyama obutinyu obusuubilibwe imbeli wa Pontio Pilato;

¹⁴okhutiila amalako okhuula Inyanga eyo Omwami Yesu Kristo alikalukha.

¹⁵Okhukalukhakhwe khwakhaloleshe khubise ebikhoyele, ne niye Nyasaye owoluyali, Omuruchi wabaruchi khandi Omwami wabami.

¹⁶Ye yenyene niye oulafwitsanga ta; oumenyanga mubung'inang'inu bwomundu yesi alanyala okhuulakhwo ta. Omundu abulaho owamulola kata ounyala okhumulola. Oluyali nende obunyali bwobumeli bube khuye. Amina.

¹⁷Okaye abo abali abayinda mumiandu chiomushialo mbu, baleshe okhwichinjimisia, kata okhura obunaayi bwabwe mubuyinda obulasuubililwa, nebutswa bare obunaayi bwabwe khu Nyasaye, oukhuhelesinjia obuyinda mbu khuchamisibwe.

¹⁸Balache okhukhola amalayi, mbu babe abayinda mubikhole ebilayi, babetsenje abahaani nende abarecheshe okhusanjilana nabandi.

¹⁹Munjila yino balebishila abeene libikho elilibabela omusinji omulayi munyanga tsitsanga.

²⁰Iwe Timotseyo olinde obulayi ako akawahebwa okhulinda. Wiyahule khubusanji nende obuyingani bwabandu bandi mukhukorwa balaanganga mbu, “Obuchesi.”

²¹Okhuba baliho abafuchilila obuchesi obwo ne khulwako bakosia injila yobusuubili. Obukoosia bwa Nyasaye bube ninenywe mwesi.