Read wanga 2 TIMOTSEYO 1 Bible Online

2 TIMOTSEYO 1 - wanga bible

2 TIMOTSEYO 1

¹Eyirula khwisie Paulo omurume wa Kristo Yesu, khulwa okhwenya khwa Nyasaye owaruma okhuyaala obulamu obwa khwasuubisibwa khulwokhuba abalondi ba Kristo Yesu.

²Yule khumwana wanje omuheelwa Timotseyo. Nyasaye ouli Sefwe nende Kristo Yesu Omwami wefwe bakhuhelesie obukoosia, tsimbabasi, nende omulembe.

³Ekhupila Nyasaye orio owekhalabanilanga namanyililisia amweleleshe shinga olwa abakuuka banje bakhola buli lwosi. Emukhupilanga orio olwa ekhwitsulilanga mumasaayo kanje eshilo neshiteere.

⁴Nditsulilanga okhulila khukhwo ninzenya okhukhulola okhushila mbu, nditsule nobusaangaali.

⁵Nditsulilanga obusuubili bwatoto obwoli ninabwo shinga obwali bwa nyakukhuluwo Loisi nende obwa mama wuwo Yunisi. Endi nobusuubili mbu oli ninabwo wesi.

⁶Ne niko akachila nekhwitsusia mbu, otsilile okhulinda eshihaanwa eshio eshia Nyasaye yakhuhelesia olwa ndakhurakhwo amakhono.

⁷Okhuba Roho wa Nyasaye yakhuhelesia shiakhukholanga okhuba abari ta, habula Rohowe akhwitsusinjiamwo obunyali, obuheeli, khandi akhunyalilanga okhwiruka abeene.

⁸Kho olafimbwa omurwe khulwa okhurusia obuloli khu Omwami tawe. Kata olafimbwa omurwe khulwa isie, shichila mbu endi mumbohe khulwokhumukhalabanila Kristo. Habula orumishile obunyali oburulanga khu Nyasaye okhusanjilana mukhunyakhana khulwa Injiili.

⁹Nyasaye yakhuhonia mana nakhulanga okhuba abandube, shiyakhuhonia khulwa khubeela akakhwakhola ta, habula khulwa okhwenyakhwe omwene nende obukoosia. Okhurula khale yakhuhelesia obukosiabwe okhubirira mu Kristo Yesu.

¹⁰Bulano khumanyibwe obukoosia obwa Nyasaye okhubirira mukhwitsa okhwa omuhonia wefwe, Kristo Yesu. Ne okhubirira mu Injiili khwamanya mbu Kristo yasasia obunyali bwolufu, mana nakhumanyia obulamu obulahwayo ta.

¹¹Nyasaye yanzahula isie shinga omurume nende omwechesia owa Injiili.

¹²Niko akachilanga ninyakhana bulano. Nebutswa eshitsulemwo obusuubili, okhubela emanyile owandisikanga, khandi emanyile obulayi bwene mbu alanyalilwa okhubikha obulayi aka yambelesia okhuula khuduukho eyo.

¹³Londa omufwano okwa amechesio amalayi aka ndakhuhelesia, mana obukule obusuubili nende obuheeli bwa Kristo Yesu.

¹⁴Linda obulayi obwatoto bwa wahebwa nende Roho Omutakatifu oumenyanga mwifwe.

¹⁵Omanyile mbu Abakristo boosi mu Asia baandeshele, Figelo nende Heremogene boosi nibalimwo.

¹⁶Omwami abeele tsimbabasi abeinzu ya Onesiforo okhubela yanzatsahasia akhanji; shiyafimbwakhwo omurwe mbu endi omubohe tawe;

¹⁷habula olwa yola Roma yachaaka okhukaba okhuula olwa yanyoola.

¹⁸Esaaya mbu Omwami abeele Onesiforo tsimbabasi khunyanga yeyindukho eyo. Khandi iwe omanyile obulayi bwene shinga olwa yakhalabanila olwa ndali Efeso.