Read wanga 2 TIMOTSEYO 2 Bible Online

2 TIMOTSEYO 2 - wanga bible

2 TIMOTSEYO 2

¹Ne iwe, omusiani wanje, otinye mubukoosia obwa khuli ninabwo mu Kristo Yesu.

²Bukula amechesio aka wahulila niyaala imbeli wabaloli abanji, nawe okahaane khubandu abasuubilwa abanyala nabo okhwechesia abandu bandi.

³Wirecheshe wesi okhunyakhana, shinga omusikari omusuubilwa wa Kristo Yesu.

⁴Omusikari ouli khumilimo akhabaanga okhuyanzisia ouli ikuluwe kho shiyeyinjisinjia mumakhuwa kandi kabandu beshialo tawe.

⁵Omwilushi outiebana shianyala okhuhebwa eshihaanwa shiobuhuli nalalondile amalako tawe.

⁶Omulimi oukhalabananga obutinyu akhoyeele okhuranjilila okhunyoola khubielichesa.

⁷Yililisia akemboolanga kano shichila Omwami alakhunyalila okhumanyilisia eshisina shiako koosi.

⁸Yitsulila Yesu Kristo owalamusibwa okhurula mukhufwa, owolwibulo lwa Daudi, shinga olwa ndayaala mu Injiili yanje.

⁹Okhubela eyaalanga Amakhuwa Amalayi, enyakhananga, kata ndabohwa neminyololo shinga omundu omubi. Nebutswa Likhuwa lia Nyasaye shiliabohwa tawe.

¹⁰Khulwako, ndifwilanga koosi okhubela abalobole ba Nyasaye, mbu nabo boosi bahonibwe khulwo khusuubila mu Kristo Yesu, nende okhunyoola obulamu obweinziayo.

¹¹Okhuboola khuno nokhwatoto mbu: “Nikhuba nikhwafwa ninaye, khandi khulimenya ninaye.

¹²Nikhuba nikhwefwila ninaye, khandi khwakharuche ninaye Nikhuba nikhumwikaana, naye khandi alikhwikaana

¹³Nikhuba nikhulali abasuubilwa, ye abetsanga omusuubilwa, shichila shanyala okhukalukhana omwene tawe.”

¹⁴Witsusie abandubo khu makhuwa kano, mana muliira lia Nyasaye shinga omuloli wuwo obakanie okhuyingananga khumakhuwa. Obuyingani buno shibukhoonyanga eshindu shiosi ta, habula bwonooninjia ababuhulilisinjia.

¹⁵Khola koosi aka onyala okhufuchililwa imbeli wa Nyasaye shinga omukhalabani wa Kristo, oulafimbwa omurwe khumilimochie ta, khandi weechesinjia habwene Injiili yatoto.

¹⁶Wiyahule khumakhuwa kabutswa akalali aka eshi Nyasaye, shichila kameetanga okhukosia abandu okhurula khu Nyasaye.

¹⁷Amebaalo shinga ako kali shinga likonzo eliboosinjia omubili. Himenayo nende Fileto bali mubenabo abechesinjia amebaalo ako.

¹⁸Balekha injila yobwatoto mana bakoyasinjia obusuubili obwa abakristo bandi khulwokhwechesia mbu okhulamukha khwabafu khwamala okhwikholekha.

¹⁹Nebutswa omuse kwa Nyasaye yasimikha nomutinyu. Khukwo kahandikwa mbu, “Omwami yamanya abali abebe” khandi mbu, “Buli mundu yesi ourumbula eliira elia Omwami yeyahule okhurula khubumayanu.”

²⁰Munzu ikhongo khuilimwo ebindu ebiaukhane, bino: bilala nibietsahaabu nebindi ebieifetsa, ebindi bietsimbao nebindi bielitoyi. Bilala khubio bikhonyelungwa khunyanga tsioluyali nebindi tsinyanga tsindi.

²¹Omundu yesi owisiiya omwene okhurula khumakhuwa amabi ako koosi yakhekhonyelwe mwichoomo elioluyali, okhubela yehaana, khandi ali nobukhonyi khu Mwamiwe, mana yerechekha khumulimo kwosi omulayi.

²²Wiyahule okhurula mubwikombi bwoluraka, ne olondelele obulunjishi, obusuubili, obuheeli nende omulembe halala nende abo abahabila Omwami nomwoyo omweleleshe.

²³Habula wihanye okhurula khubuyingani bwobusilu khandi obukhaya; omanyile mbu bureranga obusoolo.

²⁴Shinga omukhalabani owa Omwami olasolanakhwo ta. Okhuula obe neshisa khubandu boosi, omwechesia omulayi khandi owokhwisumilisia.

²⁵Obe omuholo lwoba nokaninjia abakhufukulanga. Haundi Nyasaye alabakalukhasia mana bamanye obwatoto.

²⁶Ne baba nobumanyilisi obulayi mana bahonokooshe mumireko chia Setani owali niyabahamba nachila nibakhaywa okhukhola aka Nyasaye yenya.