Read wanga 2 TIMOTSEYO 3 Bible Online

2 TIMOTSEYO 3 - wanga bible

2 TIMOTSEYO 3

¹Okhoyeele okhumanya mbu, munyanga tsiokhumalilikha amatinyu kalibaho.

²Abandu baliba abemani, abokhwiyenyela muno, abeisunga, abeinjinia, abaraasi, abalahulilanga abebusi babwe ta, abalakhupanga orio ta, khandi ababula obunyasaye.

³Abandu bano baliba ababula eshisa, tsimbabasi, abamonyani, abeinduli, khandi abalulu, abasila amalayi.

⁴Baliba abakhobi, abamayukuba, abolukungu, abaliheelanga emienya chieshialo okhushila Nyasaye.

⁵Balelolosia butswa elwanyi mbu nabeyidiini ne nibaloba obunyali bwatoto bwa Nyasaye. Wihanye okhurula khubandu shinga bano.

⁶Balala khubo benjilanga mutsinzu tsiabandu nibakatia abakhasi abateshele mubiima abetsulamwo obwonooni obunji khandi abemililungwa nende obwikombi lukano lukano.

⁷Abakhasi bano buli lwosi bekoombanga okhweka nebutswa shibanyalilungwa okhunyoola obwatoto tawe.

⁸Shinga olwa Yanesi nende Yambere bafukula Musa nindio abandu bano bafukulanga obwatoto. Abandu aba amapaaro kabwe kalali habwene tawe, khandi abonoonia obusuubili.

⁹Abandu bano amakhuwa kabwe shikalatsilila ta, shichila abandu boosi balalola obuyingwa bwabwe, shinga olwa kekholekha khu Yahesi nende Yambere.

¹⁰Nebutswa iwe wamala okhutiila amechesio kanje, emiima chianje, lichoomo lianje mubulamu, nende obusuubili bwanje. Walola shinga ndefwila mubuheeli nende obwisumilisi,

¹¹nobusandibwi nende obutsunwi bwanje. Omanyile koosi akekholekha khwisie mu Antiokia, Ikonio nende Lisitera! Obusandibwi bwamakana obwa ndefwila. Nebutswa Omwami yanunula okhurula mumasila ako koosi.

¹²Omundu yesi owenya okhumenya obulamu bweshi Nyasaye nali mubulala nende Kristo Yesu alasandibwa.

¹³Nebutswa abonooni abechinjimisi balemeeta okhwonoonekha okhuula mukhutiba nibakatia abandi khandi nibekaatia abeene.

¹⁴Iwe, otsililile okhuba omusuubilwa mukowechibwa nende akawasuubila. Omanyile abakhwechesia,

¹⁵khandi witsulile mbu okhurula mubwaanabwo wamanya Amahandiko Amatakatifu, akanyala okhukhuhelesia obuchesi obukhwimilila khu buhonia okhubirira mubusuubili mu Kristo Yesu.

¹⁶Amahandiko koosi Amatakatifu kakholungwa nende Nyasaye, ne nakobukhoonyi khukhwechesia akatoto, khukhukondeshela obuyiiri, okhukololosia amabi nende obwibaali khu bulamu obulunjishi,

¹⁷mbu kho omundu wukhalabanilanga Nyasaye abe omulamba khandi owirecheshe khu buli omulimo omulayi kwosi.