Read wanga TITO 1 Bible Online

TITO 1 - wanga bible

TITO 1

¹Eyirula khu Paulo, omukhalabani owa Nyasaye khandi omurume wa Yesu Kristo. Ndahulwa nerumwa okhukhoonya obusuubili bwabalobole aba Nyasaye nende okhubemilila mubwatoto bweidiini yefwe yechesinjia.

²Obwatieli obweidini yefwe yechesinjia buno bwisimikhanga khubunaayi obwobulamu bweinziayo. Nyasaye oulabeeyanga ta, yakhusuubisia obulamu buno okhurula khukhuchaaka khweshialo,

³mana mubise ebilobole yabufwimbulila mwikhuwalie. Ndahebwa okhuyaala Injiili yino, khulwa lilako elia Nyasaye Omuhonia wefwe.

⁴Ehandichilanga Tito, omwana wanje watoto mubusuubili bwakhusangangamwo fwesi. Nyasaye Sefwe nende Kristo Yesu Omuhonia wefwe bakhuhe obukoosia nende omulembe.

⁵Ndakhulekha Ekirete mbu okoloolosie amakhuwa kali nikashiamayo khandi wahule abakofu belikanisa okhurula mubuli litookho shinga olwa ndakhwibalila.

⁶Witsulile mbu omukofu welikanisa okhuula abe oulali neshikha shiosi ta. Okhuula abe nomukhasi mulala yenyene khandi abaanabe okhuula babe abasuubili, khandi okhuula babe neyifuma indayi abalali neshileka tawe.

⁷Okhubela mbu nomwimilisi we ikanisa ousinjililanga emilimo chia Nyasaye akhoyeele okhuba omundu oubula eshikha nomundu yesi. Alaba owokhwilola, kata oweliruma liabwangu ta, kata omumesi, kata owobusolo, kata omulaangu wamapesa tawe.

⁸Nebutswa akhoyile okhuba omundu ouchamanga okhwinjisia abacheni, khandi omundu owachama amakhuwa amalayi. Akhoyile okhuba omundu omwitembelesi, omulunjishi, owehaana khu Nyasaye, khandi owokhwiruka omwene.

⁹Omundu uno akhoyeele okhuhanda khwikhuwa lilayi eliwinjana nende amechesio aka idiini. Munjila yino alanyala okhutinyilisia bandi nende okhwechesia amechesio katoto khandi nende okhulolosia obubi bwabandu bayingananga nende amechesio aka obwatoto.

¹⁰Baliho abandi abanji abakhayi aba amalako, ababoolanga amakhuwa amakhaya butswa, ne nababeeyi okhushila muno abekalukhasia nibekhola abakristo okhurula mudini eya Eshiyahudi; nebutswa bechesinjia mbu omundu okhuula ashebwe kho abe Omukristo owatoto.

¹¹Abandu bano okhuula baholelesibwe shichila bechesinjia amakhuwa kabalakhoyele okhwechesia tawe. Ne khulwa okhwechesia bario bachilanga balala nibakanakania amechesio kobwatoto. Ne bechesinjia bario mbu banyoole omurungo.

¹²Mulala khubo owali omulakusi wabwe abeene yaboola mbu, “Abandu aba Ebukirete buli lwosi nababeeyi, netsisolo tsimayanu, nabatofu khandi nabalangu.”

¹³Obuloli buno nobwatoto. Khulweshio okhuula mubahalabile obutinyu kho babe nobusuubili bwahabwene,

¹⁴mushilenje shiokhuhanda khutsingano etsia Ebuyahudi noho okhulonda amalako akabandu abakhaya okhulonda obwatoto.

¹⁵Khubenabo abali abeleleshe, buli shindu neshieleleshe khubo; nebutswa khwabo abalali abeleleshe ta, khandi abalali abasuubili ta, shibulaho eshindu shiosi eshili eshieleleshe khubo shichila amapaaro kabwe nende obuchesi bwabwe, biamala okhwonoonibwa.

¹⁶Abandu bano baboolanga mbu bamanya Nyasaye, nebutswa bamwikananga mubikhole biabwe. Abandu bano nabaisila, abalahulilanga amalako aka Nyasaye ta khandi nabalakhoyele okhukhola eshindu shiosi eshilayi tawe.