Read wanga TITO 2 Bible Online

TITO 2 - wanga bible

TITO 2

¹Ne khwiwe Tito, okhuula wechesie amechesio akobulunjishi akakhoyele.

²Boolela abakofu mbu babetsenje abeleshesi, aboluyali, aberuka abeene, abobusuubili bwatoto nobuheeli nende abesumilisi.

³Munjila ndala eyo oboolele abashiele abakhulunduhalakhwo beliinde shinga abakhasi abatakatifu bakhoyile okhumenya. Balaba abachiishi ta, kata abamesi ta, habula bakhoyile okhwechesinjia akali amalayi,

⁴kho mbu bechesinjie abakhasi ababukha okhuheela abasaatsa babwe nende abaana babwe.

⁵Abakhasi ababukha okhuula babe abetembelesi, abeleleshe, abalumilifu mumilimo chiomungo, abeshisa, abahulilanga abasaatsa babwe, babe nobusuubili obwa eshikristo.

⁶Munjila ndala eyo wechesie abasiani ababukha mbu babe aberuka abeene.

⁷Mumakhuwa koosi iwe mwene obe eshilolelo shiemiima emilayi. Obe omusuubilwa khandi oweshilongole mumechesio koko.

⁸Wikhonyele amakhuwa kalunjishe akalafukulwa ta, kho abasukubo bafimbwe omurwe nibalanyoola libi liosi eliababoola khwifwe ta.

⁹Nabo abasumba bahulilenje abami babwe nibabachamisia mumakhuwa koosi. Balayingana ninabo tawe.

¹⁰Khandi baleba ebindu biabami biabwe tawe. Habula bakhoyile okhulolosia mbu nabalayi khandi abasuubilwa, kho mbu ebikhole biabwe biosi baireele ifuma indayi khumechesio aka Nyasaye nende Yesu Kristo Omuhonia wefwe.

¹¹Okhuba Nyasaye yakhumanyiye obukosiabwe khulwokhuhonia abandu boosi.

¹²Obukoosia obwo bukhwibalilanga okhulekha ebikhole ebibi biosi nende obwikombi obwa amakhuwa keshialo nokhumenya mushialo shino nimwiruka abeene, mubulunjishi nende okhuria Nyasaye.

¹³Khwitsuulemwo obunaayi, nikhulindililanga Inyanga yokhukalukha khwoluyali olwa Nyasaye wefwe omukhongo nende Omuhonia wefwe Yesu Kristo.

¹⁴Yesu Kristo yehaana omwene okhufwa khulwefwe, mbu akhununule okhurula mubumayanu bwosi nende okhukhukhola abandube omwene abeleleshe abali nobuha bwokhukhola amakhuwa amalayi.

¹⁵Wechesie amakhuwa kano khandi wikhonyele obunyali bwo bwosi okhutinyilisia nende okhuhalabila abahulila amakhuwa. Omundu yesi alakhulechelesia tawe.