Read wanga TITO 3 Bible Online

TITO 3 - wanga bible

TITO 3

¹Witsusinjie abandubo okhuba abahulili khu abami nende khuburuchi bwosi, nende okhubahulila, nokhwihaana okhukhola amalayi mutsinjila tsiosi.

²Baboolele mbu balaboolakhwo obubi khumundu yesi ta, habula bamenye mumulembe, mukhurecheresania nende buli lwosi okhuba abaholo khu buli mundu.

³Okhuba ifwe beene olundi khwalinji abasilu khandi abakhayi, khandi abashiamu. Khwalinji abasumba bobwikombi nende okhukhola akakhwenya lukano lukano. Khwamenyanga obulamu bwefwe mubwonooni nende eshikhalikhali; abandi bakhusila nefu nikhubasila.

⁴Nebutswa olwa tsimbabasi nende obuheeli obwa Nyasaye Omuhonia wefwe bwafimbulwa,

⁵yakhuhonia. Ne shikhwali khulwa ebikhole biobulunjishi ebia ifwe khwakhola ta, habula khulwetsimbabasitsie omwene. Yakhuhonia okhubirira mu Roho Omutakatifu oukhwosinjia, nakhunyalila okhwibulwa obuyia khandi okhuba nobulamu obuyia.

⁶Nyasaye yakhutsushilila butsushilila Roho mutakatifu okhubirira mu Yesu Kristo Omuhonia wefwe,

⁷Kho khulwa obukosiabwe khube abalunjishi imbeli wa Nyasaye, mana khulamilwe obulamu bweinziayo obwa khunaayanga.

⁸Oburume buno nobwatoto. Ndenyanga mbu otinyilisie nomwoyo kwosi amakhuwa kano, mbu abo abasuubilanga mu Nyasaye, babe neshinani khwikhoonyela ebise biabwe okhukhola akobulunjishi akali amalayi khandi akobukhoonyi khubandu boosi.

⁹Ne olasanjilanakhwo khumayingane kobusilu, noho kata amakhuwa ketsinzibulo, nobusoolo nobulwani khukamalako ta, okhubela kabula obukhoonyi khandi namakhaya.

¹⁰Ochetsiyie okhuula khabili omundu wurelanga obwahukhani mubandu. Ne nalakhuhulila ta omurulekhwo.

¹¹Omanye mbu omundu shinga omwenoyo nomushiamu, yonoonekha; khandi obwonoonibwe bumanyinjia mbu nomushiamu.

¹²Olwa eruma Aretema noho Tikiko khwiwe oteeme shinga lwonyala witse wundole Enikopolisi, shichila enzenya mbu emalileyo tsinyanga tsiomunyiri.

¹³Oteeme shinga lwonyala okhukhoonya Zena omukhulundu wamalako, nende Apolo okhuchaaka oluchendo lwabwe, mana olole mbu bali nende bulishindu eshiabenya khulwoluchendo olwo.

¹⁴Abandu befwe bakhoyile okhweka okhwikhoonyela ebise biabwe okhukhola amalayi, kho mbu banyalilwe okhuhaana obukhoonyi bwatoto khubandu ababwenya mana bamenye obulamu bukhoyeele.

¹⁵Abandu bendi ninabo boosi bakhushesiye. Shesie abetsa befwe mubusuubili. Obukoosia bwa Nyasaye bube ninenywe mwesi.