Read wanga ABAHEBURANIA 1 Bible Online

ABAHEBURANIA 1 - wanga bible

ABAHEBURANIA 1

¹Khale, Nyasaye yaboola nabakuuka befwe akhandi akhanji munjila tsinyinji okhubirira mubalakusi,

²nebutswa munyanga tsino etsiobumalilishi yaboolile ninefwe okhubirira mu Omwanawe. Ne Nyasaye yalonga likulu nende eshialo okhubirira muye, ne niye khandi owa Nyasaye yalobola okhulamilwa ebindu biosi mubumalilishi.

³Niye oukhulolesinjia obulafu obwoluyali olwa Nyasaye, khandi niye owabukula obukondo bwene obwa Nyasaye; alindanga eshialo nende obunyali obwelikhuwalie. Ne olwa yali namalile omulimo kwokhuleshelwa khwobwonooni ebiabandu, yekhala mwikulu khumukhono omusaatsa okwa Nyasaye, ouli Omukhongo Muno.

⁴Omwana owa Nyasaye yakholwa okhuba omukhulundu okhushila abamalaika, butswa shinga olwa eliira elia Nyasaye yamuha lili likhongo okhushila akabwe.

⁵Okhuba nomumalaika shiina khubamalaikabe owa Nyasaye yaboolelakhwo mbu; “Oli omwana wanje, leelo ekhwibule.” Noho kata okhuboolakhwo khumumalaika yesi mbu, “Ndalaba Samwana, nawe alaba Omwana wanje.”

⁶Nebutswa olwa Nyasaye yali ahambi okhuruma Omwanawe owambeli mushialo, yaboola mbu, “Abamalaika aba Nyasaye boosi okhuula bamwinamile.”

⁷Ne khukabamalaika, Nyasaye yaboola ari, “Nyasaye akholanga abamalaikabe okhuba emiyeka, nabo abakhalabanibe okhuba tsimemu etsiomulilo.”

⁸Nebutswa khu Omwanawe Nyasaye yaboola ari, “Iwe Nyasaye obwanibwo bulayindila ebisoni nebisoni! Ne orukanga abandubo mubulunjishi.

⁹Iwe waheela akahabwene ne nosila amashiamu. Niko akachila isie Nyasayewo ndamala okhukhulobola, khandi ndakhuhelesia oluyali lwokhwikhoya olushila olwa ndahelesia abashio.”

¹⁰Khandi yaboola mbu, “Iwe, Omwami, mukhuchaaka walonga eshialo, ne namakhonoko omwene noloonga likulu.

¹¹Ebio biakhahweho, nebutswa iwe olabetsangaho inziayo; biosi bilikofula shinga tsingubo.

¹²Olibifumba butswa shinga ikanzu, khandi bilakalulwa shinga tsingubo tsikhulu; nebutswa iwe shiolikalukhana kata nahatuutu tawe, Khandi obulamubwo shibulaba neshiakamo tawe.”

¹³Nyasaye shiyaboolelakhwo kata mulala khubamalaikabe mbu: “Yikhala hano khumukhono kwanje omusaatsa, okhuula olwa ndakhare abasukubo hasi wamakuluko tawe.”

¹⁴Kho bulano abamalaika abo nishiina? Nibo tsiroho etsio etsikhalabanilanga Nyasaye khandi etsirumungwa okhukhoonya abo abakhoyile okhuhonibwa.