Read wanga ABAHEBURANIA 10 Bible Online

ABAHEBURANIA 10 - wanga bible

ABAHEBURANIA 10

¹Amalako aka Abayahudi kali butswa eshinini shiebindu ebilayi khandi ebiatoto, kali butswa obukondo obwe ebindu biatoto ebilitsa. Emisango milala echio echihaanungwa inziayo buli muyika, chiakhasiiya chirie abandu abetsanga khu Nyasaye?

²Abandu benamilanga Nyasaye nibakhabele toto nibasiiyilwe okhurula mubwonooni biabwe shibakhabele neshikha khandi tawe. Nachio emisango chiosi chiakhaleshelwe okhukholwa.

³Nebutswa emisango echiakholungwa buli muyika chietsusinjia abandu akobwonooni bwabwe.

⁴Shichila amalasile aketsihunwa nende tsimbusi shikanyala kata nahatuutu okhurusia obwonooni tawe.

⁵Khulweshifune shino, olwa Kristo yali nali ahambi okhwitsa mushialo yaboolela Nyasaye ari: “Shiochamanga emisango nende ebihaanwa tawe, nebutswa omalile okhungasilia omubili.

⁶Iwe shiochamisibungwa nende ebiayo ebiasambwa nebihwela elala khushimalilo shiemisango, noho kata emisango echiokhurusia obwonooni tawe.

⁷Mana nimboola endi, ‘Iwe Nyasaye, Isie endi hano okhukhola akokhwenyakhwo shinga olwa kahandikwa khwisie mushitabu eshiamalako.’ ”

⁸Olwambeli Kristo yaboola khu Nyasaye mbu, “Shiochamanga noho okhuchamisibwa nemisango nende ebihaanwa noho ebiayo ebisambilwe khushimalilo eshiemisango nende emisango echiokhurusia obwonooni tawe.” Yaboola kano kata olwa emisango chino chiosi chiahaanungwa okhulondana namalako.

⁹Mana naboola khandi mbu, “E Nyasaye, isie endi hano okhukhola akokhwenyakhwo.” Kho Nyasaye arusinjiaho emisango chiosi echiakhale ne naraho omusango kwa Kristo mushilenje shiachio.

¹⁰Ne shichila Yesu Kristo yakhola aka Nyasaye yenya, kho fwesi pe khusiiyungwa okhurula mubwonooni khulwa eshihaanwa eshia yahaana eshiomubilikwe omwene lulala lwene olwo.

¹¹Buli omwisaaliisi owa eshi Yahudi akhalabananga emilimochie buli nyanga nahaananga emisango milala echio eshiakhanji. Nebutswa emisango echio shichinyala okhurusiaho obwonooni tawe.

¹²Kristo yahaanile omusango mulala khulwebionoono, okuli okukwanile, namala niyekhala khumukhono omusaatsa okwa Nyasaye.

¹³Alindililanga ebweneyo bulano okhuula olwa Nyasaye alaba narele abasukube hasi wamakuluke.

¹⁴Khulwa okhuhaana omusango mulala okwo, yabakhola abo abasiiyungwa okhurula mubwonooni okhuba abasiiyikhu ebisoni nebisoni.

¹⁵Ne Roho Omutakatifu yesi khandi akhuhelesinjia obulolibwe, olwambeli yaboola mbu, “Omwami aboola ari:

¹⁶‘Ino niyo Indakano eya ndakhakasie ninabo munyanga tsitsanga, Ndakhare amalako kanje mumioyo chiabwe nekahandika mumapaaro kabwe.’ ”

¹⁷Mana khandi naboola ari, “Shindakhetsulilekhwo obwonooni nende ebikhole biabwe ebibi khandi tawe.”

¹⁸Kho lwobwonooni bino biba nibileshelwe, omusango kundi okwokhurusia obwonooni shikwenyekha khandi tawe.

¹⁹Kho bulano abaana befwe, khuli nende obulekhule bwosi obwokhwinjila Habundu Hatakatifu muno, khulwa eshifune eshiokhufwa khwa Yesu.

²⁰Yakhwikulila fwesi injila imbia, injila inamu, okhubirira mungubo ishinga, nikhwo okhuboola mbu, okhubirira mumubilikwe omwene.

²¹Khuli nende Omwisaaliisi Omukhongo ousinjililanga inzu eya Nyasaye.

²²Kho khulweshio chende khusite ahambi nende Nyasaye, nikhuli nomwoyo okwatieli, nobusuubili obwitsule, nende emioyo echimalile okhusiiywa okhurula khumayililisio akalimwo eshikha, nachio emibili chiefwe nichiosibwe namaatsi amalafu.

²³Chende khuhandile elala khubunaayi obwakhufuchililanga, shichila oyo owakhusuubisia nomwisikwa.

²⁴Kho khuhendelanenje abeene khu beene, nikhukhonyana abeene khu beene okhumanyia obuheeli nende okhukhola amalayi.

²⁵Khulalekha omwima okwokhukhung'ananga shinga abandi bakholanga tawe. Nikalali khutsuubane abeene khu beene okhushilakhwo, shinga olwa mulolanga, Inyanga eya Omwami yisitile ahambi muno.

²⁶Okhuba nikhuba nikhutsiililila okhukhola obwonooni nikhulola, okhushila muno olunyuma lwokhumanya obwatieli bwa amakhuwa amalayi, omusango kundi kubulaho okunyala okhurusia obwonooni.

²⁷Habula akaliho nokhulindiilila muburi obukhalachi bwitsanga nende omulilo omululu okulisamba abo abafukulanga Nyasaye!

²⁸Omundu yesi owalechelesia Amalako aka Musa yerungwa nalabeelwa tsimbabasi ta, olwa anyoolekha neshikha khubukobosheli obwabaloli babili noho bataru.

²⁹Kho bulano kalaba karie khumundu oyo oulechelesiinjia Omwana wa Nyasaye? Oubukulanga amabanga akeindakano ya Nyasaye akamusiiya okhurula mubwonooni okhuba eshindu butswa? Owunyekanga Roho owobukoosia? Paarakhwo butswa neshinyasio eshibi shihela shirie eshiomundu oyo akwanile okhunyoola!

³⁰Shichila ifwe khumanyile omwenoyo owaboola mbu, “Eshikwoli neshianje omwene, omwene ndiliruunga;” khandi owaboola mbu, “Omwami alikhalachila abandube.”

³¹Neshindu eshiokhurisia muno omundu okhukwa mumakhono ka Nyasaye ouliho mwoyo.

³²Mwitsulile shinga olwa kali khale khwinywe; munyanga etsio olunyuma lwobulafu bwa Nyasaye bwali nibumalile okhumwashila, mwasandibwa mubindu ebinji nebutswa shimwahulwa nobunyakhani obwo tawe.

³³Mubise bindi mwanyekwa habulafu khandi musakanibwa, ne mubise bindi mwalinji aberecheshe okhusanga nende abo abakholelungwa malala ako.

³⁴Mwasanga mukhusanda okhwababohe, ne khandi olwa mwali nimuyayilwe ebindu bienywe biosi, mwafuchilila okhuyaywa okhwo nobusaangaafu, shichila mwamanya mbu mwali nimushili nebindu ebia Nyasaye yasuubisia ebili ebilayi okhushila, khandi ebinyala okhumenya inziayo.

³⁵Kho bulano mulaleshe itswoni eya muli ninayo ta; shichila yirelanga omurungo omukali.

³⁶Mukhoyele mwisumilisie, kho mube abanyala okhukhola aka okhwenya khwa Nyasaye, mana munyoole eshia asuubisinjia.

³⁷Shinga Amahandiko kaboolanga mbu, “Shishitonyile eshise eshitiiti butswa naye owitsanga aletsa; ne shialashinda tawe.

³⁸Nabo abandu banje abalunjishi balasuubila mana babeho abalamu; nebutswa niyakhabayo omundu yesi khubo oukalukha inyuma, shindalamusangalila tawe.”

³⁹Ifwe shikhuli abandu bakalukhanga inyuma mana bakora tawe. Habula ifwe khuli nobusuubili khandi khwahonibwa.