Read wanga ABAHEBURANIA 11 Bible Online

ABAHEBURANIA 11 - wanga bible

ABAHEBURANIA 11

¹Okhuba nobusuubili nokhumanyila elala ebindu ebiakhunaayangakhwo, khufuchililanga ebindu ebiakhulanyala okhulola tawe.

²Khulwa okhubela obusuubili Nyasaye yafuchilila abandu bakhale.

³Okhubirira mubusuubili nolwa khumanyilisinjia mbu eshialo shialongwa nelikhuwa elia Nyasaye, mbu akakhulolanga kaloongwa okhurula khwako akalanyala okhulolekha tawe.

⁴Bwali obusuubili obwachila Abeli nahaana omusango omulayi okwafuchililwa khu Nyasaye okhushila okwa Kaini. Okhubirira mubusuubilibwe Nyasaye yamufuchilila shinga omundu omulunjishi, shichila Nyasaye mwene yafuchilila ebihaanwabie. Khulwa obusuubilibwe Abeli ashiboolanga kata niyafwa.

⁵Bwali obusuubili obwekalila Enoka okhufwa. Habula, Nyasaye yamubukula namuyila mwikulu, ne shiyaliho omundu yesi owanyala okhumunyoola tawe, shichila Nyasaye yali namubukule. Amahandiko kaboolanga mbu, Enoka nashili okhubukulwa yali niyachamisia Nyasaye.

⁶Abulaho ounyala okhuchamisia Nyasaye nalali nobusuubili tawe, shichila owitsa khu Nyasaye okhuula abe nobusuubili mbu Nyasaye aliho khandi arunganga abamwinamilanga.

⁷Bwali obusuubili obwachila Noa nahulila obuchetsiyi bwa Nyasaye khumakhuwa akali niketsanga okhwikholekha aka yali nalanyala okhulola tawe. Yali omuhulili khu Nyasaye mana niyombokha isafina omwa yehonokoshelamwo nabeinzuye. Ne khulwako eshialo shiakhalachilwa eshiina, mana Noa nanyoola obulunjishi oburelungwa khulwa obusuubili okhurula khu Nyasaye.

⁸Bwali obusuubili obwachila Aburahamu nahulila olwa Nyasaye yamulanga mbu atsie mushialo eshia yali namusuubisiiye okhumuhelesia. Yarula mushialo shiabwe shiene nalamanyilekhwo ewayali natsitsanga tawe.

⁹Khulwa obusuubili yamenya shinga omucheni mushialo eshia Nyasaye yali niyamusuubisia. Yamenyanga mumaheema, shinga olwa Isaka nende Yakobo boosi bamenya, abamala nibanyoola obusuubisie bulala obwo okhurula khu Nyasaye.

¹⁰Okhuba Aburahamu yali nalindililanga litookho elia Nyasaye yali niyarechekha mana niyombokha eliemisiinji emiralilu.

¹¹Bwali obusuubili mu Nyasaye obwachila Aburahamu niyebula omwana omusiani, kata olwa yali nali omukofu muno khandi Sara yesi nalali ounyala okhwibula abaana khandi ta. Yasuubila mbu Nyasaye alosia aka yamusuubisia.

¹²Kata Aburahamu niyali shinga owafwa, ne okhurula mumundu mulala uno abolwibulolwe bali abanji muno shinga tsing'ining'ini etsiokhwikulu, bali abanji shinga omuyeshe okwo khulukuku lweinyanza okulanyala okhubalikha ta.

¹³Abandu bano boosi bafwila mubusuubili. Ne shibanyoola ebindu ebia Nyasaye yali niyabasuubisia tawe, nebutswa babilolela ehale mana nibabiakanila, khandi nibafuchilila habulafu mbu toto bali butswa abacheni khandi abelushi mushialo.

¹⁴Abo ababoolanga amakhuwa shinga kano bamanyinjia habulafu mbu bakhabaanga eshialo shiabwe abeene.

¹⁵Shibatsiililila okhuyililisia khukeshialo eshiabali nibarulilemwo tawe. Nibakhakholile bario, bakhabeele nobwiyangu obwokhukalukha.

¹⁶Habula shiali eshialo eshilayi muno eshiabali nibalindililanga, eshialo eshiomwikulu. Mana kho Nyasaye shialolanga tsisoni khulwa abo okhumulanga mbu Nyasaye wabwe ta, shichila yabarecheshela litookho eliokhumenyamwo.

¹⁷Bwali obusuubili obwachila Aburahamu nahaana omwanawe omusiani Isaka okhuba omusango olwa Nyasaye yamuteema. Yali Aburahamu owa Nyasaye yali niyahelesia obusuubisie obwo, nebutswa yali niyerecheshe okhuhaana omwanawe mulala yenyene okhuba omusango.

¹⁸Nyasaye yali niyamuboolela mbu, “Nokhubirira mu Isaka nimwo omwa olinyoolela olwibulo olwa ndakhusuubisia.”

¹⁹Aburahamu yasuubila mbu Nyasaye anyala okhulamusia Isaka okhurula mukhufwa, ne nikhwo okhuboola mbu Aburahamu toto yakalusilibwa Isaka okhurula mukhufwa.

²⁰Bwali obusuubili obwachila Isaka nasuubisia Yakobo nende Esau tsikhabi munyanga etsiali tsitsanga.

²¹Bwali obusuubili obwakhola Yakobo nashili okhufwa nalaamila buli shiamulala khubasiani aba Yosefu tsikhabi. Yeleeta khuindabushiye eyayachendelanga mana niyenamila Nyasaye.

²²Bwali obusuubili obwachila Yosefu nali ahambi okhufwa, naboola khukokhurula okhwa Abaisiraeli mu Misiri, mana nabamanyia akabalikhola khumubilikwe.

²³Bwali obusuubili obwachila abebusi aba Musa nibamubisa khulwemiesi chitaru olunyuma olwokhwibulwakhwe. Balola mbu yali omwana welikondo lilayi, ne nibalaria okhufunaka lilako liomuruchi tawe.

²⁴Bwali obusuubili obwachila Musa, olwa yali nakhuulile, yaloba okhulangwa omwana owomukhana owa Omuruchi.

²⁵Yalobola okhusaalila halala nabandu aba Nyasaye okhushila okhusangalila obwonooni khushise shituutu.

²⁶Yafuchilila mbu okhutseshelelwa khulwa Kristo khwali okhulayi okhushila obuyinda bwosi obwa Misiri, shichila yali nalindililanga omurungo okwa alinyoola imbeli bwene.

²⁷Bwali obusuubili obwachila Musa narula Misiri nalaria liruma liomuruchi wayo ta. Kafwana shinga owali nalutsi Nyasaye oulalolekhanga mana naloba okhukalukha inyuma.

²⁸Bwali obusuubili obwachila nachachia lisabo elia ipasaka nende okhulachilisia mbu amabanga kamitswe khumiliango, kho kachile omumalaika owolufu aleshe okhwira abaana abasiani abekulanda aba Abaisiraeli.

²⁹Bwali obusuubili obwachila Abaisiraeli nibanyalilwa okhwambukha munyanza inzakhanyu shinga abachendanga khwiloba eliumu; ne olwa Abamisiri bateema nabo okhwambukha, amaatsi kamala nikabamila.

³⁰Bwali obusuubili obwachila amasiisi ka Yeriko nikafunikha nikabungulukha olunyuma olwa Abaisiraeli bali nibabotokhane litookho elo khulwetsinyanga musafu.

³¹Bwali obusuubili obwachila Rahabu omutamba wulia naleerwa halala nende abakhaya okhuhulila Nyasaye abo ta. Shichila yakanila abaluuri aba Isiraeli nabenjisia obulayi.

³²Kho eshindi shiemeetakhwo okhuboola nishiina? Shiendi nebise ebihela okhumuboolela aka Gideoni, Baraki, Samusoni, Yefitsa, Daudi, Samweli, nende abalakusi obo boosi tawe.

³³Khulwa obusuubili bwabwe balwana lihe nebialo biosi mana nibahula. Bakhola akahabwene mana nibanyoola aka Nyasaye yali niyasuubisia. Bachila tsitalanyi nitsisuna eminwa,

³⁴nibasimia tsimemo etsiomulilo omululu, nibahonokokha okhwiirwa nolukanga. Bali abateshele, nebutswa nibakwa abamaani; bali abamaani abeitswoni mwihe kho nibalonda emikanda echiamahe echiabasuku.

³⁵Okhubirira mubusuubili abakhasi bakalusilibwa abekho babwe abali nibalamusiibwe okhurula mukhufwa. Abandi baloba okhulekhulwa, nibafwila mushinyasio kho mbu babe abanyala okhulamusibwa mubulamu obulayi okhushilakhwo.

³⁶Abandi banyekwa nibakhupwa, ne abandi nibabohwa neminyololo nibafubwa mumbohe.

³⁷Balaswa namachina, nibarasibwa mubitonye bibili nomusumeno, nibeerwa nolukanga. Bachendachenda nibabotokhana nibefwalile amaseelo akamakondi naketsimbusi; bali abatakha, nibasandibwa nende okhunyasibwa.

³⁸Kata eshialo shishialikhwo eshilayi khubo tawe! Batiimatiima shinga abelushi abali mubitsimi nende mubikulu nibamenya mumbinga nomumeena akomwiloba.

³⁹Kho abandu bano boosi bachamisia Nyasaye khulwa obusuubili bwabwe! Ne kata kario shibanyoola eshia Nyasaye yali niyasuubisia tawe,

⁴⁰shichila Nyasaye yali niyakhukasilia ifwe amakhuwa amalayi okhushilakhwo. Lichoomolie liali butswa mbu, fwesi nikhukhung'anile ninabo halala nolwa banyala okhukholwa abalamba.