Read wanga ABAHEBURANIA 12 Bible Online

ABAHEBURANIA 12 - wanga bible

ABAHEBURANIA 12

¹Khulweshio, lwomukanda omukhongo okwa abaloli kukhubotokhane, leshe khwihanye okhurula khu buli shiashindu eshiakhakhwikalila injila, nende obwonooni obwakhukhayilakhwo. Leshe khwilushe tsimbilo nikhurerekhwo omwoyo mumutiebano okuli imbeli wefwe.

²Chende khuchomie amapaaro kefwe khu Yesu owa obusuubili bwefwe bwileetangakhwo okhurula mukhuchaaka okhuula mukhuhelelesia khwabwo. Ye, shiyafwa omwoyo khulwa omusalaba ta! Nebutswa shiyalolakhwo mbu neshindu eshietsisoni okhufwila khumusalaba ta, khulwa okhubeela omwikhoyo okwali nikumulindililanga. Ne bulano yekhasibwe khumukhono omusaatsa kweshifumbi eshia Nyasaye.

³Muyililisiekhwo aka yabirilamwo kano, shinga olwa yefwila obusuku obunji okhurula khubonooni! Kho mulaluyila nende okhufwa emioyo tawe.

⁴Okhuba mubulwani bwenywe bwokhufukula obwonooni mushili okhubufukula okhuula khu okhwiirwa tawe.

⁵Mulebilile okhutsuubwa okhwa Nyasaye amutsuubanga inywe shinga abaanabe mumahandiko tawe. Aboola ari, “Mwana wanje, rechelesia olwa OMWAMI akhukololosia, khandi olafwa omwoyo olwa akhuhalabila tawe.

⁶Shichila OMWAMI akololosinjia buli omundu owa yaheela, khandi ahelesinjia eshinyasio buli owafuchilila okhuba omwanawe.”

⁷Mwifwile akamunyakhananga nimwitsulila mbu neshinyasio okhurula khu Sefwe. Okhusaalila khwenywe khumanyinjia mbu Nyasaye amukholelanga ako koosi shichila muli abaanabe. Alikhwoho omwana owa samwana alanywekhangakhwo ta?

⁸Nimuba nimulanywekhwa shinga abaanabe bandi banywekhungwa ta, kho shimuba nimuli abaanabe abatoto ta, habula abeinda isimba.

⁹Okhumeetakhwo, ifwe khuhananga oluyali khu abebusi befwe abakhwibula kata olwa bakhunywekha. Kho khukhoyile okhuhana oluyali kata okhushila olwa khunywekhwa nende Sefwe oweshiroho, kho mbu khubeho abalamu

¹⁰Abebusi befwe abakhwibula bakuhelesinjia eshinyasio khulwa eshise eshitiiti butswa, shinga olwa abeene bachama okhukhola. Nebutswa Nyasaye akhuhelesinjia ifwe eshinyasio khulwa okhukhwenyela amalayi, kho mbu khube abanyala okhusanga ninaye mubutakatifubwe.

¹¹Olwa khunyoola eshinyasio, kalolekhanga khwifwe ebise biene ebio okhuba akokhukhubelesia, nikhulasangaala ta. Kata kario, khwabo abamalile okhunyoola eshinyasio shinga shino, olunyumakhwo banyolanga omurungo okwomulembe okuli okwobulamu obwobulunjishi.

¹²Kho bulano chinguule amakhono kenywe akachoonyile, nimumia amasikamo kenywe amateshele!

¹³Muchendenje munjila tsinunji mbu kachile eshilenje shitiechelanga shileshe okhulema, nebutswa mbu shihonibwe.

¹⁴Murekhwo omwoyo okhuba nomulembe nabandu boosi, khandi muteeme okhumenya obulamu obutakatifu, shichila abulaho kata mulala oulimulola Omwami nalali nobulamu obwo ta.

¹⁵Mwilinde mbu alabaho mwinywe ouchweya okhunyoola obukoosia bwa Nyasaye tawe. Mube meeso ne alabakhwoho mwinywe ouli shinga eshirache eshilulu eshikhulanga nishisalasia obufwisi bwashio nishirela amanyakhano tawe.

¹⁶Alabakhwoho kata mulala mwinywe ouli omuyilani noho oulafuchilila okhwimililwa muroho ta, shinga Esau owakulasia obukhulundu obwo khwibulwakhwe khulwe eshitelu shilala eshiebilibwa.

¹⁷Okhuba mumanyile mbu olunyumakhwo yenya mbu samwana amulaamile ikhabi, nebutswa yemwa shichila shiyanyolakhwo injila yosi eyokhukalukhasiliamwo aka yali niyakhola tawe; ne kata niyachikhaba nalilanga shiyachinyoola ta.

¹⁸Inywe mushili okhuula ahamunyala okhwihulila, shinga abandu Abaisiraeli behulila olwa boola khu shikulu shia Sinai eshiali nomulilo okwetsimemu, eshilima, lifuumbi, imbumbuyeka;

¹⁹oluyoka olukali lwokhukhupwa okhwolwika, nende oluyoka lwomwoyo kwa Nyasaye. Ne olwa abandu bahulila omwoyo kwa Nyasaye okwo, basaaya mbu balaboolelwakhwo likhuwa lindi liosi tawe.

²⁰Shichila bakhaywa okhwisumilisilia akalachiilisibwa mbu, “Kata isolo niyiba niyakhasenakhwo khulukuku olweshikulu eshio okhuula yilaswe namachina ifwe.”

²¹Akabalolayo kali akokhuriisia muno, kata Musa yesi naboola ari, “Indenga yindilile khandi eriire muno.”

²²Halali inywe mwitsile khushikulu shia Zayuni khandi mwitookho lia Nyasaye ouliho mwoyo. Yerusalemu nilio litookho eliomwikulu, elili nende amahe akabamalaika ebikhumila ebilabalikha tawe.

²³Mwitsile mumukhung'ano okwa obusaangaafu bwabaana ba Nyasaye, abekulanda, abameera kabwe kahandikwa mwikulu. Mwitsile khu Nyasaye ouli omuyaasi owabandu boosi nende khandi owetsiroho etsiabandu abalunjishi abafwa nebutswa bakholwa okhuba abalamba.

²⁴Mwitsile khu Yesu, owarechekha indakano imbia, khandi khumabanga akamitswa, akasuubisinjia amakhuwa amalayi okhushila amabanga aka Abeli.

²⁵Kho mube meeso, mulaloba okhuhulila oyo ouboolanga tawe. Abo abaloba okhuhulila oyo owahana khushialo oburume okhurula khu Nyasaye, shibehonokokha tawe. Kho nefwe fwesi khwakhehonokokha khurie, nikhuba nikhumuloba omwene oyo ouboolanga nali mwikulu?

²⁶Omwoyokwe kwaresia eshialo inyanga eyo nebutswa bulano asuubisiye mbu, “Shindalameeta okhuresia eshialo shionyene ta, habula nende khandi likulu liosi.”

²⁷Amakhuwa mbu, “Ndalameeta khandi” kamanyinjia mbu ebilonje biosi bilireesibwa nibirusibwaho, kho kachile ebio ebilanyala okhuresibwa ta bitonyeho.

²⁸Kho bulano chende khupile Nyasaye orio, shichila khunyolile obwami obulanyala okhuresibwa tawe. Chende khumupile Nyasaye orio nikhumwinamila nobwongoli nende oburi munjila eyimuchamisia omwene;

²⁹shichila Nyasaye wefwe uno nounyala okhukhumulula nomulilo nikhulaba abasuubilwa khuye ta.