Read wanga ABAHEBURANIA 13 Bible Online

ABAHEBURANIA 13 - wanga bible

ABAHEBURANIA 13

¹Mutsililile okhuheelananga abeene khu beene shinga abaana Abakristo.

²Ne mulachweyanga okhwinjisia abacheni mutsingo tsienywe tawe. Shichila baliho abandi abakhola bario khale ne nibenjisiliamwo abamalaika nibalamanyile tawe.

³Mwitsulilenje abali mumbohe, shinga nimuli ninabo halala mumbohe. Mwitsulilenje abo abasalilanga, shinga nimusalilanga halala ninabo.

⁴Obuteshani bukhoyeele buheebwe oluyali nabandu boosi, mana abasaatsa nende abakhasi basuubililane. Shichila Nyasaye aliyaasia abaheyi nende abayilani.

⁵Mulinde obulamu bwenywe, muleshe okhuheela obuyinda obwamapesa; ne mufuchilile ebiamuli ninabio mbu bimuhelile. Shichila Nyasaye mwene aboolanga ari, “Shindakhamuleshe noho okhumwibala butswa kata nahatuutu tawe.”

⁶Kho chende khume ikholo nikhuboola khuri, “Omwami niye omuhabini wanje, shindalaritsanga tawe. Omundu namundu anyala okhukhola shiina?”

⁷Mwitsulilenje abo abalinji abemilisi benywe khale, abamuboolela oburume obwa Nyasaye. Yiliilisiekhwo shinga olwa bamenyanga khandi shinga olwa bafwa; mana mulonde khubusuubili bwabwe.

⁸Yesu Kristo nimulala butswa oyo, olwabele, leelo, khandi inziayo.

⁹Mulafuchilila okhushiamibwa namechesio amacheni nikamurusia khunjila eyahabwene tawe. Shichila nobulayi omundu okhunyoola amaani akomumwoyo mukari okhurula khubukoosia bwa Nyasaye, okhushila okhulonda amalako akemisilo khubiokhulia, shichila abo abalondanga emisilo echio shichibakhoonyangakhwo eshindu shiosi tawe.

¹⁰Khuli nende ashimalilo shiemisango eshia kata abo abakhalabanilanga habundu aha Abayahudi benamilanga balafuchililwa okhulilakhwo tawe.

¹¹Omwisaaliisi Omukhongo yarelanga amalasile akemiruko Habundu Hatakatifu muno khulwa okhukahaana shinga omusango okwebionoono; nebutswa inyama yatsio yasambilungwa elwanyi weyikambi.

¹²Yesu yesi yafwila elwanyi welitookho, kho mbu anyale okhusiiya abandu okhurula mubwonooni biabwe namatsayi keke omwene.

¹³Bulano lekha khurule khutsie elwanyi weikambi mana khusanjilane ninaye musonitsie.

¹⁴Shililiho litookho khwifwe khushialo khuno elilimenya inziayo tawe; habula khukhabanga litookho eliitsa okhubaho.

¹⁵Kho bulano chende buli lwosi khuhaanenje omusango okwobwitsoomi khu Nyasaye okhubirira mu Yesu, okuli omusango okwakhuhaananga okhubirira mumakhuwa aka khuboolanga olwa khwiyamanga mbu niye Omwami wefwe.

¹⁶Ne mulebilile okhukhola amalayi nende okhukhonyana abeene khu beene tawe, shichila chino nichio emisango echichamisinjia Nyasaye.

¹⁷Hulilenje abemilisi benywe nimulonda amalako kabwe. Bamulindanga nibalahuluukha ta, olwa kali mbu okhuula benoosilie Nyasaye khukobukhalabani bwabwe. Nimuba nimubahulila, balakhalabana mumilimo chiabwe nobusaangaafu; nikalali kario tawe, balakhola nibasinyishe mumioyo chiabwe ne shibalamukhonya eshindu shiosi ta.

¹⁸Mutsililile okhukhusaayila ifwe. Khuli nobwatoto mbu khuli namachesi akali habwene, shichila khwenyanga ebise biosi khukholenje akali amalunji.

¹⁹Khandi emusaaya okhushila muno mbu musaaye Nyasaye yangalusie khwinywe lwangu.

²⁰Nyasaye owomulembe owalamusia Omwami wefwe Yesu okhurula mukhufwa, ouli omwayi omukhongo owamakondi khulwa okhubirira mumabanga ake Indakanoye eyobumeli, akhoya

²¹yamuhelesia inywe ebindu biosi ebilayi ebiokhukhola akokhwenyakhwe. Akhoya yakhukholela akamuchamisia okhubirira mu Yesu Kristo Oluyali lube khu Kristo ebisoni nebisoni Amina.

²²Abaana befwe, emusaaya mbu mureechelesie mubwisumilisi oburume buno obwokhutsuuba; shichila ibarwa eyemuhandiichiile yino neyinyimbichiti.

²³Ndenya mumanye mbu omwana wefwe Timotseyo yaboololwe okhurula mumbohe. Naba niyakhetsa lwangu nembe ninaye olwa nanditse okhumulola inywe.

²⁴Mubashiesie abemilisi benywe boosi nende abakristo. Abaana befwe aba Italia bamushesiiye.

²⁵Obukoosia bwa Nyasaye bubetsenje khwinywe mwesi. Amina.