Read wanga ABAHEBURANIA 2 Bible Online

ABAHEBURANIA 2 - wanga bible

ABAHEBURANIA 2

¹Khulweshio okhuula khutiile obutinyu akobwatoto akakhwahulile kho mbu khuleshe okhukora okhurula khubwatoto.

²Oburume bwabamalaika barumbulila abakuuka befwe bwalolekha nibuli obwatoto, ne oyo yesi owaloba okhubulonda kata okhubuhulila, yahelesibwa eshinyasio eshia akhoyeele okhunyoola.

³Ne bulano, nefu khwakhehonokokha khurie nikhuba nikhulekha okhurechelesia obuhonia obukhongo shinga buno? Omwami omwene yaranjilila okhulanjilisia obuhonia buno, ne abo abamuhulila bakhumanyia ifwe mbu nobwatieli.

⁴Khushise shilala eshio Nyasaye yameta obulolibwe khubwabwe khulwa okhukhola akamakana nende akokhuhuchisia aketsimbia tsiosi nende khulwa okhuhaana ebihaanwa bia Roho Omutakatifu okhulondana nende okhwenyakhwe omwene.

⁵Nyasaye shiyaraho abamalaika okhuba abaruchi beshialo eshiakhuboolangakhwo eshitsanga eshiyia tawe.

⁶Halali shinga Amahandiko kaboolanga habundu undi mbu, “Omundu ni shiina, Iwe Nyasaye mbu okhuula omupaarekhwo; omundu namundu mbu okhuula omuteebekhwo?

⁷Wamukhola khulwa eshise shitiitikhwo okhuba hasi okhushila abamalaika, nomufwala olusimbi olwoluyali nende olwolukoosi,

⁸mana nomukhola omuruchi owebindu biosi.” Kaboolanga mbu Nyasaye yakhola omundu okhuba; “Omuruchi owebindu biosi;” kano kakhung'asilinjiamwo buli shiashindu. Nebutswa shikhulolanga bulano omundu narukanga ebindu biosi ta.

⁹Habula khulolanga Yesu owakholwa khulwa eshise shitiitikhwo okhuba hasi okhushila abamalaika, mbu okhubirira mubukoosia obwa Nyasaye afwile buli mundu. Ne bulano khumulolanga nafwalilwe olusimbi olwoluyali nende olwolukoosi khulwa okhubela okhufwa khwayanyakhana.

¹⁰Ne kali butswa habwene mbu, Nyasaye oulonganga khandi oulindanga ebindu biosi, akhole Yesu okhuba omulamba okhubirira mukhutsuunwa, kho mbu achile abandu abanji basanje muluyalilwe. Shichila Yesu niye oubemililanga okhunyoola obuhonia.

¹¹Okhuba oyo ousiiyanga abandu okhurula mubwonooni biabwe nende abo abasiiyilwe okhuba abeleleshe bosi bali nende Papa mulala. Niko akachila Yesu nalaba netsisoni okhubalanga abaana babwe tawe.

¹²Aboolelanga Nyasaye mbu, “Nimboolele abaana befwe aka iwe wakholile; nekhwitsoomie iwe mumukhung'ano kwabwe.”

¹³Khandi aboola mbu, “Ndakhamusuubile Nyasaye.” Mana khandi aboola mbu, “Kho endi hano nende abaana aba Nyasaye yambelesiye.”

¹⁴Ne abaana, shinga omwene abalanganga ario, nabandu abali nomubili okwoburulanda, Yesu omwene yekhola shinga abo nasanga ninabo mumubili okwoburulanda. Yakhola ario kho mbu okhubirira mukhufwakhwe anyale okhusasia Setani, ouli nobunyali bwokhwira.

¹⁵Kho munjila yino Yesu yabalekhula abo abali nibali abasumba mubulamu bwabwe bwosi khulwokhuba noburi obwokhufwa.

¹⁶Shichila kali habulafu mbu shibali abamalaika aba ye akhoonyelelanga tawe. Habula shinga Amahandiko kaboolanga mbu, “Akhoonyanga abolwibulo lwa Aburahamu.”

¹⁷Khulweshio kaboolanga mbu, okhuula afwanane nende abaana babo munjila tsiosi kho abe Omwisaaliisi Omukhongo wabwe omusuubilwa khandi oweshisa mukhukhalabanila Nyasaye; kho mbu abandu baleshelwe obwonooni bwabwe.

¹⁸Ne bulano anyala okhukhonyelela abo abateemwa, shichila ye mwene yateemwa khandi nasalila.