Read wanga ABAHEBURANIA 3 Bible Online

ABAHEBURANIA 3 - wanga bible

ABAHEBURANIA 3

¹Abakristo bashianje, aba Nyasaye yalanga! Yiliilisiekhwo khu Yesu owa Nyasaye yaruma okhuba omwisaaliisi Omukhongo owobusuubili obwa khufuchililanga.

²Yali omusuubilwa khu Nyasaye, owamulobola okhukhola omulimo kuno, shinga butswa Musa yali omusuubilwa mumulimo okwayakhola niyemililanga abandu ba Nyasaye.

³Omundu oumbakha inzu anyolanga oluyali olukhongo okhushila inzu yatsana. Munjila ndala eyo, Yesu akhoyeele okhunyoola oluyali olukhongo okhushila Musa.

⁴Buli inzu yumbakhungwa nomundu, naye Nyasaye niye owombakha ebindu biosi.

⁵Musa yali omusuubilwa munzu eya Nyasaye shinga omukhalabani, mana naboola amakhuwa aka ebindu ebia Nyasaye yakhaboolile olunyumakhwo.

⁶Nebutswa Kristo nomusubilwa shinga Omwana oulindile inzu eya Nyasaye. Nefu khuli inzuye nikhuba nikhwakhaba abeitswoni khandi nobusuubili mukakhunaayangakhwo.

⁷Kho shinga olwa Roho Omutakatifu aboolanga ari, “Nimwakhahulila omwoyo kwa Nyasaye leelo,

⁸mulabakhwo abakhayi shinga olwa abakuuka benywe bali olwa bateema Nyasaye inyanga eyo mushitsiimi tawe.

⁹Nyasaye aboolanga mbu, ebweneyo abakuuka benywe bandeema, kata olwa bali nibaluutsi amalayi aka ndabakholela mumiyika amakhumi kane.

¹⁰Khulweshio ndasinyishila abandu abo mana nimboola endi, ‘Buli lwosi nabashiamu mumioyo chiabwe, khandi shibamanyilekhwo tsinjila tsianje tawe.’

¹¹Ndasinyikha mana ninditsuba muburuma mbu: ‘Shibalinjilakhwo mushialo eshia ndakhabahelesiliyemwo obuhulushi kata nahatuutu tawe!’ ”

¹²Abasuubili bashianje, henjelesie obulayi mbu alabakhwo mwinywe omundu kata mulala ouli nomwoyo okwobwonooni khandi okulali nobusuubili tawe, okwakhachila yashiukhana okhurula khu Nyasaye ouliho mwoyo.

¹³Habula okhuula mutsuubanenje abeene khu beene buli nyanga, olwa eshise shishilangwa mbu “Leelo” shinga kakhuboolelanga mumahandiko mbu, abuleho owashienywe yesi oukatibwa nobubatsa obwobwonooni mana abe omukhayikhanu.

¹⁴Shichila ifwe khuli abasanjilani nende Kristo nikhwakhaba nikhulumiilila buli lwosi mubusuubili bwefwe okhuula khushiakamo shinga olwa khwali mukhuchaaka.

¹⁵Amahandiko kaboola kari, “Leelo, nimuba nimuhulila omwoyo okwa Nyasaye, mulaba abakhayi shinga olwa abakuuka benywe bakhola tawe.”

¹⁶Nibandu shiina abahulila omwoyo kwa Nyasaye mana nibaba abakhayi? Shibaali balia boosi aba Musa yarusia Misiri?

¹⁷Ne nibena aba Nyasaye yasinyishila emiyika amakhumi kane? Shibaali balia abonoona, mana nibafwila mushitsiimi?

¹⁸Ne bali bandi wina aba Nyasaye yetsubila mbu, “Shibalinjila mushialo eshiobuhulushi kata nahatuutu tawe?” Shibali abeene abo abakhola induli nibamwikaana?

¹⁹Kho bulano khulolanga mbu, shibanyalilwa okhwinjila mushialo shiatsana eshio ta, shichila shibasuubila tawe.