Read wanga ABAHEBURANIA 4 Bible Online

ABAHEBURANIA 4 - wanga bible

ABAHEBURANIA 4

¹Bulano Nyasaye amalile okhukhuhelesia obusuubisie mbu khuli abanyala okhwinjila mubuhulushi obwo, obwa yamala okhuboolakhwo. Kho chende khube meeso, mbu omundu yesi khwinywe aleshe okhunyoolekha nachweyile okhunyoola obuhulushi obwasuubisibwa obwo.

²Okhuba ifwe khwahulile Amakhuwa Amalayi, butswa shinga olwa nabo bahulila. Bahulila oburume, ne nibulabakhoonya tawe, shichila olwa babuhulila, shibabufuchilila nobusuubili tawe.

³Kho ifwe abasuubilanga, khunyolanga obuhulushi obwo obwa Nyasaye yasuubisia. Kali butswa shinga yaboola mbu, “Ndasinyikha mana ninditsuba muburuma mbu, ‘Shibalinjilakhwo mushialo eshiobuhulushi kata nahatuutu tawe!’ ” Yaboola kano kata olwa emilimochie chiali nichiakama okhurula khushise eshia yalonjelamwo eshialo.

⁴Shichila habundu undi mu Mahandiko kano kaboolungwakhwo khunyanga eyomusafu mbu, “Nyasaye yahulukha khunyanga eyomusafu okhurula khumilimo chie chiosi.”

⁵Amakhuwa malala kano kaboolungwakhwo khandi mbu: “Shibalinjila khwo mushialo eshiobuhulushi kata nahatuutu tawe.”

⁶Abo abaranjilila okhuhulila Amakhuwa Amalayi ako shibayenjila mubuhulushi obwo ta, shichila shibasuubila tawe. Ne baliho abandi nabo abafuchililungwa okhwinjilamwo.

⁷Kano kalolekhanga okhuba akobwatieli olwa Nyasaye yaraho inyanga yindi, eyilangungwa mbu, “Leelo.” Olunyuma olwa emiyika eminji yachiboolakhwo khandi okhubirira mu Daudi mumahandiko akamalile okhuboolwakhwo mbu, “Nimwakhahulila omwoyo kwa Nyasaye olwa leelo, mulaba abakhayikhanu tawe.”

⁸Yoshwa alaba niyahelesia abandu abo obuhulushi obwa Nyasaye yali niyasuubisia, Nyasaye shiyakhaboolelekhwo olunyuma khandi khunyanga yindi tawe.

⁹Kho olwa kali, kata kario, bushiliho obuhulushi khulwa abandu Abanyasaye, butswa shinga Nyasaye yahulukha khunyanga eyomusafu.

¹⁰Okhuba oyo yesi ounyola obuhulushi obwa Nyasaye yasuubisia, alahulukha namalile emilimochie omwene, shinga olwa Nyasaye yahulukha khuchichie.

¹¹Kho, chende bulano khurekhwo omwoyo khunyoole obuhulushi obwo, mbu abuleho owashiefwe yesi owakhachweya okhunyoola obuhulushi obwo, shinga abo bachweya khulwa okhubula obusuubili.

¹²Likhuwa lia Nyasaye nelilamu khandi neliebikhole, limemu okhushila olukanga olwamema tsimbeka tsiombi. Likhalakanga okhuula aha omwoyo nende roho biakanilanga, kata ahobuunjilo bwamakumba nende obutuunduli bwako biakanilanga. Khandi linyala okhuyasia obwikombi obwomundu nende amapaaro akomumwoyokwe.

¹³Shibulaho eshilonje shiosi eshinyala okhubiswa okhurula mumoni mwa Nyasaye; ebindu biosi mubulongwi biayebakala habulafu khandi biafuunulilwa elala imbeliwe. Ne niye owa ifwe fwesi khukhoyeele khumuboolele amakhuwa kefwe abeene.

¹⁴Kho ifwe bulano okhuula khuhande khukobusuubili obwakhufuchililanga shichila khuli nende omwisaaliisi Omukhongo muno owatsia imbeli ewa Nyasaye omwene, niye Yesu Omwana wa Nyasaye.

¹⁵Omwisaaliisi Omukhongo wefwe uno shiali oubula eshisa khukobuteshele bwefwe tawe, habula khuli nende Omwisaaliisi Omukhongo owateemwa munjila tsiosi shinga ifwe, nebutswa shiyayonoonakhwo tawe.

¹⁶Kho bulano nikhuli neitswoni chende khusite ahambi khushifumbi eshia Nyasaye eshioburuchi aha obukoosia buli. Habwenaho khulanyoola tsimbabasi nende obukoosia obwokhukhonya olwa khuba nikhubwenya.