Read wanga ABAHEBURANIA 5 Bible Online

ABAHEBURANIA 5 - wanga bible

ABAHEBURANIA 5

¹Buli omwisaaliisi omukhulundu yahulungwa okhurula mubandu bashie mana yemekhwa okhukhalabanila Nyasaye khulwa abandu batsana, okhumala emisango nende okhuhaana khu Nyasaye ebihaanwa khulwa okhurusiaho obwonooni bwabwe.

²Ne khulwa okhuba omwisaaliisi omukhulundu omwene nomuteshele mumwoyokwe, anyala okhwisumilisilia abo ababula obumanyi nende abo abashiamile okhurula khunjila.

³Ne khulwa okhubela mbu omwene nomuteshele mumwoyokwe, okhuula ahaane emisango khu Nyasaye ne shichili butswa khulwa obwonooni ebiabandu ta, habula khandi khulwa okhurusiaho obwonooni bibie omwene.

⁴Omundu shiyeyemekhanga omwene muluyali olwokhuba omwisaaliisi omukhulundu ta, habula Nyasaye niye oumulanganga shinga olwa yalanga Haroni namwemekha.

⁵Munjila ndala yene eyo, Kristo shiyechinjimisia omwene okhwirakhwo oluyali olwokhuba omwisaaliisi omukhulundu tawe. Habula yahulwa nende Nyasaye owamuboolela mbu, “Iwe oli Omwana wanje; leelo ekhwibule.”

⁶Ne yaboola khandi habundu undi mbu, “Olaba omwisaaliisi omukhulundu ebisoni nebisoni okhulonda khumelo eyobwisaaliisi obwa Melikizedeki.”

⁷Olwa Yesu yali nashimenyele khushialo, yasaaya nende okhusaba khu Nyasaye nende okhumuhabila obutinyu nalila amasika, mbu amuhonie okhurula mukhufwa. Khulwa okhubela mbu yali omuholo khandi omwihaani, Nyasaye yamuhulila.

⁸Ne kata niyali Omwana wa Nyasaye, Kristo yeka okhubirira mubusalili bwayabirilamwo okhuba omuhulili.

⁹Ne olwa yakholwa omulamba, yamala nakwa eshinoko eshiobuhonia obulahwaho ta khu abo boosi abamuhulila;

¹⁰mana Nyasaye namwemekha okhuba omwisaaliisi omukhulundu, mubulondokhani bwobwisaaliisi obwa Melikizedeki.

¹¹Khuli nende amanji akakhwakhaboola khumakhuwa kano, nebutswa nobutinyu okhumwinoosilia inywe shichila muhulilanga kahala.

¹²Mwabele nebise ebihela inywe okhuba abeechesia, nebutswa mushienyanga omundu okhumwechesia ameeko akambeli akoburume bwa Nyasaye. Olwa muba nimwenyekhanga okhulia ebiliibwa ebimilanu, nilwo olwa mushinywetusanga amabeele.

¹³Omundu yesi oushinywesibwa amabeele konyene ashili butswa omwana, khandi abula obumanyilisi bwosi khumakhuwa akobulunjishi.

¹⁴Nebutswa ebilibwa ebiumilanu nebia abakhulile, abanyala okhwahukhasia amalayi nende amabi mubikhole biabwe.