Read wanga ABAHEBURANIA 6 Bible Online

ABAHEBURANIA 6 - wanga bible

ABAHEBURANIA 6

¹Kho khuchoome khumechesio akakhulile nikhulekha elubeka amechesio akambeli akoburume obwa eshikristo. Shikhukhoyele khandi okhumbakha omuse okwa okhulekha emilimo emikhaya nende okhusuubila mu Nyasaye tawe;

²khumechesio akobubatiisi nende akokhura amakhono khubasuubili, akokhulamukha okhwabafu nende akobukhalachi obwa Nyasaye obwa eshiina eshiainziayo.

³Chende khutsililile imbeli khurio! Ne kano niko akakhulakhola, Nyasaye niyakhafuchilila.

⁴Abo abachwang'a obusuubili bwabwe bakhakalusibwa barie mbu khandi bahonibwe? Khale balikhwo mubulafu bwa Nyasaye; nibakonyelelakhwo eshihaanwa eshiomwikulu khandi nibanyolakhwo omukabo kwabwe okwa Roho Omutakatifu;

⁵bamanya okhurula khukababiriramwo mbu likhuwa lia Nyasaye nelilayi, khandi bali nibalutsikhwo oburuchi obwa Nyasaye obwitsanga okhubaho.

⁶Mana nibachwang'a obusuubili bwabwe! Nobutinyu muno okhubakalukhasia khandi, shichila bakalushilanga okhumubamba Omwana wa Nyasaye nibamubakala habulafu mushifimbwa murwe.

⁷Nyasaye ahaananga tsikhabi khuliloba elieifula yikwitsangakhwo khatsotselo nalio nilikhusia ebiraache ebili ebiobukhoonyi, khwabo ababiachilungwa.

⁸Nebutswa niliakhakhulamwo amahwa nende libanze, shiliba nobukhala tawe; liba lili mumasila kokhulaamwa eshilaamo nende Nyasaye nende okhusasibwa nomulilo.

⁹Kata nikhuboolanga khurio, abaheelwa befwe, khwihulilanga nikhuli nobusuubili mwinywe. Khumanyile mbu inywe muli netsikhabi tsindayi okhushila etsili etsiobuhonia bwenywe.

¹⁰Nyasaye shiali owebiela tawe. Shianyala okhwibilila emilimo chiamwakhola noho obuheeli obwa mwalolesia khululwe mubukhonyi obwamwahaana khandi obwamushihaananga khuba Kristo bashienywe tawe.

¹¹Obwikombi bwefwe obukhongo buli mbu buli shiamulala khwinywe atsililile okhulolesia obulumilifubwe okhuula khushiakamo, kho mbu akamunayaangakhwo kabe akatoto.

¹²Shikhwenya mbu inywe mukwe abatofu tawe, habula mube shinga abo abasuubilanga khandi abali abesumilisi, mana kho munyoole aka Nyasaye yasuubisia.

¹³Olwa Nyasaye yahaana obusuubisiebwe khu Aburahamu, yetsuba okhusia akayali nasuubisiye; khulwa okhubela shiyaliho oundi omukhulundu okhumushila omwene ta, yetsubila muliira lilie omwene.

¹⁴Yaboola ari, “Isie ekhusuubisinjia mbu ndakhakhulamile tsikhabi nende okhukhuhelesia olwibulo olunji.”

¹⁵Aburahamu yesumilisia, okhuula olwa yanyoola aka Nyasaye yali niyamusuubisia.

¹⁶Omundu niyetsuba, yetsubilanga muliira elia oundi ouli omukhulundu okhumushila, mana eshitsubo eshio nishio eshitinyisinjia amakhuwa koosi.

¹⁷Khu abo abatsia okhunyoola eshio eshiasuubisibwa, Nyasaye yenya okhubakala habulafu nende okhukhwechesia mbu shiyakhakalukhasia lichoomo liobusuubisiebwe tawe; kho kachila yameeta eshitsubo khubusuubisiebwe obwo.

¹⁸Kho bulano biliho ebindu bibili bino, ebilanyala okhukalukhana ta khandi ebia Nyasaye alanyala okhubehelamwo tawe. Kho ifwe abehonokooshela muye khutinyilisibungwa mumioyo okhushila, mbu khuhandile elala khubunaayi obuli imbeli wefwe.

¹⁹Khuli nobunaayi buno obuli shinga eshiralisio eshiobulamu bwefwe. Obunaayi buno nobwokhuhonokosia khandi obwatoto, bubirilanga mungubo yishinga eya mu Hekalu eyomwikulu nibwinjila habundu hatakatifu bwene.

²⁰Ne niho aha Yesu yaranjilila okhutsia khulwefwe ifwe nikhushili, ne niyekhola omwisaaliisi Omukhongo khulwa inziayo okhulonda khumelo yobwisaaliisi bwa Melikizedeki.