Read wanga ABAHEBURANIA 7 Bible Online

ABAHEBURANIA 7 - wanga bible

ABAHEBURANIA 7

¹Melikizedeki yali omuruchi owelitookho elia Salemu, khandi omwisaaliisi owa Nyasaye Omukhongo Muno. Olwa Aburahamu yali nachelelanga okhurula mwihe elia yalwana nahula abaruchi bane, Melikizedeki yamwakanila, mana namulaamila ikhabi.

²Naye Aburahamu namuhelesia eshitonye eshielikhumi eshiokhubindu biosi ebiayali nayayile. Eshisina shieliira Melikizedeki olwambeli shiboolanga mbu, “Omuruchi Owobulunjishi;” ne okhubela yali omuruchi owa Esalemu, eshisina shieliiralie khandi shiboolanga mbu, “Omuruchi owomulembe.”

³Shialikhwoho habundu mubuhandiche aha eliira lia Samwana Melikizedeki noho elia nyinamwana eliebisonibie; kata obuhandiche bwosi obwokhwibulwakhwe noho kata okhufwakhwe tawe. Ali shinga Omwana wa Nyasaye; ne atsiilililangaokhuba omwisaaliisi inziayo.

⁴Lolakhwo obukhongo bwa Melikizedeki! Aburahamu ouli kuuka wefwe owamanyikhana, yamuhelesia eshitonye eshielikhumi eshiokhubindu ebia yali nayayile mwihe.

⁵Nabo abolwibulo lwa Lawi abali abesaaliisi balachilisibwa nelilako okhusolola eshitonye eshielikhumi okhurula khumiandu echia abandu Abaisiraeli; okhurula khubandu abeshialo shiabwe shiene, kata olwa aboluyia lwabwe bali khandi abolwibulo lwa Aburahamu.

⁶Melikizedeki shiyali owokhulwibulo lwa Lawi tawe, nebutswa yasolola eshitonye eshielikhumi okhurula khu Aburahamu, mana namulaamila ikhabi, omundu owali niyanyoola obusuubisie obwa Nyasaye.

⁷Ne buli shiamundu amanyile mbu oyo ouhaananga tsikhabi nomukhongo okhushila oyo oulamilwa tsikhabi.

⁸Ne Abesaaliisi abasololanga eshitonye eshielikhumi bafwitsanga; nebutswa khu Melikizedeki eshitonye eshielikhumi shiasololwa nende oyo oulafwitsanga ta shinga Amahandiko kaboolanga.

⁹Nikhwo okhuboola mbu olwa Aburahamu yahaana eshitonye eshielikhumi, Lawi owa abolwibulolwe basololanga eshitonye eshielikhumi yesi khandi yahaana eshitonye eshielikhumi eshio.

¹⁰Okhuba Lawi yali nashili kata okhwibulwa, nebutswa khunyala okhuboola mbu Lawi yali mumubili kwa Aburahamu kuukanyene olwa Melikizedeki yamwakanila.

¹¹Khwali khulwa eshifune eshiokhusimikhwa okhwa obwisaaliisi obweshilawi obwa Lilako liahaanwa khubandu Abaisiraeli. Ne bulano emilimo echia abesaaliisi abeshilawi chiba nichiali habwene, obuha bwokhwenya omwisaaliisi oweyimbia yindi okhulolekha ouli omwisaaliisi okhulonda khumelo eyobwisaaliisi obwa Melikizedeki, obulali obwa Haroni shibwakhabeeleho tawe.

¹²Shichila obwisaaliisi nibukalukhasibwa, okhuula khandi obukalukhani bubeho mumalako.

¹³Ne Omwami wefwe owamakhuwa kano kaboolungwakhwo yali owokhuluyia olwahukhane, ne shialikhwoho owomuluyialwe owakhalabanakhwo shinga omwisaaliisi tawe.

¹⁴Kamanyikha obulayi mbu yali owomuluyia lwa Yuda; naye Musa shiyaralakhwo oluyia luno olwa yaboola khukabesaaliisi tawe.

¹⁵Amakhuwa akakhuboolangakhwo kano kaloleshe habulafu okhushila, omwisaaliisi owahukhane aloleshe, ouli shinga Melikizedeki.

¹⁶Omwenoyo shiyakholwa omwisaaliisi khulwa amalako nende okhulachilisia okhwo omundu ta, habula khulwa obunyali bwobulamu obubula eshiakamo.

¹⁷Okhuba Amahandiko kaboolanga mbu, “Iwe olaba omwisaaliisi ebisoni nebisoni, okhulonda khumelo eyobwisaaliisi obwa Melikizedeki.”

¹⁸Kho lilako liakhale lialekhwa shichila liali liteshele khandi elibula obukhala.

¹⁹Okhuba Amalako ka Musa shikali akanyala okhukhola eshindu shiosi okhuba eshilaamba tawe. Ne bulano obunaayi obushilakhwo bwamala okhuhaanwa, obwakhubirilangamwo nikhusita ahambi khu Nyasaye.

²⁰Ne okhumeeta khubunaayi obwo, khuliho khandi neshitsubo shia Nyasaye. Eshitsubo shino shishialiho olwa abandi bakholwa abesaaliisi tawe.

²¹Nebutswa Yesu yakholwa omwisaaliisi munjila eyeshitsubo olwa Nyasaye yamuboolela mbu, “Omwami amalile okhwitsuuba ne shialakalukhasia amapaaroke tawe, ‘Iwe olaba omwisaaliisi inziayo.’ ”

²²Kho obwahukhani buno khandi bukholanga Yesu okhuba omusinji okweindakano yindayi okhushilakhwo.

²³Obwahukhani bundi buliho; abesaaliisi bandi abo bali abanji, khandi shibatsiilililangaokhukhola emilimo chiabwe ta, shichila bafwitsanga.

²⁴Nebutswa Yesu khulwa okhubela amenyanga obushia nobushia, obwisaaliisibwe nobweinziayo.

²⁵Khulweshio buli lwosi anyala okhuhonia abo abetsa khu Nyasaye nibabirila khuye, shichila amenyanga ebisoni nebisoni nabasabila khu Nyasaye.

²⁶Kho bulano Yesu niye Omwisaaliisi Omukhongo oukhuhelesinjia ebia khwenya biosi. Nomutakatifu; abulakhwo eshikha shiosi kata obwonooni bwosi muye; yahukhasibwa okhurula khubonooni nende okhuchingulwa ikulu okhubira likulu.

²⁷Shiali shinga abesaaliisi abakhongo bandi abo tawe; shiakhoyele okhuhaana mbelio omusango buli nyanga khulwebionoonobie mana khandi ahaane khulwebionoono ebiabandi tawe. Yahaana omusango mulala, lulala lwenolwo lwonyene khulwa abandu boosi, olwa yehaana omwene khu Nyasaye.

²⁸Amalako ka Musa kahulanga abandu abalali abakwanile ta okhuba abesaaliisi abakhongo. Nebutswa obusuubisie bwa Nyasaye obwahaanwa nende eshitsubo, obwetsa olunyuma lwamalako ako, bwahula Omwanawe, owamala akholwe omulamba inziayo.