Read wanga ABAHEBURANIA 8 Bible Online

ABAHEBURANIA 8 - wanga bible

ABAHEBURANIA 8

¹Likhongo mukakhuboolanga lili mbu, khuli nende Omwisaaliisi Omukhongo owikhalanga khu mukhono musaatsa okweshifumbi eshioburuchi obwa Nyasaye mwikulu.

²Akhalabananga shinga Omwisaaliisi Omukhongo habundu ahali Hatakatifu okhushila, nilio liheema liene liatoto elilombakhwa nabandu ta, habula nende Omwami.

³Buli omwisaaliisi omukhulundu yemekhungwa okhuhaana ebihaanwa nende emisango chiebiayo khu Nyasaye. Omwisaaliisi wefwe Omukhongo yesi okhuula naye abe nende eshia ahaana khu Nyasaye.

⁴Niyakhabele khushialo, shiyakhabele Omwisaaliisi kata nahatuutu tawe, shichila baliho abesaaliisi abahaananga ebihaanwa ebienyekhanga okhulondana namalako aka eshiyahudi.

⁵Emilimo echia bakholanga shinga abesaaliisi chili butswa toto eshifwanani khandi eshinini eshia akali mwikulu. Kali butswa shinga olwa kali khu Musa. Olwa Musa yali nali ahambi okhumbakha liheema elie Indakano, Nyasaye yamuboolela ari, “Olole mbu okasiye buli shiashindu mumela eya ndakhumanyia khushikulu.”

⁶Nebutswa bulano, Yesu ahelesibwe emilimo echiobwisaaliisi echili emikhongo okhushila echiabwe, shinga olwa Indakano eyayakaasia hakari owa Nyasaye nende abandube yili indayi okhushila, shichila yirulanga khubusuubisie obwebindu ebilayi okhushila.

⁷Kalaba mbu eshindu eshibi shishiali mu Indakano eyokhuranga ta, eyakhabili shiyakhenyeshe tawe.

⁸Nebutswa Nyasaye yanyoola amabi mubandube olwa aboolanga mbu, “Tsinyanga tsitsanga, olwa ndakhakasie Indakano imbia nende abandu ba Isiraeli nende abandu ba Yuda.

⁹Shiyakhabe shinga Indakano eyandakaasia nende ebisoni biabwe khunyanga eya ndabatila omukhono nibemilila okhurula Misiri tawe. Shibali abasuubilwa khu Indakano eyandakaasia ninabo tawe, kho kachila nindabateeba tawe.”

¹⁰Bulano Omwami aboola ari; “Ino niyo Indakano eyandalakaasia nende abandu Abaisiraeli munyanga tsitsanga. Ndakhare amalako kanje mumayililisio kabwe nekahandika mumioyo chiabwe. Ndalaba Nyasaye wabwe nabo balaba abandu banje.

¹¹Shialiho kata mulala khubo ouliechesia owashie owomushialoshie noho kata owashie owomuluyialwe mbu, ‘Fuchilila Omwami’ tawe, shichila boosi bakhamanye isie okhurula khumutiti okhuula khumukhongo.

¹²Ndakhababeele obwonooni bwabwe mana shindakhetsulilekhwo amabi kabwe khandi tawe.”

¹³Olwa Nyasaye aboolanga khuke Indakano imbia, akholile Indakano eyambeli okhuba ikhulu; ne buli shiashindu eshikofuule nishiwelela shibetsanga nishili ahambi okhuhwaho.