Read wanga ABAHEBURANIA 9 Bible Online

ABAHEBURANIA 9 - wanga bible

ABAHEBURANIA 9

¹Indakano eyambeli, yali namalako akokhwinamila Nyasaye nende habundu ahakasibwa nomundu ahokhumwinamila.

²Liheema liasimikhwa, ne mushikoro shialio eshielwanyi eshialinjimwo eshichibi shietsitaha nende imeesa, nemikaate echia omwisaaliisi yahananga khu Nyasaye, habwenaho halangungwa mbu, Habundu Hatakatifu.

³Inyuma weingubo yishinga eyakhabili eyo, lialinjiho liheema elialangungwa mbu, Habundu Hatakatifu muno.

⁴Mubwene omwo, shialimwo eshimalilo shiemisango shieitsahabu eshiokhusambilakhwo obubane, nende lisanduku lieindakano, eliafuumwa tsimbeka tsiosi neyitsahabu nililimwo inyungu yeitsahabu eyalimwo imana, nende indabushi ya Haroni eyasebukhakhwo amasafu, nende amachina kabili amatiiti akahandikwakhwo amalako.

⁵Ikulu welisanduku elo bialikhwo ebilonje bibili ebietsimbaha ebialolesinjia okhubaho khwa Nyasaye, netsimbaha tsiabio nitsibambushe okhuula ahebionoono bialeshelungwa. Nebutswa bulano shishili eshise shiokhwinoosia buli shindu mubwitsulu tawe. .

⁶Ebindu ebio biali nibiarechekhwa biri; abesaaliisi batsitsanga mwiheema elielwanyi buli nyanga okhukhola emilimo chiabwe,

⁷Nebutswa Omwisaaliisi Omukhongo yenyene niye owenjilanga mwiheema eliomukari elo, ne yakholanga ario lulala lwonyene khumuyika. Yatsitsangamwo nachinjile amalasile akeisolo yitisilwe akayahaananga khu Nyasaye khululwe omwene nende khulwebionoono ebiabandu bali nibakhola nibalamanyile mbu bonoonanga tawe.

⁸Roho Omutakatifu akhwechesinjia habulafu okhurula khubulosie buno mbu, olwa liheema elielwanyi lishiliho lishisinjiile, injila eyokhwinjila Habundu Hatakatifu muno yishili okhwikukha.

⁹Shino neshilolelo shichoomanga khubise biabulano. Kano koosi kamanyinjia mbu ebihaanwa ebio nende emisango echiebiayo echio echiahaanungwa khu Nyasaye shibinyala okhukhola omwoyo kwomundu winamila Nyasaye okhuba omulamba tawe,

¹⁰shichila bichoomanga khubiokhulia nende ebiokhunywa bionyene nende emilukha echiahukhane echiokhwisiiya. Kano koosi namalako akelwanyi ewomubili butswa, akaliho okhuula khushise shia Nyasaye alikaasia lilako liyia.

¹¹Nebutswa Kristo yamala okhwitsa shinga Omwisaaliisi Omukhongo owebindu ebilayi ebiamala okhwitsa. Liheema liakhalabanilangamwo nelikhoongo okhushila, khandi nelilamba okhushilakhwo; shilili liheema eliakasibwa nomundu ta, nikhwo okhuboola mbu, shililikhwo eliomushialo shino tawe.

¹²Ne olwa Kristo yabirila mwiheema elo, ne niyenjila Habundu Hatakatifu muno lulala lwene olwo lwonyene, shiyatsiamwo namalasile aketsimbusi nende aketsihunwa okhuhaana shinga omusango tawe, habula, yabukula amabangake omwene mana nakhunyoolela ifwe obuhonia obweinziayo.

¹³Amalasile aketsimbusi nende etsihunwa nende amakoshe akeshimosi shisambilwe biamitsungwa khubandu abalinji nibonoonele. Kano kabakholanga okhuba abasiiyikhu khulwakhurusia obushiamu bwabwe.

¹⁴Ne olwa kano kali akatieli, nako amabanga aka Kristo kanyala okhusiiya obushiamu buhela burie! Okhubirira mu Rohowe oweinziayo yehaana omwene shinga omusango omulamba khu Nyasaye. Amabangake nako kalasiiya amayililisio kefwe akomukari okhukhurusia khumilukha echibula obukhala, kho mbu khumukhalabanile Nyasaye ouliho mwoyo.

¹⁵Khulweshio Kristo niye wanjila oukasinjia Indakano imbia, mbu abo abalangwa nende Nyasaye babe abanyala okhunyoola tsikhabi etsieinziayo etsia Nyasaye yasuubisia. Kano kanyala okhwikholekha shichila okhufwa khwabeleho okhwakholile abandu okhuba abalekhuule okhurula mumabi akabakhola olwa indakano eyambeli yali niyishiliho.

¹⁶Ne mumakhuwa akeindakano eyobulaame okhuula kamanyishe mbu omundu owachikaasia amalile okhufwa,

¹⁷shichila obulaame shibwakhaba neshifune shiosi lwomundu owabusubisia oyo ashili omulamu tawe; indakano eyo yinyala okhukhola emilimo olunyuma lwomundu oyo okhufwa.

¹⁸Khulweshio kata indakano yambeli yatinyisibwa khulwa amalasile.

¹⁹Okhuba olwa Musa yali namalile okhurumbulila abandu amalachilisio koosi shinga olwa kahandikwa mumalako, yabukula amalasile aketsimbusi nende ketsihunwa, nakatsokaasia nende amaatsi, ne nakamiitsa khushitabu eshiamalako nende khubandu boosi, niyekhoonyelanga eshiangwe nende obusi obwakhanyu.

²⁰Ne naboola ari, “Kano niko amalasile akatinyisinjia indakano eya Nyasaye yamulachilisia okhuchihulila.”

²¹Munjila ndala eyo Musa yamiitsa amalasile khwiheema elia Indakano nende khubindu biosi ebiekhonyelungwa okhwinamila Nyasaye.

²²Toto mwene okhulondana namalako ahambi buli shiashindu shisiyungwa nende amalasile khandi Nyasaye aleshelanga obwonooni khulwa okhwebeena khwa amabanga.

²³Khulweshio ebindu, ebili ebifwanani khu biomwikulu okhuula bisiiwe birio. Nebutswa ebiomwikulu biene bienyekha bibe nende emisango emilayi okhushilakhwo.

²⁴Shichila Kristo shiyatsia Habundu Hatakatifu ahalongwa nomundu khandi ahafwanana butswa nende aha toto tawe. Habula yenjila mwikulu bwene aha bulano alolekhanga imbeli wa Nyasaye khulwefwe.

²⁵Omwisaaliisi Omukhongo owomundakano ikhulu, yatsitsanga Habundu Hatakatifu muno lulala buli khumuyika nachinjile amalasichie akebiayo. Nebutswa Kristo shiyatsiamwo okhwihaana omwene akhanji tawe;

²⁶shichila nikakhabele kario, yakhasalilenje ario akhanji okhurula khukhulongwa okhweshialo. Nebutswa bulano lwobumalilishi obweshise shino buli ahambi, yalolekha lulala lwenolwo lwonyene, okhurusia obwonooni okhubirira mumusango okwokhwihaanakhwe omwene.

²⁷Buli shiamundu okhuula afwe lulala, mana olunyuma lwokhufwa ayaasibwe nende Nyasaye.

²⁸Munjila ndala yene eyo, Kristo yesi khandi yahaanwa mumusango lulala okhurusia obwonooni ebiabanji. Yakhaloleshe khandi olwakhabili, ne shialilolekha khulwa okhurusia obwonooni khandi ta, habula khulwa okhuhonia abo abalindililanga okhwitsakhwe.