Read wanga YAKOBO 1 Bible Online

YAKOBO 1 - wanga bible

YAKOBO 1

¹Eyirula khwisie Yakobo, omukholi owa Nyasaye khandi owa Omwami Yesu Kristo, Amashesio khubandu ba Nyasaye boosi abasalaana mushialo shiosi.

²Abaana befwe sangale muno olwa munyolanga obutemwi obwetsimbia tsiosi etsiahukhane obwitsanga khwinywe.

³Mumanyile mbu obutemwi bwobusuubili bwenywe bwibulanga obusimbilo.

⁴Muleshe obwisumilisi bwenywe obwo bumwimilile elala nimulakwa tawe, mbu mube habwene khandi abalamba nimulaleema mwikhuwa liosi tawe.

⁵Nebutswa oundi yesi khwinywe niyakhabula obuchesi, kho amusabe Nyasaye okhumuhelesia; shichila Nyasaye ahaanilanga boosi mukhuchama butswa khandi munjila yobukoosia.

⁶Nebutswa olwa musaaya, musuubile ne mulakanakania ta. Oukanakaninjia afwanana nende amarunda akomunyanza akarundwa nikaboyongoyibwa nomuyeka.

⁷Omundu shinga oyo noulanyala okhukhalaka mumwoyokwe khandi oulali nelichoomo khukosi akakhola ta,

⁸alapaarakhwo mbu yakhanyoola eshindu shiosi okhurula khu Omwami tawe.

⁹Omukristo ouli omumanani yekhoye olwa Nyasaye aba namuchinguula.

¹⁰Naye Omukristo omuyinda yekhoye olwa Nyasaye amututuyia. Shichila omuyinda yetsa okhukhamulukha shinga eshimuli eshiomwiswa.

¹¹Eliuba lifindanga oluya lwalio oluyiile pia mana lusamba eshirache. Ebimuli biashio bibungulukhanga obulayi obwelikondo liabio bukhamulukha. Nolwa omuyinda yesi alakhamulukha ario olwa aba nalondachilila okhukhola akeke omwene.

¹²Noweikhabi omundu owifwilanga amarechekho, shichila olwa aba nahulile amateemo alanyoola eshimwata shiobulamu obwa Nyasaye yalaka boosi abamuheelanga.

¹³Omundu yesi aleshe okhuboola olwa aba nateemwa mbu, “Endeemungwa nende Nyasaye.” Okhuba Nyasaye shianyala okhuteemwa nobubi ta, khandi ye mwene shiateemanga omundu ta.

¹⁴Habula buli omundu ateemungwa olwaba nahombelesibwa mana akhweswa nobwikombibwe omwene obuli obubi.

¹⁵Mana obwikombibwe nibwinjiha, bwibulanga obwonooni. Nabwo obwonooni nibukhulile, bwibulanga okhufwa.

¹⁶Abaana befwe abaheelwa, mulashiamibungwe ta!

¹⁷Buli eshihaanwa eshilayi shiosi nende omukabo kwosi omulamba birulanga mwikulu khu Nyasaye; ouli niye omulonji wemibasu chiomwikulu oubulakhwo obukalukhani bwosi muye ta, kata okhushukhanakhwe shikhurelakhwo eshilima tawe.

¹⁸Khulwa okhwenyakhwe omwene yakhwibula nelikhuwa eliobwatielibwe, mbu khube shinga abarongole[1] mubwikhalo obweimbeli mubilonjebie biosi.

¹⁹Abaana befwe abaheelwa, mwitsulile amakhuwa kano! Buli mundu abe omwangu okhuhulila, habula ashindenje okhuboola, khandi ashindenje okhutiilwa noburuma.

²⁰Oburuma obwomundu nabwo shibunyala okhuusia obulunjishi bwelichoomo lia Nyasaye tawe.

²¹Kho mwinabule omwima kwosi okwobwilaasi nende injenda yosi yimbi. Mwihaane khu Nyasaye nende okhufuchilila likhuwa liaraakanga mumioyo chienywe, elinyala okhumuhonia.

²²Mulekatinjia abeene khulwa okhuhulila likhuwa butswa ta; habula mulire mubikhole.

²³Okhuba omundu yesi ouhulila likhuwa ne nalalira mubikhole ta, ali shinga omundu owihenga obulayi bwobwenibwe mushilolelo.

²⁴Abukula obise bihelile okhwihenga likondolie, ne olwa arulaho, yebilila bwangu shinga lwobwenibwe bufwana.

²⁵Nebutswa ulia ouhenjelesia mwilako eliahabwene elikholanga abandu okhuba abalekhuule, outsililanga okhulihulila ne khandi nalira mubikhole, Nyasaye alamuhelesia ikhabi muliosi liakhola.

²⁶Ne omundu yesi owipaarangakhwo mbu noweyidiini ne nalalinda olulimilwe ta, yekatinjia omwene ne idiiniye neyabutswa.

²⁷Idiini eyili inzeleleshe khandi eyibula eshifwabwi imbeli wa Nyasaye Sefwe niyo okhukhoonya abaana ababisandu nende abakhasi abalekhwa mubunyakhani bwabwe nende okhwilinda okhurula khushifwabwi shiomushialo muno.