Read wanga YAKOBO 2 Bible Online

YAKOBO 2 - wanga bible

YAKOBO 2

¹Abaana befwe shinga abasuubili mu Omwami wefwe Yesu Kristo, mulahukhasia abayinda nabamanani tawe.

²Omundu omuyinda niyefwalile ingaka yeitsahabu, netsingubo tsindorotoro niyakhenjila mumukhung'ano kwenywe, naye omumanani niyefwalile tsingubo tsiamatasi yesi khandi niyenjilamwo;

³nenywe nimwakhamuhelesia oluyali olunji owifwalile obulayi oyo mana nimumuboolela mbu, “Iwe ikhala halayi hano,” nebutswa nimumuboolela omumanani oyo mbu, “Iwe sinjila otsia halia, noho mbu ikhala hano mubwelu,”

⁴habwenaho muba nimuli nende ebiela ebiokhurera obwahukhani hakari wenywe abeene nende obukhalachi bwenywe bwamapaaro kobwonooni.

⁵Rechelesie, abaana befwe abaheelwa! Nyasaye yalobola abamanani abokhushialo shino okhuba abayinda mubusuubili nende okhunyoola obwami obwayasuubisia abo abamuheelanga.

⁶Nebutswa inywe mufwolanga abamanani. Ne nibena abamusakaninjia inywe nibamwinjilila itookho nibamuyila khubayaasi? Shibali abayinda abo!

⁷Shibaliabo abanyekanga eliira lilayi lia mwahesibwa?

⁸Mulaba nimukholanga akali akahabwene nimuba nimulonda lilako liobwami elinyoolekhanga mu Amahandiko mbu, “Heelanga owashio shinga wiheelanga omwene.”

⁹Nebutswa nimuba nebiela[2] khu abandu khulwa okhulolekha khwabwe okhwelwanyi, muba mukhola obwonooni. Ne lilako limukhalachilanga eshiina shinga abafunachi abamalako.

¹⁰Owisichirala mwilako elala, ali neshikha eshiokhufunaka amalako koosi.

¹¹Mulala oyo owaboola mbu, “Shiolaheyanga ta,” niye khandi owaboola mbu, “Shioleranga omundu tawe.” Kho kata nikaba mbu shiolaheyanga ta, nebutswa wiranga abandu, kho ofunakanga amalako.

¹²Kho muboole, nimukhola shinga abandu aba Nyasaye alikhalachila eshiina okhulondana nende lilako likhuhelesinjia obulekhule.

¹³Shichila Nyasaye shialiba netsimbabasi olwa aliba nakhalachila omundu eshiina oubula tsimbabasi tawe. Habula tsimbabasi tsihulanga obukhalachi.

¹⁴Abaana befwe nibukhala shiina omundu niyakhaboola mbu, ali nobusuubili nebikholebie shibimanyiinjia akobusuubilibwe ta? Obusuubilibwe bwakhamuhonia noho?

¹⁵Nikakhaba mbu baliho abaana befwe abasiani noho abakhaana abenya tsingubo khandi nibaleema ebiokhulia ebiabakhalia;

¹⁶kakhaba akobukhala shiina iwe niwakhababoolela mbu, “Mutsie nomulembe, mutundume nimwikura,” ne nolabahelesia ebiabatambanga mubulamu bwabwe ta?

¹⁷Kho obusuubili nabwo buli burio; nibuba nibubula ebikhole nobufu.

¹⁸Nebutswa oundi alaboola ari, “Omundu mulala ali nobusuubili, noundi ali nebikhole.” Likalusio lianje lili mbu, “Manyiakhwo shinga omundu anyala okhuba nobusuubili obulali nebikhole. Isie ndalakhumanyilia obusuubili bwanje mubikhole bianje.”

¹⁹Iwe osuubilanga mbu Nyasaye nimulala? Habwene! Ebishieno khandi biosi bisuubilanga birio nibitechelela muburi.

²⁰Iwe omusilu! Wenya omanyibwe mbu obusuubili obubula nebikhole nobufu?

²¹Kuka wefwe Aburahamu yekhola arie okhuba omulunjishi imbeli owa Nyasaye? Biali ebikholebie nibio ebiachila, olwa yarusia omwana wuwe Isaka okhumuhana shinga omusango khushimalilo shiemisango.

²²Onyala okhulola mbu obusuubilibwe nende ebikholebie biakholela halala; nikachila obusuubilibwe nibukholwa obulamba okhubirira mubikhole bibie.

²³Ne Amahandiko kali habwene olwa kaboolanga mbu, “Aburahamu yasuubila Nyasaye, ne khulwa obusuubilibwe, Nyasaye yamufuchilila shinga omulunjishi.” Kho Aburahamu yalangwa mbu omwitsa wa Nyasaye.

²⁴Lola mbu omundu akholungwa omulunjishi khulwa ebikholebie, ne shikhuli khulwa obusuubili bwonyene ta.

²⁵Kali butswa malala ako nende Rahabu omutamba oyo. Nyasaye yamukhola okhuba omulunjishi okhubirira mubikholebie, olwa yenjisia Abaisiraeli abarunilisi abo mana khandi nabakhonya okhurulila khunjila yindi nibahonokokha.

²⁶Kho shinga omubili kubulamwo omwoyo nomufu, khandi obusuubili obulali nebikhole nobufu.