Read wanga YAKOBO 3 Bible Online

YAKOBO 3 - wanga bible

YAKOBO 3

¹Abaana befwe, abanji khwinywe mulaba abeechesia tawe. Shinga olwa mumanyile, ifwe abeechesia khwakhakhalachilwe eshiina eshitinyu okhushilakhwo abandi.

²Ifwe fwesi khukholanga amabi. Nebutswa naba naliho omundu oulakholangakhwo amabi mukhuboolakhwe ta, omwenoyo nomweleleshe khandi anyala okhwiruka omubilikwe kwosi.

³Khuretsanga amahana muminwa chietsifarasi kho mbu tsikhuhulile, mana khutsikhola okhutsia hosi hosi aha khwenya mbu tsitsie.

⁴Hengakhwo tsimeli: kata olwa tsili tsikhongo tsirio khandi nitsiyilungwa nende emiyeka chiamaani, tsinyala okhushiukhasibwa nende eshilunjisio eshitutu muno, ne nitsichoomanga aha abatsiyilanga benya mbu tsitsie.

⁵Kho kali kario nolulimi: kata olwa luli eshiungo eshitiiti, nolunyala okhwichinjimisia niluboola khumakhuwa amakhongo muno. Parakhwo butswa shinga omutsuru omukali kunyala okhuhafibwa omulilo okhurula khukhatsesele khatiti butswa.

⁶Ne olulimi lufwana shinga omulilo, luli butswa shinga eshialo eshietsulamwo amabi, oluli mubwikhalo bwalwo mumibili chiefwe khandi olusalasinjia obubi mumubili chiefwe chiosi. Luhafinjia omulilo mubulamu bwefwe bwosi nende omulilo kwitsanga khulwo okhurula mukehena bwene.

⁷Omundu anyala okhuruka kata ebilonje bindi biosi, tsisolo nabulimo nende amanyonyi, netsinzokha nende tsinyeni.

⁸Nebutswa abulaho kata mulala owarukakhwo olulimi ta. Nolwobwonooni khandi olulanyala okhurukwa ta. Luli shinga obufwisi bwiranga.

⁹Khulwikhoonyelanga okhupila Omwami Sefwe orio, khandi khulwikhoonyela okhulama abandu eshilaamo abalongwa mwikondo lia Nyasaye.

¹⁰Okhurula khululimi lulala olwo kalangamwo amakhuwa aketsikhabi nende akeshilaamo. Abaana befwe, kano shikakhoyele okhwikholekha tawe!

¹¹E! Isebele ndala yakhanyala okhurusia amaatsi ameleleshe nende amatubukhu mumoni ndala yene eyo?

¹²Abaana befwe omukhuyu shikunyala okhwama tsiseyituni tawe, kata omutsabibu shikunyala okhwama amakhuyu ta, noho kata isebele eyamaatsi amatubukhu okhurusia amaatsi ameleleshe tawe.

¹³Alikhwoho yesi mwinywe ouli omuchesi khandi omurecherefu? Okhuula amanyie khulwa okhumenya obulamu obulayi, nende khulwebikholebie ebikholelwa mubuholo nende mubuchesi.

¹⁴Nebutswa nikaba mumioyo chienywe muli neshikhalikhali, nobululu, nobuyingani nende okhwiyenyela mulonoonela obwatoto khulwa okhwiyitsoomia mubuchesi bwenywe tawe.

¹⁵Obuchesi shinga obwo shiburulanga mwikulu tawe; nobwomushialo shino, shibuli kata obweshiroho tawe, khandi nobwebishieno.

¹⁶Aha imbalikha nende okhwiyenyela bili, obusoolo nende ebikhole biosi ebimayanu biliho.

¹⁷Nebutswa olwambeli, obuchesi oburula ikulu nobweleleshe; khandi nobwomulembe, nobuholo, bwetsula eshisa khandi bwamanga ebiamo ebiebikhole ebilayi; bubulamwo obwichinjimisi kata obwikati nobubatsa bwosi tawe.

¹⁸Ne ebiamo biobulunjishi birachilwa mumulembe nende abo abareeranga omulembe.