Read wanga YAKOBO 4 Bible Online

YAKOBO 4 - wanga bible

YAKOBO 4

¹Obulwani buno bwosi nende obusoolo mwinywe birulanga hena? Birulanga mubwikombi bwenywe obubi obureranga obulwani mwinywe buli eshise.

²Mwikombanga ebindu, nebutswa shimunyala okhubinyoola tawe, mana bimukhola okhwira; mwikombanga ebindu ne khulwa mbu shimunyala okhubinyoola ta muchaka obusoolo nende okhulwana. Shimuli nende ebiamwenyanga tawe shichila shimusabanga Nyasaye okhumuhelesia ta.

³Ne olwa musaba, shimunyolanga ta, shichila amapaaro kenywe namabi; musabanga ebiamwenya okhukholela emienya chienywe abeene.

⁴Inywe abandu abalali abasuubilwa tawe! Shimumanyile mbu okhuba omwitsa oweshialo nokhuba omusuku owa Nyasaye ta? Owenya okhuba omwitsa oweshialo yekholanga omwene omusuku owa Nyasaye.

⁵Shimulakaale mbu obwatoto bubula mu Amahandiko akaboolanga mbu, “Omwoyo okwa Nyasaye yara mwifwe toto kukhuhendelanga tawe.”

⁶Nebutswa obukoosia obwa Nyasaye ahaananga buli namani okhushilakhwo. Shinga Amahandiko kaboolanga mbu, “Nyasaye afukulanga abechinjimisiane, nabakoosia bukoosia abongoli.”

⁷Khulweshio mwihaane abeene khu Nyasaye mumufukule Setani, naye alamurulakhwo.

⁸Sitenje ahambi nende Nyasaye naye aletsa ahambi khwinywe. Inywe abonooni, mulafie emikhono chienywe! Inywe abekaati, musiiye emioyo chienywe!

⁹Mubelele, nimulila, nende okhwikhuula; obusangaali bwenywe bukwe eshibeela!

¹⁰Mwitutuyie abeene imbeli owa Omwami, naye alamuchinguula.

¹¹Baana befwe, mulafukulanenje abeene khu beene tawe. Yesi oufukula Omukristo washie noho okhumukhalachila eshiina, afukulanga amalako nakakhalachila eshiina. Niwakhakhalachila amalako eshiina, kho shioba noshili ouhulilanga amalako ako ta, habula oyo oukakhalachilanga eshiina.

¹²Nyasaye yenyene niye omuhaani wamalako khandi omukhalachi oweshiina. Niye yenyene ounyala okhuhonia nende okhumulula. Iwe opaaranga mbu niwe wina oukhalachila owashio eshiina?

¹³ Bulano mumbulile isie, inywe muboolanga mbu, “Leelo noho kata mutsuli nakhutsie mwitookho lindi, aha nakhumenye omuyika mulala mana khukholeyo obukhala nikhunyoola amapesa amanji.”

¹⁴Ne shimumanyile kata shinga lwobulamu bwenywe bulaba mutsuli tawe! Mufwana butswa ling'ong'ong'we, elilolekha hatutu butswa mana likhamulukha.

¹⁵Akamukhoyeele okhuboola ngakano: “Omwami naba niyakhachama, khwakhamenye khukhole kano noho ako.”

¹⁶Nebutswa bulano mwiyitsialanga, nimwiyitsoomia; okhwiyitsoomia khweimbia eyo nobwonooni.

¹⁷Oumanyile akahabwene, ne nakhaywa okhukakhola, omundu oyo yonoonanga.