Read wanga YAKOBO 5 Bible Online

YAKOBO 5 - wanga bible

YAKOBO 5

¹Ne bulano, inywe abayinda murecheresie akemboola kano! Mulile amasika nimwikhuula khulwa amasila aketsa okhumukwiila inywe!

²Emiandu chienywe chiosi chimalile okhubola, khandi ebifwalo bienywe bimalile okhulibwa namatsilili.

³Itsahabu nende ifetsa yenywe bikhupile tsindebelende[3], ne tsindebelende tsiabio tsilaba oburumbusi obumufukula inywe ne natsio tsilaba shinga omulilo, okwokhusasia emibili chienywe. Ne mwabunjelesiye obuyinda munyanga tsiokhumalilikha tsino.

⁴Mwahanda khumirungo echia abakholanga mumikunda chienywe. Oluyoka olwa abo abamucheselanga lumalile okhuula mumarwi aka Nyasaye, Omwami ounyala biosi.

⁵Obulamu bwenywe khushialo shino bwetsulamwo emienya echia eshialo shino nende okhwisangasia. Mwekhomesia abeene khulwa inyanga yokhusinzwa.

⁶Mukhalakanga eshiina nimwiira abandu babula eshikha, nabo shibamuyinjile ta.

⁷Kho abaana befwe, mwisumilisie okhuula olwa Omwami yetsa. Lole shinga omulimi abetsanga omwisumilisi olwa alindililanga ebiamo ebikoosi okhurula mumukundakwe. Yesumilisinjia ario okhuula olwa ifula eyeirotso nende eyeshiubwe olwa yiba niyimalile okhukwa.

⁸Nenywe mwesi khandi okhuula mwisumilisie murio nimulafwa emioyo tawe. Shichila inyanga eyokhwitsa okhwa Omwami yili ahambi.

⁹Baana befwe mulabuuluulanilenje abeene khu beene tawe, kho mbu Nyasaye naye aleshe okhumukhalachila eshiina. Omukhalachi oweshiina mwene ali ahambi okhulolekha.

¹⁰Baana befwe, mwitsulile abalakusi baboola amakhuwa muliira elia Omwami. Babe eshilolelo mubwisumilisi bwokhwifwila nibali mubusalili.

¹¹Khubalanganga okhuba, abeikhabi shichila befwiila. Mwahulila akobwisumilisi bwa Ayubu, mana mumanyile shinga olwa Nyasaye yamala namukholela mukhumalilikha. Okhuba Omwami yetsulamwo tsimbabasi nende eshisa.

¹²Ne okhushila ako koosi, baana befwe, muletsubanga olwa muba nimuhaana indakano yenywe tawe. Kata muletsube khulwelikulu noho khulwa Eshialo noho khushindu shiosi shiosi tawe. Muboolenje butswa mbu “He” olwa mufuchilila, ne mbu “Tawe” olwa muba nimukaana, mana kho Nyasaye aleshe okhumukhalachila eshiina.

¹³Aliho yesi mwinywe ouli mumanyakhano? Okhuula asaaye. Aliho yesi omusangafu? Okhuula yembe tsinyimbo etsitsoomia Nyasaye.

¹⁴Aliho yesi mwinywe ouli omulwale? Okhuula alanje abakhulundu belikanisa, nabo bamusaayile mbu Nyasaye amuhonie nibamubakha amafura muliira elia Omwami.

¹⁵Obusaayi obwo bwobusuubili bulahonia omulwale. Omwami alamubuusia, mana aleshelwe bionoono ebiaba niyakhola.

¹⁶Kho mwiyamilane obwonooni bienywe abeene khu beene nimusaayilana mbu mube abahonibwa, okhuba obusaayi bwomulunjishi buli nobunyali obukhongo okhushila.

¹⁷Eliya yali butswa omundu owoburulanda shinga ifwe khuli. Yasaaya neshinani muno mbu ifula ileshe okhubaho, mana ifula niyibira khulwemiyika chitaru nende emiesi chisasaba.

¹⁸Mana nasaaya khandi, ne likulu nilireela ifula mana eshialo nashio nishimela ebiamo biashio.

¹⁹Baana befwe, omundu yesi khwinywe naba nashiama narula khubwatieli, ne owashie undi yesi namukalusia khunjila,

²⁰mwitsulile mbu: Ouba nakalusia omwonooni okhurula khunjila ishiamu oyo abahoniye omwoyo kwomwonooni oyo, okhurula mukhufwa mana narera obuleshelwi bwebionoono ebinji.