Read wanga 1 PETERO 1 Bible Online

1 PETERO 1 - wanga bible

1 PETERO 1

¹Isie Petero, ouli omurume wa Yesu Kristo, emuhandichila inywe abali abalobole ba Nyasaye, abahuyibwa nibasalana mutsingongo etsia Ponto, Egalatia, Ekapadokia, Asia, nende Ebitsinia.

²Mwalobolwa okhulondana nende okhwenya khwa Nyasaye Sefwe mana Rohowe namukhola inywe okhuba abandu abatakatifu, mbu mube abahulila Yesu Kristo mana musiiywe namabangake. Mube nibukosia nende omulembe mubunji.

³Khwitsoomie Nyasaye, wefwe ouli Samwana Omwami wefwe Yesu Kristo! Shichila khulwa obunji bwetsimbabasitsie yakhuhelesia obulamu obuyia khulwa okhumulamusia Yesu Kristo okhurula mubafu. Kano kakhwitsusinjiamwo obunaayi obuli obulamu.

⁴Kho khulindililanga okhunyoola obuyinda bwetsikhabi etsia Nyasaye yabishila abandube. Nyasaye yamubishila tsikhabi tsino mwikulu, ewa tsilanyala okhubola noho okhusasikha kata okhuhwa tawe.

⁵Tsikhabi tsino netsieneyu inywe, abalindungwa obulayi mubusuubili khulwa obunyali bwa Nyasaye okhurula khubuhonibwi oburechekhwe okhufwimbulwa khundukho eyeshihesi.

⁶Mutsaatsahale khulwa amakhuwa ako, kata nikaba mbu bulano mulabelela hatutu mubutemwi obwetsimbia etsiahukhane.

⁷Eshifune shiobutemwi bwenywe nokhumanyia mbu obusuubili bwenywe nobwatoto. Kata yitsahabu eyinyala okhusasibwa, yisambungwa khumulilo kho mbu inzeleleshe yirulemwo, kho obusuubili bwenywe obuli bweinganga okhushila yitsahabu buteemungwa namatinyu kamunyolanga. Ne okhubirira mumatinyu ako, Nyasaye alimuhelesia ifuma indayi obukhulundu nende oluyali khunyanga eya Yesu Kristo yakhakalushe.

⁸Mumuheelanga kata olwa mushili okhumulolakhwo ta, khandi mumusubilanga kata olwa mulamulolanga bulano tawe. Kho mwikhoyanga nende omwikhoyo omukhongo khandi okwoluyali okwa amakhuwa kabutswa kalanyala okhwinoosia tawe.

⁹Shichila munyolanga obuhonia obwemioyo chienywe, obuli eshifune eshiobusuubili bwenywe mu Kristo.

¹⁰Kali khulwa okhulondokhana nobuhonia buno, obwachila abalakusi nibakhabilisia obulayi, nibarebelesia, khandi nibalakula akeshihaanwa eshia Nyasaye alimuhelesia inywe.

¹¹Bateema okhukhabilisia okhumanya olwebise biatsana biakhoole, khandi shinga olwa biliba. Ne biakheetse birie. Bino nibio ebise ebia Roho wa Kristo owali mubalakusi yamanyinjia, mukhurumbulila imbeli akokhusalila khwa Kristo aliba niyefwilamwo nende oluyali lulilonda khukhwifwila okhwo.

¹²Nyasaye yafwimbulila abalakusi abo bamanye mbu emilimo chiabwe shichiali echiobukhala khubo abeene ta, nebutswa khwinywe, shinga olwa baboola akamakhuwa ako akamumalile bulano okhuhulila okhurula khubarume abayaala Amakhuwa Amalayi khulwobunyali bwa Roho Omutakatifu owarumwa okhurula mwikulu. Amakhuwa ako naka kata abamalaika bakhekoomba okhukamanyilisiakhwo.

¹³Khulweshio, mwirecheshe abeene khulwebikhole. Mube meeso nimunaayila elala khuikhabi eyobuhonia eya mulihelesibwa olwa Yesu Kristo alikalukha.

¹⁴Muhulile Nyasaye, ne mulafuchilile okhulonda obwikombi obwa mwali ninabwo nimushili okhuba abakristo ta.

¹⁵Habula mube abatakatifu mukosi akamukhola, butswa shinga olwa Nyasaye owamulanga inywe ali omutakatifu,

¹⁶okhubela Amahandiko kaboolanga, Nyasaye yaboola mbu, “Mube abatakatifu shichila Isie endi omutakatifu.”

¹⁷Olwa musaaya khu Nyasaye mumulanganga mbu Sefwe, ouyasinjia abandu boosi ahalali ebiela biosi ta, okhulondana khubikhole ebiabuli shiamulala aba nakholile; khulwako, mumalilisie ebise biobulamu bwenywe ebisikalanga khushialo khuno nimwichendelesia obulayi mukhuria Nyasaye.

¹⁸Mumanyile obulayi bwene eshiarungwa kho nimuba abalekhuule okhurula khu ebiima bienywe ebikhaya ebia mwanyoola okhurula khubakuuka benywe. Shishiali eshindu eshinyala okhusasikha, shinga yitsahabu noho ifetsa ta;

¹⁹habula mwakholwa abalekhuule khulwa omusango okwobukusi obukhongo muno okwa Kristo, owali shinga likondi elibula obulema noho obubi bwosi.

²⁰Yali niyahulwa khale nende Nyasaye eshialo nishishili okhulongwa, mana yafwimbulwe khulwenywe mutsinyanga tsiobumalilishi tsino.

²¹Okhubirira mu Kristo inywe musubilanga mu Nyasaye, owalamusia Kristo okhurula mubafu khandi namuhelesia oluyali; kho obusuubili bwenywe nende obunaayi bwenywe bwachooma khu Nyasaye.

²²Ne bulano khulwa okhulonda obwatoto mwisiiyile abeene khandi mumalile okhuba nende obuheeli obwatieli khubasuubili bashienywe; muheelanenje abeene khu beene neshinani shiatoto khandi nomwoyo kwosi.

²³Khole kano shichila Nyasaye yamuhelesiye obulamu obuyia okhubirira muburumebwe obumenyangaho emiyika chiosi.

²⁴Shinga olwa Amahandiko kaboolanga mbu, “Abandu boosi bali shinga obunyasi, ne oluyali lwabe lwosi luli shinga ebimuli ebiomubulimo. Obunyasi bunialanga, nabio ebimuli bibungulukhanga.

²⁵Nebutswa likhuwa elia Omwami nalio limenyangaho emiyika chiosi.” Likhuwa lino nilio Amakhuwa Amalayi akamwarumbulilwa nabarumwa.