Read wanga 1 PETERO 2 Bible Online

1 PETERO 2 - wanga bible

1 PETERO 2

¹Kho mulonoonakhwo munjila yosi ta. Obubeeyi bulabakhwo mwinywe ta, kata obwikati kata imbalikha, kata obumonyani bwosi tawe.

²Mube shinga abaana abatoro abebuulwe, buli lwosi mubetsenje nobuloho bwamabeele ameleleshe akeshiroho, mbu khulwa okhukanywa munyalilwe okhukhula mana muhonibwe,

³Shinga olwa Amahandiko kaboolanga mbu, “Inywe abeene mwanyaliilwe okhumanya shinga olwa Omwami ali oweshisa.”

⁴Yitse khu Mwami, ouli lichina lilamu eliabandu baloba mbu libula inganga, nebutswa eliahulwa nende Nyasaye okhuba elieinganga.

⁵Mwitse khuye shinga amachina amalamu, mana mwikhonyelwe khulwokhumbakha Ihekalu eyeshiroho. Mu Ihekalu omwo nimwo omwa mwitsa okhukhalabananga shinga abesaaliisi abatakatifu nimumala emisango echieshiroho khandi echichamisia Nyasaye okhubirira mu Yesu Kristo.

⁶Okhuba Amahandiko kaboolanga mbu, “Ndahuula lichina elieinganga, Elia eyichikhanga okhuba eliomusinji mukona mu Zayuni; ne omundu yesi ousuubila muye shialafwimbwa omurwe tawe.”

⁷Lichina lino nelieinganga ikhongo khwinywe abasuubila; nebutswa khwabo abalasuubila ta: “Nelichina liabombashi baloba shinga elibula inganga olunyuma liamala libe likhulundu lia koosi.”

⁸Khandi Amahandiko kandi kaboolanga mbu, “Lichina lino nilio elilichila abandu besichirale, olwanda olulichila bakwe.” Besichirala okhubela shibasuubila mwikhuwa ta; okhuba Nyasaye yali niyakhalaka mbu kano kalibekholekhakhwo.

⁹Nebutswa inywe muli oluyia olwahule, abesaaliisi abeshiami, lihanga litakatifu, abandu abali aba Nyasaye omwene, mwahulwa okhurumbula habulafu akamakana ka Nyasaye, oamulanga inywe okhurula mushiilima mwinjisibwe mubulafubwe obwamakana.

¹⁰Mutsinyanga tsindi etsiabira shimwali abandu ba Nyasaye tawe, nebutswa bulano muli abandube; munyanga tsindi shimwamanya tsimbabasi tsia Nyasaye ta, nebutswa bulano mwamalile okhubeelwa tsimbabasi.

¹¹Abetsa banje abaheelwa, inywe shinga olwa muli abacheni khandi abahuyi mushialo muno! Emusaaya mulekhane nende obwikombi bwosi obubi, obulwananga buli lwosi nende emioyo chienywe.

¹²Mube nemima emilayi echikhoyeele hakari owa Abamahanga kho mbu kata nibamuchikha mbu muli abakholi bobubi, balalola ebikhole bienywe ebilayi mana kho bamwitsoomie Nyasaye khunyanga eyokhwitsakhwe.

¹³Khulwa Omwami muhulilenje buli oburuchi bwosi obweshialo: kata nibwakhaba obwa Omuruchi, ouli owobunyali bweikulu khuboosi,

¹⁴noho kata khubakhongo, abalobolwa nomuruchi oyo nibarumwa okhunyasia abakholi bobubi nende okhwitsoomia abakholi bamalayi.

¹⁵Okhuba Nyasaye yenyanga inywe muholelesie obubooli obumayanu obwabandu abasilu khulwa amakhuwa amalayi akamukholanga.

¹⁶Mumenye shinga abandu abalekhuule; ne kata kario mularumishile obulekhule bwenywe okhufunishila obubi bwosi tawe; nebutswa mumenye shinga abasumba ba Nyasaye.

¹⁷Helesinjie abandu boosi oluyali, muheele abasuubili bashienywe, muritsenje Nyasaye, ne nimuhelesia omuruchi oluyali.

¹⁸Inywe abakholi muhulilenje abami benywe noluyali lwosi, shikali butswa muhulilenje abo abali abeshisa nende abaholo bonyene tawe, habula kata abalulu.

¹⁹Nyasaye alimuhelesia tsikhabi khulwa akene kano, nimuba nimwakhesumilisia obutsunwi obwobusandibwi obulakwanile ta, shichila abeene muli nobumanyi mbu kano nakokhwenya khwa Nyasaye.

²⁰Noluyali shiina olwakhabaho nikaba mbu iwe wisumilisia lwokhupwa nende Omwamiwo shichila mbu okholele amashiamu? Nebutswa nimuba nimwisumilisilia obusalili kata olwa muba nimukholile akali habwene, Nyasaye alamuhelesia tsikhabi khukene kano.

²¹Kano niko aka Nyasaye yamulanjila, shichila Kristo omwene yasalila ario khulwenywe mana namuleshela eshilolelo, kho mbu mwesi mube shinga ye.

²²Shiyakhola eshionoono shiosi ta, khandi shiyabeyakhwo omundu yesi ta.

²³Olwa yanyekwa shiyakalusia namanyeko khandi ta; kata olwa yanyakhana, shiyabasiomelakhwo abamunyasia tawe, nebutswa yara obunaayibwe mu Nyasaye, ouli omuyaasi wahabwene.

²⁴Kristo omwene yetukha obwonooni bwefwe mumubilikwe khumusalaba, mbu khuleshe okhwonoona mana khumenye mubulunjishi. Ne nikhulwa okhubambwakhwe khumusalaba okhwachila nimuhonibwa.

²⁵Mwali shinga amakondi akali nikakora yinjila yako, nebutswa bulano mwakalusibwe okhulonda Kristo ouli omwayi khandi omulindi wemioyo chienywe.