Read wanga 1 PETERO 3 Bible Online

1 PETERO 3 - wanga bible

1 PETERO 3

¹Shinga olwa abakholi bahulilanga abami babwe, munjila ndala eyo inywe abakhasi abakristo okhuula muhulilenje abasaatsa benywe; kho mbu balala khubasaatsa abo abalasuubilanga likhuwa lia Nyasaye ta, bakhweswe neyijenda yenywe mana basuubile. Shikali mbu okhuula mubaboolele likhuwa tawe,

²shichila balalola abeene obweleleshe nende obwitembelesi obweinjenda yenywe indayi.

³Mulekhonyele okhwisiaya okhwa omubili khumukhole inywe okhuba abelikondo lilayi ta, kata okhubasa liswi lienywe kata okhwifwala ebimili bieyitsahabu, kata ebifwalo biobukusi tawe.

⁴Habula likoondo lienywe lilayi lirule mukari mwobwatooto bwemioyo chienywe. Likoondo lieimbia yino shilikalukhananga ta, ne Nyasaye alibukulanga okhuba lichoomeshe.

⁵Shichila abakhasi abatakatifu bakhale abara obunaayi bwabwe mu Nyasaye bali nibanala okhwisiaya khulwa okhuhulila abasaatsa babwe.

⁶Sara yesi yali ario; yahulilanga Aburahamu, namulanga mbu omwamiwe. Ne bulano inywe mulaba shinga Sara nimuba nimukhola akali amalayi ne nimularisibwa nelikhuwa liosi tawe.

⁷Munjila ndala yino inywe abasaatsa okhuula mumenye murio halala nabakhasi benywe nobuchesi, mukhumanyilisia mbu amaani akemibili chiabwe namaleemu khukenyu. Mubalinde muluyali, shichila boosi khandi halala ninenywe balinyoola eshihaanwa shia Nyasaye eshiobulamu. Mukhole kano kho mbu likhuwa liosi lileshenje okhwikalila amasaayo kenywe.

⁸Mukhuhelelesia; okhuula mwesi mumenye mubulala, mube neshisa, muheelenje abashienywe shinga abaana benywe, mube neshibelesi khandi nobuholo.

⁹Mulamurunga omundu yesi obubi khububi ta, kata amanyeko khumanyeko ta, habula mubasabile ikhabi, shichila ikhabi niyo eya Nyasaye yasuubisia okhumuhelesia inywe olwa yamulanga.

¹⁰Shinga Amahandiko kaboolanga mbu, “Oyo owenya okhusaangaala mubulamu khandi okhumenya obulamu obulayi okhuula aleshe okhuboola amakhuwa amabi khubashie khandi aleshe obubeeyi.

¹¹Okhuula asile amabi nashukhana okhukhola amalayi; okhuula akhabenje omulembe nomwoyokwe kwosi.

¹²Okhuba Omwami alindanga abo abali abalunjishi khandi arecheresinjia amasaayo kabwe; nebutswa abafukulanga abo abakholanga amabi.”

¹³Niwiina oulamusalisia olwa muba nimuli neshinani okhukhola akali amalayi?

¹⁴Nebutswa nimuba nimunyakhana khulwa okhukhola akali amalunjishi, muba abeikhabi muno! Ne mularie omundu yesi ta, kata okhuhendela liosi ta.

¹⁵Habula muritsenje Kristo mumioyo chienywe, nimumuhelesia oluyali shinga olwa ali Omwami. Ebise biosi mubetsenje nimwerechekha okhukalusia buli shiamundu oumureeba inywe okhumwinoosia eshisina shiobunaayi obuli mwinywe.

¹⁶Nebutswa mukholenje murio mubuholo nende muluyali. Mube obuyilisi obulayi obwomumwoyo obubula eshikha, kho mbu abo abamunyekanga ababoolanga amabi khuinjenda yenywe yindayi shinga abalondi ba Kristo babe abanyala okhufwimbwa omurwe khwako akababoolanga khwinywe.

¹⁷Shichila bwakhaba obulayi muno okhusaalila khulwa okhukhola amalayi, nikaba mbu nokhwenya khwa Nyasaye, okhushila okhusaalila khulwokhukhola amabi.

¹⁸Shichila Kristo yesi yafwa khulwa obwonooni biabandu boosi lulala lwonyene, owali omulunjishi nafwa khulwa abonooni, mbu amwimilile okhutsia khu Nyasaye. Yeerwa omubilikwe, nebutswa nakholwa omulamu muroho.

¹⁹Muroho Kristo yatsia nayaalila tsiroho etsiali mumbohe.

²⁰Tsino tsiali tsiroho etsia abo abakhaya okhuhulila Nyasaye olwa yabalindilila mubwisimilisi munyanga tsia Noa yali niyombokhanga isafinaye. Mu Isafina yatsana eyo bali butswa abandu munane bonyene, abahonelamwo khumaatsi,

²¹akali eshilolelo eshiobubatiisi eshimuhoninjia inywe bulano. Shikhwali butswa okhwosibwa okhwelikhwe eliokhumubili ta, habula obusuubise okhurula khu Nyasaye obwa yahaana okhurula mubumanyi obulayi obwomumwoyo mukari. Niko akamuhoninjia inywe okhubirira mubulamushi bwa Yesu Kristo.

²²Kristo yatsia mwikulu mana ali khumukhono omusaatsa kwa Nyasaye. Abamalaika boosi nende abobunyali abomwikulu bali hasi hobunyalibwe.