Read wanga 1 PETERO 4 Bible Online

1 PETERO 4 - wanga bible

1 PETERO 4

¹Khulwa okhubela Kristo yasalila mumubili khumusalaba, nenywe mwesi mwirecheshe nimuyililisia malala khukenako aka Kristo yali ninako; shichila omundu yesi ousalile omubili aleshile okhukhola obwonooni.

²Okhurula bulano, mumenye obulamu bwenywe khushialo khuno nimwimililwe nelilako lia Nyasaye, nobwikombi bwemibili chienywe tawe.

³Mwamalile ebise ebihela mutsinyanga tsiabira nimukholanga aka Abamahanga bachama okhukhola. Mwamenyile obulamu bwenywe mubwilasi, mubwikombi, mubumesi, mumasabo kobushino obwobwilaasi okhulangushila obunywi, nende okhwinamila ebifwanani ebili bieshisinyo.

⁴Ne bulano Abamahanga bahukanga muno olwa mulasanganga ninabo ta, mubumenyo obwobwilaasi nende obutsalishi bulala obwo; khulweshio bamunyekanga.

⁵Nebutswa okhuula baliboola amakhuwa kabwe khu Nyasaye owerechekha okhuyaasia abalamu nende abafu.

⁶Ne shino nishio eshifune shiachila Injiili niyiyalwa kata khandi khwabo abafwa, kho mbu kata nibayasibwa shinga abandu nabandu banyala okhumenya obulamu bweshiroho shinga Nyasaye.

⁷Obumalilishi bwebindu biosi buli ahambi okhuula, khulweshio mwikhale meeso nimwilinda kho munyalilwe okhusaaya obulayi.

⁸Ne okhushila ako koosi murekhwo omwoyo okhuheelana abeene khu beene, shichila obuheeli bufunikhanga obwonooni ebinji.

⁹Mwinjisaninjie mungo tsienywe abeene khu beene nimulabulula tawe.

¹⁰Buli mundu yanyolile eshihaanwa okhurula khu Nyasaye mushikhonyele obulayi khulwa okhukhoonya abashienywe shinga abalindi abalayi abobukoosia bwa Nyasaye.

¹¹Omundu yesi ouyaala, okhuula ayaale oburume bwa Nyasaye; ne omundu yesi oukhalabana okhuula akhalabane namani aka Nyasaye ahaananga, kho mbu mubindu biosi Nyasaye aheebungwe oluyali okhubirira mu Yesu Kristo, ouli mwene oluyali nende obunyali ebisoni nebisoni. Amina.

¹²Abaheelwa banje, mulahuchisibwa nobululu bwobunyakhani bwamunyolanga okhuba shinga eshindu eshicheni eshimwikholekhangakhwo tawe.

¹³Nebutswa sangale mbu musanjilananga nende Kristo mukhunyakhanakhwe kho mbu mulitsula nomwikhoyo olwa Yesu Kristo alikalukha.

¹⁴Nimuba nimunyekwa khulwa eliira lia Kristo muba abeikhabi, shichila roho woluyali khandi roho wa Nyasaye ali mwinywe.

¹⁵Nebutswa omundu yesi khwinywe alanyasibwa shinga omuyiri, noho omwifi, noho omukholi wamakhuwa amabi noho omundu weindoboyo tawe.

¹⁶Nebutswa nonyakhana mbu shichila oli Omukristo olafimbwa omurwe tawe; nebutswa witsoomie Nyasaye shichila mbu oli omulondi wa Kristo.

¹⁷Ebise bia Nyasaye okhuyaasia abandu biulile, ne alaranjilila okhuyaasia abandube beene. Nikaba Nyasaye alachachila obuyaasibwe khwifwe, kho mukhumalilikha bwitsa okhuba burie khwabo abalasuubilanga Amakhuwa Amalayi akarula khu Nyasaye?

¹⁸Shinga Amahandiko kaboolanga mbu; “Nikaba nikali amatinyu abandu abalunjishi okhuhonibwa; kho nishiina eshiakhekholeshe khwabo abali abonooni abalahulilanga Nyasaye tawe?”

¹⁹Khulweshio leshe abo abanyakhananga, shichila nokhwenya khwa Nyasaye khulwabo, bakhole amakhuwa kobulunjishi khandi bahaane emioyo chiabwe khu Nyasaye ouli omulonji wusinjia aka yasuubisia.