Read wanga 1 PETERO 5 Bible Online

1 PETERO 5 - wanga bible

1 PETERO 5

¹Isie omwene ouli omwimilisi, omuloli khukobunyakhani bwa Kristo khandi oulisanjilana halala muluyali olwitsa okhulolesibwa, esaaya abemilisi belikanisa bali mwinywe mbu mube abaayi abalayi bamakondi ka Nyasaye yamuhelesia.

²Mukaye nomwoyo omulekhuule shinga olwa Nyasaye yenyanga mwaye. Mulakhole butswa khulwo omurungwe tawe, habula muchikhole khulwa okhwenya khwenywe khwatoto khwokhukhalabana.

³Mulateeme okhubaruka nende obululu abo abamwahebwa okhwaya tawe; habula mbu mube ebilolelo ebilayi khwituuli liamakondi elo.

⁴Ne olwa Kristo omwayi omukhulundu mwene alichelela mulihebwa olusimbi lwoluyali lulaniala ta.

⁵Munjila ndala yeneyo inywe ababukha muhulilenje abo abamukhulunduyile. Ne inywe mwesi okhuula mukhalabanilenje abasuubili bashienywe nomwoyo kwobuholo, shichila Amahandiko kaboolanga mbu, “Nyasaye afukulanga abechinjimisi, ne akoosinjia abetutuyia.”

⁶Kho bulano mwitutuyie abeene nimwiira hasi wobunyali bwa Nyasaye okhumulinda, kho mbu Nyasaye omwene alimuchingula mubisebie ebilayi olwabiliula.

⁷Mure obuhendi bwenywe bwosi khu Nyasaye shichila amuhendelanga.

⁸Mwirecheshe nimuba meeso! Omusuku wenywe, Setani achendanga nabotokhana, nahoola shinga italanyi, nakhaaba omundu awayeera.

⁹Muralile mubusuubili bwenywe mana mumufukule, shichila mumanyile mbu abasuubili bashienywe abali mushialo shiosi babirilanga mubunyakhani bulala bwene obwo.

¹⁰Nebutswa olwa muliba nimunyakhanekhwo eshise shituutu, Nyasaye owobukoosia bwosi oumulanganga inywe okhusanga muluyalilwe olwobumeli mu Kristo, omwene alamukhola abalamba namuhelesia oburalilu, amaani, nende omushinji kwatoto.

¹¹Obunyali bube khwiwe ebisoni nebisoni! Amina.

¹²Silivano owendolanga okhuba omwana wefwe Omukristo omusuubilwa yakhonyile okhuhandika ibarwa yinyimbichiti yino. Enzenya okhumutinyilisia inywe khandi okhumurumbulila obuloli bwanje mbu akemuhandichile kano nibwo obukoosia bwatoto bwa Nyasaye. Musimbilenje mubwo buli lwosi.

¹³Abakristo bashienywe beikanisa eyili Ebabiloni[1] boosi khandi abahulwa nende Nyasaye, bamushesiye, kata omwana wanje Mariko yesi amushesiye.

¹⁴Mushiesanie abeene khubeene amashiesio keshikristo khandi akobuheeli. Omulembe kubetsenje ninenywe mwesi abali Abakristo.