Read wanga 2 PETERO 1 Bible Online

2 PETERO 1 - wanga bible

2 PETERO 1

¹Esie Simoni Petero, ouli omukhalabani khandi omurume wa Yesu Kristo, ehandichila abo, Abanyasaye yamalile okhuhelesia eshihaanwa eshilayi shiobusuubili obuhelana nende obwefwe shichila Nyasaye nende omuhonia wefwe Yesu Kristo nabalunjishi.

²Obukoosia nende omulembe bibetsenje khwinywe khulwa okhumanya Nyasaye nende Yesu Omwami wefwe.

³Obunyali bwa Nyasaye obutakatifu, bwakhuhelesia ebindu biosi ebiakhwenyanga khulwa okhumenya obulamu bwatoto obwa eshikristo. Okhubirira mubumanyilisi bwefwe bwa oyo owakhulanga okhusanjilana muluyali nende obulayi bubwe.

⁴Ne munjila eyoluyalilwe nobulayibwe tsana eyo, Kristo akhuhelesiye ebihaanwa biobukusi obukhongo ebiayasuubisiye, kho mbu khulwa ebihaanwa ebio munyalilwe okhuhonokokha okhurula mubusasishi obwobwikombi obuli mushialo, mana mube abasanjilana muyimelaye eyobu Nyasaye.

⁵Ne khulweshifune shiene shino muteeme okhumeeta ebikhole ebilayi khubusuubili bwenywe; ne khubikhole bienywe ebilayi mumeetakhwo obumanyilisi;

⁶khubumanyilisi bwenywe mumeetekhwo obwiruchi. Khubwiruchi bwenywe mumeetekhwo obwisumilisi. Ne khubwisumilisi bwenywe mumeetekhwo obulamu bwatoto obwa eshikristo;

⁷khubulamu obwo mumetekhwo obwenyani obwa eshikristo, ne khubwenyani obwo mumetekhwo obuheelani.

⁸Bino nibio ebihaanwa ebiamukhoyeele okhuba ninabio, ne nimwakhaba ninabio mubunji, bilamukhola okhuba namani mubukholi bwenywe khandi mubumanyilisi bwenywe bwa Omwami wefwe Yesu Kristo.

⁹Nebutswa omundu yesi oubula ebihaanwa ebio ali shinga omubofu noho omundu oulalolanga ehale tawe, khandi yebilile shinga olwa yasiiyilwe okhurula mubionoonobie biakhale.

¹⁰Kho abaana befwe muteeme namani okhukhola omulango kwa Nyasaye nende obulobolebwe khwinywe bube bweinziayo. Nimwakhakhola murio muba shimulilekha obusuubili bwenywe ta.

¹¹Munjila eyo, Nyasaye yakhamuhelesia obunyali obulamba bwokhwinjila mubwami obulahwaho ta obwa Omwami khandi omuhonia wefwe Yesu Kristo.

¹²Kho ndalamwitsusinjia buli lwosi amakhuwa kano kata nikaba mbu mwamala okhukamanya khandi mwamala okhuralila mubwatoto obwamwechesibwa.

¹³Embaara mbu nisie oukhoyele okhumwitsusinjia amakhuwa kano khuluhoono lweshiliho mwoyo.

¹⁴Emanyile mbu lwangu luno enyala okhufwa, shinga olwa Omwami wefwe Yesu Kristo yamanyia habulafu.

¹⁵Kho endeemanga nomwoyo kwosi okhulola mbu munyalilwe okhwitsulila amakhuwa kano koosi ebise biosi olwa emba nimalile okhufwa.

¹⁶Shikhwekhoonyela tsingano tsiabandu bakaasia mubuchesichesi khulwa okhumumanyisia akokhwitsa okhwa Omwami wefwe Yesu Kristo nobunyali ta; habula ifwe khwalola oluyalilwe abeene.

¹⁷Toto mwene khwali nikhuliho olwa Nyasaye sefwe ouli omukhongo khandi owamakana yahelesia Yesu Kristo oluyali olukhongo naboolanga ari; “Wuno niye omwana wanje mwene omuheelwa, owenjamisibungwa muye!”

¹⁸Khwali nikhuli ninaye khushikulu eshitakatifu olwa khwahulila omwoyo nikurula mwikulu ewa Nyasaye.

¹⁹Kho khwamanyile elala oburume obwarumbulwa nabalakusi. Bwakhaba obulayi nimwakharechelesia oburume obwo shichila buli shinga itaha eyakhanga mushiilima okhuula mumabwibwi. Ne obulafu bweyasulwe ing'ining'ini yomumabwibwi bwakhanga mumioyo chienywe.

²⁰Ne okhumeeta khu kandi koosi, mwitsulile mbu abulaho ounyala okhwinoosia omwene obulakusi buli mu Amahandiko tawe.

²¹Shichila shibuliho oburume bwobulakusi obwetsa butswa khulwa okhwenya okhwomundu tawe. Nebutswa abandu bemililwa nende Roho Omutakatifu olwa barumbulanga oburume bwarula khu Nyasaye.