Read wanga 2 PETERO 2 Bible Online

2 PETERO 2 - wanga bible

2 PETERO 2

¹Shinga olwa abalakusi abobubeeyi baliho mubandu tsinyanga tsia khale, nilwo olwa khandi abechesi bobubeeyi balibuukha mwinywe. Balirela mwinywe mabiswi amechesio akokhusasia, akobubeeyi, khandi balimwikana Omwami wabanunula. Khulwako abeene balirelela okhusikha khulitsa bwangu metsukhana.

²Kata kario abasuubili abanji baliloonda ebiima biabwe biobwilasi; ne khulwa amakhuwa kabasuubili abo baliba nibakholanga abandu abanji baliboola amakhuwa amabi khu Injiili yobwatoto.

³Abechesi bobubeeyi abo nabalangu, ne balinyoolela abeene inganga yamapesa khulwa okhumwechesia amechesio kobubeeyi. Okhurula khale Nyasaye yabakhalachila eshiina mana nabisia okhubasasia. Nyasaye shiakonanga tawe ne alibahelesia eshinyasio shinga olwa yalaka!

⁴Nyasaye shiyabaleshela abamalaika abo abonoona ta, nebutswa yabasukuna mumulilo kulasimanga ta, ewa babohwa neminyololo mushiilima, nibalindililanga inyanga yokhukhalachilwa eshiina.

⁵Nyasaye shiyaleshela abandu bali bakhale tawe, nebutswa yarela omuyembo kweifula khushialo eshiabandu bali nibalaria Nyasaye ta; Abanyasaye yahonia bali butswa Noa owakholanga akobulunjishi nende abeinzuye musafu.

⁶Nyasaye yakhalachila eshiina abandu bamatookho aka Sodomu nende Gomora, nabamulula nomulilo, khandi nabakhola okhuba eshilolelo khuketsa okhwikholekha khu abo abalaritsanga Nyasaye tawe.

⁷Yahonokosia Loti owali omundu omulunjishi, owabelela muno khulwa ebiima ebiobwilaasi ebiabandu abamayanu abo.

⁸Loti omundu omulunjishi oyo yali niyamenya mubo ne buli nyanga yabelelanga okhushila, olwa yalolanga nende okhuhulila ebikhole biabwe ebimayanu.

⁹Ne Omwami yamanya shinga olwa anyala okhuhonokosia abandu abamuritsanga okhurula mumateemo kabwe nende shinga olwa anyala okhuhelesia abonooni eshinyasio okhuula khu nyanga yokhukhalachilwa khwo eshiina.

¹⁰Okhushila muno Omwami alibakhalachila eshiina abo abalondanga obwikombi bwomubili obweshifwabwi khandi nibalechelesia obunyali bwa Nyasaye. Abechesi bobubeeyi bano batsalikhanga nibekhulumamia muno khandi shibaritsanga ebilonje bioluyali biomwikulu tawe nebutswa babanyekanga.

¹¹Ne kata abamalaika, abali abamaani khandi abobunyali okhushila ebilonje bioluyali biomwikulu, shibabinjililanga nibabinyeka imbeli owa Omwami shinga abechesi bobubeeyi bakholanga tawe.

¹²Nebutswa abandu bano bakholanga ebindu shinga tsisolo tsiomubulimo etsilali nobwongo bwokhuyililisia tawe, etsiebalwa okhuyimwa nende okhwiirwa nabandu benjililanga nibanyeka eshindu shiosi shiosi eshiabalamanyilisiye tawe. Nyasaye alibamulula butswa shinga tsisolo nabulimo tsimululungwa.

¹³Ne balirungwa nobunyakhani okhulondekhana nende obunyakhani bwabakholela abashiabwe. Omwikhoyo kwabwe kuli mukhukhola eshindu shiosi eshichamisia obwikombi bwemibili chiabwe mushiteere. Nelikhuwa lieisoni khandi lieshifimbwa omurwe okhulia ninabo halala nimutsaatsahalila obubatsa bwabwe.

¹⁴Bekoombanga okhuyilana nende buli omukhasi wabalola. Ne obwikombi bwabwe obwobwonooni shibwikusibungwa tawe. Bakatilisinjia abandu abateshele mubusuubili okhukwa mubwonooni. Emioyo chiabwe chiamala okhunala obulang'u. Bamala okhulamwa eshilaamo eshibi nende Nyasaye!

¹⁵Balekha okhukhola akali amalayi nibakhola amabi; bakholanga akomulakusi Balaamu omusiani wa Beori yakhola owachama amapesa akabandu bamurunganga khulwa okhukhola amabi.

¹⁶Nebutswa Nyasaye yamukoondeshela khulwa obwonooni obwa yali nakholile; yisishiliye yaboola shinga omundu, niyichila omulakusi Balaamu nalekha okhukhola ebikhole biobumayanu.

¹⁷Abandu bano abafwana shinga tsisebele etsiakhamamwo amaatsi; bafwana shinga amaleesi akahutsungwa neyimbumbuyeka; Nyasaye wabakasilia abo habundu ahali hasi mushiilima eshikhongo emakombe.

¹⁸Baboolanga amakhuwa akokhwilola khandi akobusilu nibekhoonyela amakhuwa kobwikombi bwobwilaasi bwemibili okhuselela abo ababeele nibachachile okhwihonokokha okhurula khubandu abamenya nibakholanga amabi.

¹⁹Basuubisinjia abandu obulekhule nabo abeene nibali abasumba bebiima biobusasishi, shichila omundu akwitsanga omusumba owa eshindu shiosi eshimalile okhumuhula.

²⁰Abandu bahonibungwa okhurula mubwonooni bwobusasishi bweshialo khulwa okhubela obumanyilisi bwabwe obwa Omwami khandi omuhonia wefwe Yesu Kristo. Nebutswa nibakhakalukha okhumenya obulamu bwabwe bwakhale mana khandi nibekhola abasumba bebiima biobwonooni, kho obulamu bwabwe buba obubi muno okhushilakhwo shinga olwa bali nibashili okhumanya Yesu Kristo.

²¹Bwakhabeele obulayi muno, khubandu abo nibakhabulile okhumanya obulamu bwobulunjishi okhushila okhubumanya, ne bashiukhana okhurula khulilako litakatifu eliabahebwa.

²²Akekholekha khubo kamanyisinjia mbu tsinjelo tsiaboola habwene mbu, “Imbwa yikalukhanga okhukhomba amasasi kayisalile” khandi, “Ingurwe eyosiibwe yikalukhanga okhukalakala mubutoyi.” Kho tsisolo tsino tsiombi tsilolekha obubi okhushila shinga olwa tsiali olwambeli.