Read wanga 2 PETERO 3 Bible Online

2 PETERO 3 - wanga bible

2 PETERO 3

¹Abaheelwa banje, yino bulano neibarwa yanje yakhabili eyamuhandichile. Mutsibarwa etsio tsiombi endeemanga okhubusia amapaaro ameleleshe mumioyo chienywe khulwa okhumwitsusia amakhuwa kano.

²Enzenya mbu inywe mwitsulile amakhuwa akaboolwa khale muno nabalakusi abatakatifu, nende khandi lilako okhurula khu Omwami khandi Omuhonia eliabarume benywe bamuhelesia.

³Ne okhushila koosi okhuula mumanyilisie mbu mutsinyanga tsiobumalilishi abandu bandi balilolekha, abobulamu bwabwe bwimililungwa nende obwikombi bwobwilaasi. Balimutseshelela

⁴nibamureeba bari, “Shiyasuubisia yakhakalushe? Akhali halishi? Abakuuka befwe bamala okhufwa, ne amakhuwa koosi kashitsiilililanga butswa kario shinga olwa kali okhuchaaka khubuloongwi obweshialo!”

⁵Ne bachoomanga butswa okhuloba buloba okhwitsulila likhuwa lino mbu, Nyasaye yahaana khale lilako, ne khwilako elo, likulu nende eshialo bialongwa. Eshialo shialongwa okhurula mumaatsi nende khulwa amaatsi

⁶khandi kali khulwa amaatsi komuyembo akeshialo shiambeli shiamululwa.

⁷Nebutswa likulu nende eshialo ebiliho bulano baliindungwa nende lilako eliatsana elia Nyasaye yalaka, kho mbu bilimululwa nomulilo. Biliindililanga inyanga eya abandu abalaritsanga Nyasaye ta balikhalachilwa eshiina nibamululwa.

⁸Abaheelwa banje mulebilila likhuwa elala lino ta! Imbeli ewa Omwami, obwahukhani bubulaho hakari weinyanga ndala nende emiyika eshikhumila (1,000), habula; khuye biombi bibili bihelana.

⁹Omwami shiashindanga okhukhola akayasuubisia shinga olwa abandu bandi bapaaranga ta. Habula omwisumilisinjia inywe shichila shiyenyanga omundu yesi okhusikha tawe, habula yenyanga mbu abandu boosi bekalukhasia nibalekha obwonooni bwabwe.

¹⁰Nebutswa Inyanga eya Omwami yilitsa shinga omwifi. Khu Nyanga eyo likulu lilikhamulukha nende olwang'a olululu, ne ebilonje biomwikulu biliyia nibimululwa, mana eshialo nende ebilimwo biosi bilihwaho.

¹¹Kho olwa kali mbu, ebindu bino biosi bilimululwa munjila yino, nenywe kho mukhoyile okhuba abandu abambia shiina? Obulamu bwenywe bukhoyeele okhuba obutakatifu khandi obwihaanile elala khu Nyasaye.

¹²Mukhoyele okhulinda inyanga eyeindukho, ne muteeme okhukhola akamunyala kachile inyanga eyo yitse lwangu. Ne khunyanga eyo likulu liakhasambwe nilisasibwa, nabio ebilonje ebili mwikulu biosi biakhasalulusibwe nomulilo.

¹³Nebutswa ifwe khulindililanga obusuubisie obwa Nyasaye obuli mbu; likulu liyia nende eshialo eshiyia ewa obulunjishi bulimenya.

¹⁴Khulweshio abaheelwa banje, olwa mulindililanga inyanga eyo, rekhwo eshinani mube abeleleshe, ababula eshikha khandi abomulembe mumoni omwa Nyasaye.

¹⁵Khwitsulile mbu, Omwami wefwe nomwisumilisi okhuba yenyanga abandu bahonibwe. Kano niko aka Omwana wefwe omuheelwa Paulo yaboola olwa yamuhandichila, niyekhoonyelanga obuchesi obwa Nyasaye yamuhelesia.

¹⁶Khandi niko aka Paulo mwenoyo aboolanga mutsibarwatsie tsiosi khumakhuwa kano. Ne tsilimwo amakhuwa kandi amatinyu aka abo abalamanyile ta khandi ababula obusimbilo benoosinjia nibakashiamia, shinga olwa bashiaminjia Amahandiko kandi. Kho abeene bereelelanga okhusikha.

¹⁷Nebutswa inywe, abaheelwa banje, mwamala okhumanya amakhuwa kano, kho mube meeso, obubi bwabandu abonooni bulamushiamie nibuchila nimurula mumasinji kenywe tawe.

¹⁸Habula mutsiililile okhukhula mubukoosia nende mubumanyilisi obwa Omwami khandi Omuhonia wefwe Yesu Kristo. Khuhelesie Kristo oluyali okhurula bulano nende emiyika chiosi echilahwayo ta! Amina.