Read wanga 1 YOHANA 2 Bible Online

1 YOHANA 2 - wanga bible

1 YOHANA 2

¹Abaana banje mubusuubili, emuhandichila kano kho mbu muleshe okhwonoona; nebutswa omundu yesi niyakhonoona, khuli nende omununuli ewa Sefwe, niye Yesu Kristo omulunjishi.

²Kristo omwene niye omusango okuyininjiaho obwonooni bwefwe, ne shibili obwonooni bwefwe bionyene ta, nebutswa khandi nobwonooni biabandu beshialo.

³Ne nikhuhulila amalako ka Nyasaye, khuli nobwatieli mbu khwamumanya.

⁴Omundu yesi ouboola mbu yamanya Nyasaye, ne nalalonda amalakoke tawe, omundu shinga oyo nomubeeyi, ne obwatoto bubula muye.

⁵Nebutswa ulia ouhulila likhuwa lia Nyasaye niye owobuheelibwe khu Nyasaye bwakholwa obwitsule toto. Khulwa kano khunyala okhumanyila elala mbu, khumenyanga mubusanjilani nende Nyasaye.

⁶Omundu yesi yesi ouboola mbu amenyanga mubusanjilani nende Nyasaye, akwanile okhumenya obulamu shinga olwa Yesu Kristo yamenya.

⁷Abetsa banje abaheelwa, lilako liemuhandichilanga lino shilili liyia tawe; nelilako likhulu elia mwali ninalio okhurula mukhuchaaka. Lilako likhulu lino namakhuwa akamwamala okhuhulila.

⁸Nekata kario lilako elie emuhandichilanga bulano neliyiakha, khulwa okhubela obwatieli bwalio buloleshela mu Kristo nende khandi mwinywe mwesi. Khulwa eshilima shibiranga, ne obulafu bwene bwakhanga.

⁹Omundu yesi ouboola mbu, ali mubulafu ne niyasila omwana wabwe, ali mushiilima okhuula khubise bino.

¹⁰Omundu yesi ouheelanga omwana wabwe amenyanga mubulafu, ne khulweshio shibulaho eshindu shiosi muye eshinyala okhuchila omundu undi yesi okhwisichirala.

¹¹Omundu yesi ousila omwana wabwe ali mushiilima; achendanga mushiilima eshio, nekhandi shiamanyile ewa atsitsanga tawe, okhuba eshilima shimubofusiye.

¹²Emuhandichilanga, abaana banje okhubela mwaleshelwe obwonooni bienywe biosi khulwa Kristo.

¹³Emuhandichilanga inywe basamwana abaana shichila mumumanyile Kristo oubetsangaho okhurula mukhuchaaka. Emuhandichila inywe ababuukha shichila mwahulile Omumayanu oyo.

¹⁴Emuhandichila inywe abaana banje okhuba mumumanyile Sefwe. Emuhandichilanga inywe basamwana bandi, shichila mumumanyile oubetsangaho okhurula khukhuchaaka. Emuhandichilanga inywe ababukha, shichila muli nende amaani, likhuwa elia Nyasaye limenyanga mwinywe, khandi mwamalile okhuhula Omumayanu oyo.

¹⁵Mulaheelanga eshialo noho eshindu shiosi eshieshialo tawe. Niwakhaheela eshialo, shiwamuheela Samwana tawe.

¹⁶Biosi ebili mushialo, obwikombi obubi obwomubili, obwikombi bwetsimoni nende okhwiyitsiala mubulamu buno, shibiarulanga khu Samwana ta, habula birulanga mushialo shiobwonooni shino.

¹⁷Eshialo nende buli shindu shiosi eshilimwo eshiabandu bekoombanga shihwetsangaho; wulia oukhola akokhwenya khwa Nyasaye alamenya inziayo.

¹⁸Abaana banje mubusuubili, indukho yili ahambi! Mwaboolelwa mbu Omusuku alitsa; ne bulano abasuku abanji aba Kristo bamalile okhulolekha. Khulwako khumanyile mbu indukho yili ahambi.

¹⁹Abandu bano toto mwene, shibali abomubusanjilani bwefwe ta, ne niko akachila nibahukha khwifwe; nibakhabele abomubusanjilani bwefwe, bakhatsililiile okhuba halala ninefwe. Halali bakhulekha mbu limanyishe habulafu mbu kata mulala khubo shiali owobusanjilani bwefwe tawe.

²⁰Ne inywe mwahelesibwe Roho Omutakatifu nende Kristo, khandi inywe mwesi mumanyile obwatieli.

²¹Shiemuhandichilanga inywe, okhubela mukorirwe obwatieli ta; halali shichila mubumanyile, khandi inywe mumanyile shinga obubeeyi bularulanga mubwatieli kata nahatuutu ta.

²²Kho omubeeyi niwiina? Niye oyo yesi ouboola mbu, Yesu shialiye Kristo[1] tawe. Omundu shinga uno nomusuku wa Kristo alobanga bosi Samwana nende Omwana.

²³Okhuba yesi owikana Omwana yekana Samwana; naye yesi oufuchilila omwana khandi afuchilila Samwana yesi.

²⁴Okhuula mubishe mumioyo amakhuwa kamwahulila okhurula khukhuchaaka. Ne aka mwahulila okhurula mukhuchaaka nikakhamenya mwinywe buli lwosi kho mulamenya mubulimani nende Omwana nende Samwana.

²⁵Ne elia Kristo Omwene yakhusuubisia okhukhuhelesia ndielino mbu; obulamu bwobumeli.

²⁶Emuhandichilanga kano abo abateemanga okhumushiama;

²⁷ne Roho Omutakatifu owa mwanyoola okhurula khu Kristo amenyanga mwinywe. Khandi shibulaho eshichila omundu yesi amwechesie ta. Shichila Rohowe oyo amwechesinjia buli shindu, mana nobwatieli ahalali Obubeeyi ta; butswa shinga yamwechesiye mumenye muye.

²⁸Ne, abaana banje mutoonye mubulimani nende Kristo kho mbu, olwa alolekha khube nikhwitsule itswoni mbu khuleshe okhufimbwa emirwe khunyanga yakalukha.

²⁹Nimuba nimwamanya mbu Kristo nomulunjishi, mukhoyile okhuba nobulamba mbu, buli mundu oukhola akali amalunjishi aba Omwana wa Nyasaye.