Read wanga 1 YOHANA 3 Bible Online

1 YOHANA 3 - wanga bible

1 YOHANA 3

¹Lolekhwo obukhongo bwobuheeli bwa Nyasaye Sefwe shinga olwa buli khwifwe! Obuheelibwe nobunji muno, mbu okhuula ifwe khulangwe mbu abaana ba Nyasaye khandi kho, toto khuli abebe. Shino neshifune shichila eshialo nishilakhumanyile tawe; okhubela shilashiamumanya Nyasaye.

²Abetsa banje abaheelwa, ifwe bulano khuli abaana aba Nyasaye, ahalali shikamanyishe habulafu eshiakhwitsa okhuba ta. Ne khumanyile mbu, olwa Kristo alolekha khuliba shinga ye, okhubela khulimulola Nyasaye shinga ali toto mwene.

³Yesi ouli nende obunaayilo buno muye yelindanga naba omweleleshe shinga olwa Kristo ali omweleleshe.

⁴Yesi yesi owonoona ali neshikha khubufunachi bwelilako elia Nyasaye, shichila obwonooni nobufunachi bwe lilako.

⁵Mumanyile mbu, Kristo yetsa khulwa okhuyiniaho obwonooni, ne muye obwonooni bubulamwo.

⁶Kho yesi outsiililila okhumenya nende Kristo, shiyonoona ta; ne omundu yesi owonoona shiyamulola kata shiamumanyile Kristo ta.

⁷Omundu yesi aleshe okhumushiamia ta abaana banje! Omundu yesi oukholanga akatoto, nomulunjishi shinga olwa Kristo ali omulunjishi.

⁸Yesi outsiililila okhwonoona nowa Setani okhubela eshishieno shionoona okhurula khukhuchaaka. Eshifune shiachila Omwana wa Nyasaye niyetsa shiali mbu asasie emilimo chia Setani yakhola.

⁹Yesi ouli onwana wa Nyasaye shiatsililanga okhowoona ta, okhubela imela ya Nyasaye ili muye; ne okhubela Nyasaye niye Samwana shianyala okhwonoona ta.

¹⁰Buno nibwo obwahukhani katong'ane hakari wa abaana ba Nyasaye nende abaana ba Setani mbu: omundu yesi oulakhola akaobulunjishi nohomba oulamuheela omwana wabwe ta, shiali omwana wa Nyasaye tawe.

¹¹Oburume bwa mwahulila okhurula khukhuchaaka buli mbu, okhuula muheelanenje.

¹²Shikenya mbu khube shinga Kaini ta, yali owa Omumayanu oyo, ne niyeera Abeli omusiani wabwe. Kaini yeera Abeli mbushiina? Khwali khulwa okhubela ebindu bia ye Kaini yakhola ebiali ebibi, ne ebindu bia omusiani wabwe yakhola biali ebilunjishi.

¹³Kho muleshe okhuhuka abaana befwe olwa abeshialo bamusila inywe.

¹⁴Khumanyile mbu khwaleshile olufu nikhwambukha mubulamu; okhubela khwaheela abaana befwe. Owulaheelanga abaana babwe ta, atong'anga mubunyali bwokhufwa.

¹⁵Owusilanga omwana wabwe nomwiri, khandi mumanyile mbu abula obulamu bwobumeli muye.

¹⁶Khumanyanga obuheeli khurinanwa mbu: Kristo yehaana obulamu bubwe khwifwe. Ifwe fwesi khukhoyile okhuhaana obulamu bwefwe khulwa abashiefwe!

¹⁷Kho nikaba mbu omundu omuyinda alola omwana wabwe nomumanani, naye amwime omwana wabwe eshia atamba, anyala arie okhuboola mbu, amuheelanga Nyasaye?

¹⁸Abaana banje mubusuubili, obuheeli bwefwe shibwenya mbu bube butswa amakhuwa nende amasungo amakhaya ta, okhuula bube obuheeli bwatieli obwimanyisinjia obwene mubikhole.

¹⁹Kano niko akachila nikhumanya mbu khuli abobwatieli khandi mbu khuli mumasinji imbeli wa Nyasaye.

²⁰Ne buli olwa khunyoola obuyaasibwi bwo mumioyo chiefwe, khumanya mbu Nyasaye nomukhongo okhushila emioyo chiefwe, ne yamanya buli shindu.

²¹Ne kho abetsa banje abaheelwa, emioyo chefwe nichilakhuyaasia ta, khuli nende amasinji imbeli wa Nyasaye.

²²Ne khandi khulanyoola okhurula khuye shiosi shiosi eshia khumusaba shichila khuhulilanga amalakoke nende okhukhola akamuchamisia.

²³Khandi aka Nyasaye akhulachilisia ngakano mbu; khusuubile mu Mwanawe Yesu Kristo, nende okhuheelana, shinga olwa Kristo yakhulaka.

²⁴Boosi abalondanga amalako aka Nyasaye, bamenyanga mubusanjilani nende Nyasaye, khandi Nyasaye yesi amenya mubusanjilani mubo. Ne khulwa Omwoyo omweleleshe kwa Nyasaye yahaana, khumanya mbu Nyasaye amenyanga mubusanjilani ninabo.