Read wanga 1 YOHANA 4 Bible Online

1 YOHANA 4 - wanga bible

1 YOHANA 4

¹Abaheelwa banje, mulasuubilile boosi ababoola mbu bali nende Roho Omutakatifu ta; nebutswa mubateeme okhumanya nikali mbu Roho Omutakatifu owa bali ninaye arula khu Nyasaye noho ta. Okhubela abalakusi abanji abobwikaati basalaana buli habundu.

²Munjila yino mulanyala okhumanya Roho Omutakatifu wa Nyasaye; buli yesi oufuchilila mbu, Yesu Kristo yetsa shinga omundu, kho omundu oyo ali nende Roho Omutakatifu okhurula khu Nyasaye.

³Nebutswa yesi oukaana kano khu Yesu shiali nende Roho Omutakatifu okhurula khu Nyasaye tawe. Roho yali ninaye niyokhurula khu omusuku wa Kristo, owamwahulila mbu aletsa ne bulano aliho mushialo.

⁴Nebutswa inywe abaana banje, muli aba Nyasaye, ne mwamala okhuhula abalakusi bobubeeyi, shichila ouli mwinywe nowobunyali okhushila Roho wa abomushialo.

⁵Abalakusi abobubeeyi abo baboolanga khukomushialo, mana eshialo shibarechelesinjia shichila mbu nabomushialo.

⁶Nebutswa ifwe khuli aba Nyasaye, omundu yesi owamanya Nyasaye akhurechelesinjia, ne omundu yesi oulali owa Nyasaye shiakhurechelesinjia tawe. Munjila yino khunyala okhumanya Roho wobwatoto nende Roho wobubeeyi.

⁷Abaheelwa banje, chende khuheelane abeene khu beene, shichila obuheeli burulanga khu Nyasaye. Omundu yesi ouli nobuheeli nomwana owa Nyasaye, khandi wamumanya Nyasaye.

⁸Omundu yesi oulali nobuheeli ta, shiyamumanya Nyasaye tawe, okhuba Nyasaye nobuheeli.

⁹Nyasaye yamanyia obuheelibwe khulwa okhuruma Omwanawe omutelwa mushialo mbu khunyalilwe okhunyoola obulamu okhubirira muye.

¹⁰Buno nibwo obuheeli obwa emboolanga mbu, shikali mbu ifwe khwamuheela Nyasaye tawe, nebutswa niye owakhuheela mana naruma Omwanawe mbu abe eshitiso shiobwonooni bwefwe.

¹¹Abaheelwa banje nikali mbu Nyasaye yakhuheela ario, kho khukhoyeele okhuheelana abeene khu beene.

¹²Abulaho omundu owalolakhwo Nyasaye, nebutswa nikhuheelana abeene, Nyasaye amenyanga mubulimani ninefwe; khandi obuheeli bubwe busibuungwa mwifwe.

¹³Khuli nobumanyilisi mbu, khumenyanga mubusanjilani nende Nyasaye khandi Nyasaye amenyanga mwifwe, shichila yakhuhelesia Roho wuwe.

¹⁴Ne ifwe khwalola mana khurumbulanga mbu Samwana yaruma Omwana wuwe okhuba Omuhonia weshialo.

¹⁵Omundu yesi owiyama nasuubila mbu Yesu nende Omwana wa Nyasaye, amenyanga mu Nyasaye naye Nyasaye yesi amenyanga muye.

¹⁶Ne ifwe abeene khwamanya khandi khwasuubila obuheeli bwa Nyasaye ali ninabwo khwifwe. Nyasaye nobuheeli, ne yesi oumenyanga mubuheeli amenyanga mu Nyasaye naye Nyasaye yesi amenyanga muye.

¹⁷Muno nimwo omwobuheeli bukholungwa obulamba mwifwe, mbu khube abe ikholo inyumu khunyanga yokhuyaasibwa; ne khuliba ninayo shichila obulamu bwefwe mushialo shino buli shinga obwa Kristo.

¹⁸Oburi buhuma mubuheeli ta, okhuba obuheeli obulamba burusinjiaho oburi bwosi. Kho mana obuheeli bushili okhuba obulamba mu oyo ouli omuri, shichila oburi bulondananga nende eshinyasio.

¹⁹Ifwe khuheelanga shichila Nyasaye yaranjilila okhukhuheela.

²⁰Omundu yesi niyakhaboola mbu, yamuheela Nyasaye, ulia oulaheelanga omwana wabwe, owa alola ta, shianyala okhuheela Nyasaye walalola tawe.

²¹Ne lilako lia Kristo yakhuhelesia ndielino mbu: omundu yesi ouheela Nyasaye okhuula aheele omwana wabwe yesi.