Read wanga 1 YOHANA 5 Bible Online

1 YOHANA 5 - wanga bible

1 YOHANA 5

¹Omundu yesi ousuubila mbu Yesu niye Kristo, aba omwana wa Nyasaye; ne omundu yesi ouheela Samwana, aheelanga omwanawe yesi.

²Khumanyile mbu khuheelanga abaana ba Nyasaye, olwa khuheela Nyasaye nende okhulonda amalako keke.

³Okhubela obuheeli bwefwe khu Nyasaye nokhuhulila amalako keke. Ne amalako keke shikali amatinyu khwifwe tawe,

⁴shichila buli omwana wa Nyasaye ali nobunyali bwokhuhula akomushialo. Ne khuhulanga akomushialo khulwa obusuubili.

⁵Niwiina ounyala okhuhula akomushialo? Niye yenyene ulia omundu ousuubilanga mbu, Yesu niye Omwana wa Nyasaye.

⁶Yesu Kristo niye owetsa khulwa amaatsi akobubatiisibwe nende amabanga kokhufwakhwe. Shiyayetsa khulwa amaatsi konyene ta, habula khulwa amaatsi nende amabanga. Ne Roho omwene aboola mbu kano nakatoto, shichila Roho nobwatoto.

⁷Buliho obuloli eshiakhataru; Roho amaatsi kobubatiisi nende amabanga.

⁸Ne Roho niye ourumbulanga akobuloli, shichila ye nowobwatoto.

⁹Khufuchililanga obuloli bwabandu nebutswa obuloli bwa Nyasaye bushila bwosi ehale, ne yahaana obuloli buno khu Mwanawe.

¹⁰Omundu yesi ousuubilanga mu Omwana wa Nyasaye ali nende obuloli buno mumwoyokwe; nebutswa omundu yesi oulasubilanga Nyasaye ta, akholanga Nyasaye okhuba omubeeyi, shichila shiyasuubila aka Nyasaye yaboola khu mwanawe tawe.

¹¹Ne buno nibwo obuloli mbu; Nyasaye yakhuhelesia obulamu obwobumeli, ne obulamu buno buli mu Mwanawe.

¹²Ne omundu yesi ouli nende Omwana ali nobulamu bwobumeli buno; ne omundu yesi oubula Omwana wa Nyasaye abula obulamu bwobumeli buno.

¹³Emuhandichilanga inywe abasuubilanga mu Omwana wa Nyasaye, kho mumanye mbu muli nende obulamu bwobumeli, inywe abasuubilanga mumwana owa Nyasaye.

¹⁴Khuumanga ikholo imbeli wa Nyasaye shichila eshindu shiosi eshiakhusaba okhulondana nende ako khwenyakhwe alakhuhelesia.

¹⁵Nikhuba nikhumanyile mbu akhuhulilanga buli olwa khumusaba, khumanyile mbu khumalile okhunyoola aka khumusaba.

¹⁶Omundu yesi naba nalola omwana wabwe nakholanga obwonooni obulamuyila mukhufwa ta, amusabile khu Nyasaye, naye Nyasaye alamuhelesia omwonooni oyo obulamu. Kano kali khulwa abo aba obwonooni bwabwe bulali obwokhufwa ta. Nebutswa buliho obwonooni obureranga okhufwa. Ne shemboolanga mbu musaaye Nyasaye khulwa abo tawe.

¹⁷Ebikhole biosi ebibi nobwonooni nebutswa buliho obwonooni obularera okhufwa tawe.

¹⁸Khumanyile mbu omundu owebulwa khulwa Nyasaye shiatsiilililangaokhwonoona tawe, okhuba Omwana wa Nyasaye amulindanga obulayi, ne Omumayanu oyo shianyala okhumusaalisia tawe.

¹⁹Khumanyile mbu khuli abaana ba Nyasaye, ne kata kario eshialo shiosi shili hasi woburuchi obwa Omumayanu oyo.

²⁰Khumanyile mbu Omwana wa Nyasaye yetsa khandi yakhuhelesia obumanyilisi, kho khumanye Nyasaye watoto. Khumenyanga mubusanjilani nende Nyasaye watoto halala nende Omwanawe Yesu Kristo. Uno niye Nyasaye watoto, khandi niye obulamu obwobumeli.

²¹Abaana banje mubusuubili, mwilinde obulayi okhurula khubanyasaye bobubeeyi.