Read wanga ABAYAASI 1 Bible Online

ABAYAASI 1 - wanga bible

ABAYAASI 1

¹Olunyuma lwokhufwa khwa Yoshwa, abandu ba Isiraeli bareeba OMWAMI Nyasaye Bari, “Nabaleena khubetsimbia tsiefwe abalaranjilila okhutsia okhuseera Abakanani?”

²Naye OMWAMI Nyasaye nabakalusia ari, “Aboluyia lwa Yuda nibo abalaranjilila okhutsia. Ehaanile eshialo eshio mumakhono kabwe.”

³Mana Yuda naboolela Simoni omusiani wabwe ari, “Chenda khutsie mushialo shia ndakabwa khuseere abandu ba Kanani, nasi siesi khandi ndalatsia ninawe okhuseera lihanga lia wakabwa.” Kho aboluyia lwa Simoni,

⁴nende olwa Yuda nibatsia boosi okhulwana halala. OMWAMI Nyasaye nabanyalila okhuhula abandu ba Kanani nende aba Perizi, mana nibahula abandu ebikhumila ekhumi nibali Bezeki.

⁵Banyoolayo omuruchi Adonibezeki ne nibalwana ninaye.

⁶Omuruchi Adonibezeki yelukha, nebutswa bamulondachilakhwo nibamutiila, nibarema tsinjala tsikhongo tsiokhumakhono nende etsiokhubilenje.

⁷Adonibezeki naboola ari, “Abaruchi amakhumi musaafu abaremwa tsinjala tsiabwe tsikhongo tsiokhumakhono nende etsiokhubilenje batoolanga tsimbungulusi hasi weimesa yanje yebiokhulia. Bulano Nyasaye yarunjile isie aka ndabakholela.” Mana nibamuyila Yerusalemu, ewa yafwila.

⁸Aboluyia lwa Yuda nibaseera litookho lia Yerusalemu nende okhulibukula. Mana nibera abandu belitookho elo nende okhulisamba nomulilo.

⁹Olunyuma, aboluyia lwa Yuda batsia okhuseera abandu ba Kanani abamenyanga mushialo shiebikulu, Negebu nende mumabanda.

¹⁰Mana nibatsia nibaseera khandi Abakanani abamenyanga mwitookho lia Heburoni, elialangungwa khale mbu, Kiriatsi-ariba. Ebweneyo bahula abetsimbia tsia Sheshayi, Ahimani nende Talimayi.

¹¹Okhurula ebweneyo, aboluyia lwa Yuda batsia okhuseera litookho lia Deberi, elialangungwa khale mbu, Kiriatsi-Sefa.

¹²Mulala khubo owalangwa mbu, Kalebu naboola ari, “Omundu ouseera litookho lia Kiriatsi-Sefa mana alibukule, ndalamuhelesia omwana wanje Akusa okhuba omukhasiwe.”

¹³Kho Otsinieli omusiani wa Kenazi owali omusiani wabwe Kalebu omutiiti nabukula litookho elo, mana Kalebu namuhelesia omukhaanawe Akusa okhuba omukhasiwe.

¹⁴Khunyanga yeshiselelo, Otsinieli yaboolela Akisa mbu, areebe samwana amuhelesie omukunda. Kho Akisa niyekha okhurula khusishili, naye Kalebu namureeba ari, “Wenyanga shiina?”

¹⁵Naye namukalusia ari, “Ndenyangakhwo tsisebele tsiamaatsi shichila eshialo shia umbelesiye neshiumu.” Kho Kalebu namuhelesia tsisebele tsiemukulu nende etsiemwalo.

¹⁶Mana aboluyia lwabandu ba Keni, abali abanyakhufialanyene Musa beshisaatsa, nibatsia nende aboluyia lwa Yuda okhurula Yeriko, litookho liemisaala chiamashindu, nibenjila mushitsiimi shia Yuda, eshili Negubu ahambi nende Aradi. Ebweneyo nibamenyayo mubandu ba Keni.

¹⁷Mana aboluya lwa Yuda nibatsia nende aboluyia lwa Simoni omusiani wabwe, kho boosi halala nibahula Abakanani abamenyanga mwitookho lia Zafetsi. Balilaamila eshilaamo shiobubi, nibalisasia ne nibalikulikha mbu, Homa[1].

¹⁸Aboluyia lwa Yuda nibabukula litookho lia Gaza nende amataala kalio, nibabukula Ashikeloni nende amataala kalio, khandi nibabukula Ekironi nende amataala kalio.

¹⁹Naye OMWAMI Nyasaye nakhoonnya aboluyia lwa Yuda nibabukula eshialo shiebikulu, nebutswa shibanyalilwa okhuloonda abandu bamenyanga mushialo shieshiangalamwe eshio ta, shichila abandu abo bali namakaari kokhulwana akakaasibwa okhurula khubibia.

²⁰Kho shinga olwa Musa yali niyalachilisia, eshialo shia Heburoni shiahanwa khu Kalebu, owamala nalonda tsimbia tsitaru tsioluyia lwa Anaki okhurula mwitookho.

²¹Nebutswa aboluyia lwa Benjamini shibaloonda Abayebusi abamenyanga mu Yerusalemu ta, kho Abayebusi batsiililila okhumenyayo halala nende aboluyia lwa Benjamini okhuula olwa leelo.

²²Aboluyia lwa Efuraimu nende olwa Manase boosi batsia nibaseera litookho lia Betseli, elialangungwa khale mbu, Luzi. OMWAMI Nyasaye yabakhoonya.

²³Kho nibaruma abandu okhutsia okhurunilisia nende okhumanyilisia litookho lia Betseli.

²⁴Abanoonelesi abo balola omusaatsa undi narulanga mwitookho elo, ne nibamuboolela bari; “Nochama khumanyiekhwo injila yokhwinjila mwitookho, nefu shikhulakhusaalisia tawe.”

²⁵Naye nabamanyia injila eyo, kho aboluyia lwa Manase nende olwa Efuraimu nibeera abandu boosi mwitookho elo, okhurusiakhwo omusaatsa oyo nende abeinzuye.

²⁶Mana omusaatsa oyo natsia mushialo shia Abahiti niyombakhayo litookho nalilanga mbu, Luzi, ne litookho elo lishilangungwa lirio okhuula bulano.

²⁷Aboluyia lwa Manase shibaloonda abandu abamenyanga mumatookho ka Betsishani, Taanaki, Dori, Ibuleamu, Mekido nende abomumataala karondokhane khubo tawe.

²⁸Olwa Abaisiraeli bekhola abamaani banichilisia Abakanani okhubakholela emilimo, ne kata Kario shibanyalilwa okhubaloonda tawe.

²⁹Nabo aboluyia lwa Efuraimu shibaloonda Abakanani, abamenyanga mwitookho lia Gezeri tawe, kho Abakanani abo batsiililila okhumenyayo ninabo.

³⁰Aboluyia lwa Zebuluni shibaloonda abandu bamenyanga mumatookho ka Kituroni nende Nahaleli tawe. Kho Abakanani abo batsiililila okhumenyayo ninabo, khandi aboluyia lwa Zebuluni nibabanichilisia okhubakholela emilimo.

³¹Aboluyia lwa Asheri shibaloonda abandu bamenyanga mumatookho ka Ako, Sidoni, Alabu, Akizibu, Heliba, Afeki, nende Rehobu tawe.

³²Aboluyia lwa Asheri bamenya nende Abakanani beene eshialo eshio, shichila shibabaloonda tawe.

³³Aboluyia lwa Nafutali shibaloonda abandu bamenyanga mumatookho ka Betsi, Shemeshi, nende Betsi-anatsi tawe. Aboluyia lwa Nafutali bamenya nende Abakanani beene eshialo eshio, habula aboluyia lwa Nafutali babanichilisia okhubakholela emilimo.

³⁴Nabo abandu ba Amori banichilisia aboluyia lwa Dani okhukalukha mushialo shiebikulu, shibabafuchilila okhukholomokha betse mwibanda tawe.

³⁵Kho abandu ba Amori abo batsiililila okhumenya Aijaloni, Shaalibimu, nende mushikulu shia Heresi. Nebutswa aboluyia lwa Efuraimu nende olwa Manase babakhola abasumba babwe khandi nibabanichilisia okhubakholela emilimo.

³⁶Ne olwakho lwa Abamori lwarulanga emasaba wa Sela okhubirila khunjila ya Akirabimu.