Read wanga ABAYAASI 10 Bible Online

ABAYAASI 10 - wanga bible

ABAYAASI 10

¹Olunyuma lwokhufwa khwa Abimeleki, Tola omusiani wa Pua, omwana wa Dodo, owali womuluyia lwa Isakari, yetsa okhuhonia Isiraeli. Ne Tola yali yamenya Shamiri, eyili mushialo shiebikulu shia Efuraimu.

²Yali omuyaasi wa Isiraeli khulwemiyika amakhumi kabili nachitaru. Mana nafwa ne nayabilwa Shamiri.

³Olunyuma lwa Tola, yetsaho Yairi owa Giliadi. Naye naba omuyaasi mu Isiraeli khulwemiyika amakhumi kabili nachibili.

⁴Yali nabasiani amakhumi kataru abachendelanga khutsisishili amakhumi kataru, nende amatookho amakhumi kataru mushialo shia Giliadi, akashilangungwa mbu, amatookho ka Yairi okhuula bulano.

⁵Yairi nafwa ne nayabilwa Kamoni.

⁶Mana abandu ba Isiraeli khandi nibakhola obwonooni imbeli owa OMWAMI Nyasaye, khulwa okhwinamila abanyasaye ba Baali nende aba Ashitarotsi, nibenamila khandi abanyasaye ba Abasiria, nende abanyasaye ba Abasidoni, nende abanyasaye ba Abamoabu, nende abanyasaye ba Abamoni, nende abanyasaye ba Abafilisiti. Balekha okhukhalabanila OMWAMI Nyasaye khandi nibalekha okhumwinamila.

⁷Kho OMWAMI Nyasaye nasinyishila Abaisiraeli, ne nalekha Abafilisiti nende Abamoni nibabahula.

⁸Khulwa emiyika ekhumi namunane basandia Abaisiraeli boosi abali nibamenya injelekha wa Yorodani mushialo shia Abamori eshili mu Giliadi.

⁹Mana Abamori nibaambukha omwalo kwa Yorodani nibaseera khandi aboluyia lwa Yuda, olwa Benjamini nende olwa Efuraimu. Kho Abaisiraeli nibanyakhana muno.

¹⁰Mana Abaisiraeli nibahabila OMWAMI Nyasaye nibaboola bari, “Khwonoonile imbeliwo shichila khukhuleshile iwe Nyasaye wefwe, ne nikhwinamila abanyasaye ba Baali.”

¹¹Naye OMWAMI Nyasaye nabakalusia ari, “Shiendi nisie owamuhonia okhurula khu Abamisiri, Abamori, nende Abafilisiti noho?

¹²Kata okhurula khu Abasidoni, Abamaleki, nende Abamoni olwa bamusandia nenywe nimuuhabila? Shindamuhonia okhurula mumakhono kabwe noho?

¹³Kata kario, mwandekha nimukhalabanila abanyasaye bandi. Khulweshio shindalamuhonia khandi tawe.

¹⁴Tsie muhabile abanyasaye bamwahula okhukhalabanila. Leshe abeene abo bamuhonie mumatinyu kenywe.”

¹⁵Nebutswa Abaisiraeli baboolela OMWAMI Nyasaye bari, “Khwonoona, okhukholele koosi aka wenya, habula nochama okhuhonie inyanga yino.”

¹⁶Kho nibarusiaho abanyasaye babwe abacheni abo, ne nibachaaka okhwinamila OMWAMI Nyasaye. Naye nabeelelela amatinyu ka Abaisiraeli.

¹⁷Mana Abamoni niberechekha khulwa lihe, nibakhupa ikambi yabwe mu Giliadi. Nabo Abaisiraeli nibakhung'ana halala nibakhupa ikambi yabwe Mizipa eyili mu Giliadi.

¹⁸Nibali ebweneyo, abandu ba Isiraeli nabemilisi babwe, bareebana abeene khu beene bari, “Niwiina ounaukhwimilile okhuseera abandu ba Amoni? Oulakhwimilila niye oulaba omwimilisi wabandu boosi abamenya mu Giliadi.”