Read wanga ABAYAASI 11 Bible Online

ABAYAASI 11 - wanga bible

ABAYAASI 11

¹Bulano Yefutsa Omugileadi, yali omulwani wamaani, habula yali omwana womukhasi omutamba. Samwana Yefutsa yali Giliadi,

²naye yali nabasianibe bandi ababakhasibe. Kho olwa abasiani ababakhasi abo bali nibatuushile, balonda Yefutsa hango nibamuboolela bari, “Shiolakabwakhwo eshindu shiosi shiosi okhurula khupapa wefwe ta, shichila iwe oli omwana omuchenda nanyina.”

³Mana Yefutsa niyelukha okhurula khubasiani babwe natsia namenya Tobu. Mana abandu bandi abakhaya butswa nibekhung'asia khu Yefutsa, naye nachendachendanga ninabo.

⁴Olunyumakhwo, Abamoni baseera Isiraeli.

⁵Ne olwa Abamoni abo baseera Abaisiraeli, abemilisi ba Abagileadi batsia okhwenda Yefutsa okhurula mushialo shia Tobu.

⁶Mana nibaboolela Yefutsa bari, “Yitsa okhwimilile, kho khulwane nende Abamoni.”

⁷Nebutswa Yefutsa yabakalusia ari, “Inywe mwasila isie okhuula olwa mwarusia munzu ya papa? Kho eshiakhachila nimunzitsakhwo bulano nimuli mumatinyu nishiina?”

⁸Nabo nibakalusia Yefutsa bari, “Khukhwitsilekhwo bulano shichila khwenyanga mbu, khutsie ninawe khulwane Abamoni mana wimilile abandu ba Giliadi boosi.”

⁹Kho Yefutsa nababoolela ari, “Nimuba nimungalusia ingo khulwa okhulwana Abamoni mana OMWAMI Nyasaye yanyalile okhubahula, ndalaba omuruchi wenywe.”

¹⁰Nabo nibamukalusia bari, “OMWAMI Nyasaye alaba omuloli wefwe, khulakhola toto mwene shinga lwoboolile.”

¹¹Kho Yefutsa natsia nabemilisi ba abandu ba Giliadi, ne abandu abo nibamwahula okhuba omuruchi wabwe khandi omwimilisi wabwe. Mana Yefutsa nabaloosilia amakhuwake imbeli ewa OMWAMI Nyasaye nibali Mizipa.

¹²Mana Yefutsa naruma abarume khumuruchi wa Abamoni naboola ari, “Eshichilanga nokhusalaasia nishiina? Eshichilanga noseera eshialo shiefwe nishiina?”

¹³Omuruchi wa Abamoni nakalusia Abarume ba Yefutsa abo ari, “Olwa Abaisiraeli barula mushialo shia Misiri, babukula omukunda kwanje, okhurula khumwalo kwa Arinoni okhuula khumwalo kwa Yaboki nende omwalo kwa Yorodani. Bulano ndenyanga mbu, mungalusilie omukunda okwo mumulembe.”

¹⁴Yefutsa nakalusia abarumebe abo khumuruchi oyo,

¹⁵nababoolela ari, “Abaisiraeli shibaabukulakhwo omukunda kwa Moabu kata okwa Abamori tawe.

¹⁶Habula olwa batikulukha nibarula Misiri, Abaisiraeli babirira mushitsiimi okhuula khunyanza inzakhanyu niboola Kadeshi.

¹⁷Mana nibaruma abarume khumuruchi wa Edomu nibamureeba mbu, abafuchilile babirire mushialoshie. Nebutswa omuruchi wa Edomu shiyabafuchilila ta, khandi nibareeba omuruchi wa Moabu, yesi khandi nalabafuchilila okhubirira mushialoshie tawe. Kho Abaisiraeli nibatong'a Kadeshi.

¹⁸Mana nibatsiililila okhuchenda nibabirira mushitsiimi, nibabotokhana eshialo shia Edomu nende eshialo shia Moabu okhuula olwa boola elubeka lwebukwe lweshialo shia Moabu, nibakhupa ikambi yabwe injelekha womwalo kwa Arinoni. Nebutswa shibayenjila mumukunda kwa Abamoabu ta, shichila omwalo kwa Arinoni nikwo okwali olwakho lwa Moabu.

¹⁹Mana Abaisiraeli nibaruma abarume khu Sihoni omuruchi wa Abamori wa Heshiboni. Nibamureeba mbu, abafuchilile babirire mushialoshie nibatsia mushialo shiabwe.

²⁰Nebutswa Sihoni shiyabafuchilila tawe. Kho nakhung'asia abandube boosi ne nakhupa ikambi Yahazi mana naseera Abaisiraeli.

²¹Nebutswa OMWAMI Nyasaye, Nyasaye wabandu ba Isiraeli nara Sihoni nende abandube boosi mumakhono ka Abaisiraeli, nabo nibabahula. Kho Abaisiraeli nibabukula eshialo shia Abamori eshia bali nibamenyamwo shiosi, nashio nishiba eshiabwe.

²²Nibabukula eshialo shia Abamori shiosi okhurula emulambo khumwalo kwa Arinoni okhuula emasaba khumwalo kwa Yaboki, khandi okhurula ebukwe khushitsiimi okhuula khumwalo kwa Yorodani elubeka lwamumbo.

²³Khulweshio OMWAMI Nyasaye, yali Nyasaye wabandu ba Isiraeli owarusia Abamori imbeli wabandube ba Isiraeli.

²⁴Kho wenya okhushibukula khandi? Iwe wibiishile shiosi shiosi eshia Chemoshi omunyasayewo yakhuhelesia. Nebutswa ifwe khulebiishila biosi ebia OMWAMI Nyasaye wefwe yakhuhelesia.

²⁵Opara mbu, iwe oshila Balaki omusiani wa Zipori owali omuruchi wa Moabu? Walolakhwo naseeranga Abaisiraeli? Noho kata okhuteema okhulwana ninabo?

²⁶Khulwa emiyika ebikhumi bitaru Abaisiraeli bakhamenya mushialo shia Heshiboni nende eshia Aroeri, nende mumataala karondokhane khuko, nende mumatookho koosi akali khundulo khwomwalo kwa Arinoni. Nishiina eshichila nolakabukulakhwo mumiyika echio chiosi ta?

²⁷Khulweshio isie shiekhwonooneelekhwo likhuwa tawe. Niwe owonoonanga khulwa okhuunwana isie. OMWAMI Nyasaye niye omukhalachi. Alaahula inyanga yino hakari wa Abaisiraeli nende Abamoni.”

²⁸Nebutswa omuruchi wa Abamoni shiyarechelesia oburume bwa Yefutsa yamurumila tawe.

²⁹Mana Roho owa OMWAMI Nyasaye niyetsa khu Yefutsa. Naye nachenda nabira Giliadi nende Manase, ne nakalushila Mizipa eyili mu Giliadi natsia niyoola Amoni.

³⁰Mana Yefutsa niyetsubila OMWAMI Nyasaye naboola ari, “Noba nora Abamoni mumakhono kanje,

³¹kho omundu yesi yesi okhurula munzu wanje niyetsa, oularanjilila okhunzakaanila ndalamuhaana khwiwe shinga omusango omusambe.”

³²Kho Yefutsa niyambukha omwalo natsia okhulwana Abamoni, mana OMWAMI Nyasaye nabahaana mumakhonoke.

³³Naye nabeera boosi okhurula Aroeri okhuula ahambi nende Miritsi, amatookho amakhumi kabili, khandi natsia okhuula Abeli-Karamimu. Abandu abanji muno basinzwa nibeerwa. Kho Abamoni nibahulwa nende Abaisiraeli.

³⁴Mana Yefutsa nakalukha nangowe Mizipa, naye omukhaanawe narula niyetsa okhumwakaanila nashinanga khandi nakhupa tsisukuti. Niye owali omwanawe yenyene, shiyalikhwo nomwana undi omusiani kata omukhaana tawe.

³⁵Olwa Yefutsa yamulola, yarandula tsingubotsie mushibeela naboola ari, “Iwe omukhaana wanje! Usinyisiye omwoyo kwanje muno! Mbushiina okhuula abe iwe oundeerera amasila kano? Nditsubiile OMWAMI Nyasaye, ne shienyala okhukalukhasia eshitsubo eshio tawe.”

³⁶Mana omukhaana oyo namukalusia ari, “Papa, Noba niwitsubiile OMWAMI Nyasaye, khola shiolachile okhukhola, shichila OMWAMI Nyasaye akhumaliile eshikwoli khubasukubo ba Abamoni.”

³⁷Nebutswa yareeba samwana ari, “Nochama ukholele likhuwa elala lino mbu, undeshe embe sienyene khulwemiesi chibili, enzie nabetsa banje okhutimatiima mubikulu, ndikhuule khulwa okhufwa khwanje neshili omusishila.”

³⁸Mana samwana namuboolela mbu atsie, namuruma ario khulwemiesi chibili. Omukhaana oyo nende abetsabe nibatsia mubikulu ne niyekhuula khulwa okhuba yali natsitsanga okhufwa nashili omusishila.

³⁹Olunyuma lwemiesi chibili, yakalukha khusamwana. Naye samwana namukholela shinga olwa yali niyetsubila OMWAMI Nyasaye. Mana nafwa nashili omushisila. Mana nikuba omwima mu Isiraeli

⁴⁰mbu, abakhaana ba Isiraeli batsitsanga ehale khulwa tsinyanga tsine buli khumuyika khulwa okhwikhuula omukhaana wa Yefutsa Omugileadi.