Read wanga ABAYAASI 12 Bible Online

ABAYAASI 12 - wanga bible

ABAYAASI 12

¹Abandu ba Efuraimu niberechekha khulwa lihe, mana nibambukha omwalo kwa Yorodani nibatsia Zafoni, ne nibareeba Yefutsa bari, “Mbushiina niwambukha injelekha notsia okhuseera Abamoni nolakhuboolelakhwo ta? Khulasambila inzuyo khumurwekwo nomulilo!”

²Nebutswa Yefutsa yabakalusia ari, “Isie nende abandu banje khwali nobusoolo obukhongo nende Abamoni, nasi olwa ndamulanga shimwayetsa okhuuhonia okhurula khubo tawe.

³Kho nasi olwa ndalola mbu shimunyala okhuuhonia okhurula khubo ta, ndara butswa obulamu bwanje mumakhono mana ninyambukha okhuseera Abamoni. Mana OMWAMI Nyasaye nabara mumakhono kanje. Kho nishiina eshichila nenywe nimwitsa okhuuseera bulano?”

⁴Mana Yefutsa nakhung'asia halala abandu ba Giliadi, nibalwana abandu ba Efuraimul. Abandu ba Giliadi nibakhupa abandu ba Efuraimu ne nibabahula. Abandu ba Efuraimu bali nibaboola bari, (“Inywe abandu ba Giliadi abamenya mu Efuraimu nende mu Manase mwelukha butswa okhurula khubandu ba Efuraimu!”)

⁵Mana abandu ba Giliadi nibatiila tsinyambukho tsiomwalo okwa Yorodani kwosi khulwa okhwikalila aba Efuraimu mbu baleshe okhwilukha. Olwa omundu yesi yesi Omuefrahimu yareebanga mbu, bamufuchilile mbu yambushe, ne niyenyanga okhwilukha, abandu ba Giliadi bamureebanga bari, “Iwe oli omundu wa Efuraimu?” Naye omundu oyo nakaana ari, “Tawe,”

⁶kho bamuboolelanga aboole ari, “Shiboletsi,” naye naboola ari, “Siboletsi,” shichila shianyala okhuliboola habwene ta. Habwenaho abandu ba Giliadi abo bamutiila nibamwiria hanyambukho tsia Yorodani. Mutsinyanga etsio abandu ba Efuraimu ebikhumila amakhumi kane nababili berwa.

⁷Yefutsa yali omuyaasi mu Isiraeli khulwemiyika chisasaba. Mana nafwa ne nayabilwa mwitookholie mu Giliadi.

⁸Olunyuma lwa Yefutsa, Ibuzani owokhurula Betselehemu naba omuyaasi mu Isiraeli.

⁹Yali nabaana abasiani amakhumi kataru nende abakhaana amakhumi kataru. Yabakha abaanabe abakhaana abo mubandu abalali abomushiliibwashie ta, khandi nabashila abasianibe abakhaana okhurula mubandu abalali abomushiliibwashie tawe. Ibuzani yali omuyaasi mu Isiraeli khulwemiyika musaafu.

¹⁰Yafwa, ne nayabilwa Betselehemu.

¹¹Olunyuma lwa Ibuzani, Eloni owokhurula Zebuluni naba omuyaasi mu Isiraeli khulwemiyika ekhumi.

¹²Mana nafwa ne nayabilwa Aiyaloni.

¹³Olunyuma lwa Eloni, Abudoni omusiani wa Hileli owokhurula Piratsoni naba omuyaasi mu Isiraeli.

¹⁴Yali nabaanabe abasiani amakhumi kane nabo abetsukhulube bali amakhumi kataru, abachendelanga khutsisishili amakhumi musaafu. Abudoni yali omuyaasi mu Isiraeli khulwemiyika munane.

¹⁵Mana nafwa ne nayabilwa Piratsoni mumukunda kwa Efuraimu, mushialo shiebikulu shia Abameleki.