Read wanga ABAYAASI 13 Bible Online

ABAYAASI 13 - wanga bible

ABAYAASI 13

¹Mana khandi abandu ba Isiraeli nibakhola obwonooni imbeli owa OMWAMI Nyasaye. Mana OMWAMI Nyasaye nabara mumakhono ka Abafilisiti khulwemiyika amakhumi kane.

²Mutsinyanga etsio omundu undi yaliho owalangwa mbu, Manoa owarulanga mwitaala lia Zora. Yali mulala khuboluyia lwa Dani. Omukhasiwe yali omukumba, kho shiyalikhwo nende omwana tawe.

³Mana omumalaika owa OMWAMI Nyasaye naloleshela omukhasi oyo namuboolela ari, “Lola, oli omukumba, ne shiolikhwo nomwana ta, nebutswa olahela inda, ne olebula omwana omusiani.

⁴Khulweshio wilinde oleshe okhunywakhwo idivai kata amalwa ta, kata shiolaliakhwo eshindu shiosi shiosi eshiomusilo tawe.

⁵Olunyuma lwokhwibula omwana oyo, shiolamubekakhwo liswilie ta, shichila okhurula khunyanga yokhwibulwakhwe, alaba omunaziri owaahulwa khulwa Nyasaye. Ne niye oulachaaka okhuhonia Abaisiraeli okhurula mumakhono ka Abafilisiti.”

⁶Mana omukhasi oyo natsia naboolela omusaatsawe ari, “Omundu wa Nyasaye yanzitsiile, ne mumonimwe mufwanile shinga omwa omumalaika wa Nyasaye. Shiemureebilekhwo ewa arulile ta, naye shiyambooleele eliiralie tawe.

⁷Habula yambooleele mbu enzia okhuhela inda, ne ndalebula omwana omusiani. Yangayile mbu shindalanywakhwo idivai noho amalwa kata okhuliakhwo eshiokhulia shiosi eshiomusilo tawe; Shichila omwana oyo alaba omunaziri owahulwa khulwa Nyasaye okhurula khunyangaye yokhwibulwa okhuula okhufwa.”

⁸Mana Manoa nasaaya khu OMWAMI Nyasaye naboola ari, “Iwe OMWAMI Nyasaye, ekhusaaya nochama oleshe omundu wa Nyasaye owa okhurumiile akalushe akhwechesie aka khukhoyile okhukholela omwana witsa okhwibulwa oyo.”

⁹Mana Nyasaye nahulila amasaayo ka Manoa, kho omumalaika wa Nyasaye oyo nakalukha khumukhasi oyo niyekhaale mumukunda, nebutswa Manoa omusaatsawe shiyali naliho ninaye tawe.

¹⁰Kho omukhasi oyo natsia tsimbilo ewa omusaatsawe yali namuboolela ari, “Lola! Omusaatsa wanzitsila olundi lulia undolesheele khandi.”

¹¹Manoa nasinjila nalonda khumukhasiwe. Mana natsia ewa omusaatsa oyo yali namureeba ari, “Niwe omundu owaboolile nomukhasi uno?” Naye namukalusia ari, “Nisie.”

¹²Mana Manoa namureeba ari, “Kho olwa amakhuwa kawaboola kalaba nikekholile omwana oyo okhuula akhusibwe arie? Naye alikhola shiina?”

¹³Mana omumalaika owa OMWAMI Nyasaye oyo namukalusia ari, “Omukhasiwo okhuula yerecheshe okhukhola koosi aka ndalamuboolela.

¹⁴Shialaliakhwo eshindu shiosi shiosi eshiokhumutsabibu tawe, shialanywakhwo idivai, noho amalwa, kata okhuliakhwo eshiokhulia shiosi shiosi eshiomusilo tawe. Okhuula akhole koosi akemulachilisiye okhukhola.”

¹⁵Manoa naboolela omumalaika owa OMWAMI Nyasaye oyo ari, “Nochama olatsia tawe; Lekha khukhuteeshele eshimeeme shieimbusi.”

¹⁶Ne omumalaika oyo nakalusia Manoa ari, “Kata nelatsia ta, shindalaliakhwo ebiokhuliabio tawe. Nebutswa noba niwenya okhushikaasia, oshisambe shinga omusango omusambe okukholeelwe OMWAMI Nyasaye.” (Manoa shiyamanya mbu oyo yali omumalaika owa OMWAMI Nyasaye tawe).

¹⁷Manoa namureeba ari, “Khuboolele eliiralio kho mbu olwa amakhuwako ketsa okhwikholekha khukhuhelesie oluyali.”

¹⁸Omumalaika oyo namukalusia ari, “Mbushiina wenyanga okhumanya eliira lianje? Eliira lianje neliokhuchenyia.”

¹⁹Kho Manoa nabukula eshimeeme shieimbusi nende imele, ne nabihaanila OMWAMI Nyasaye khulwanda, namuhaanila Nyasaye oukholanga akokhuchenya.

²⁰Ne olwa tsimemu tsiomulilo tsiakulushila mwikulu okhurula khushimalilo shiemisango eshio, omumalaika owa OMWAMI Nyasaye oyo yakulushila mutsimemu tsiomulilo etsio, natsia mwikulu, Manoa nomukhasiwe nibamureerekhwo tsimoni. Mana nibenamia obweni bwabwe okhuula hasi khwiloba.

²¹Omumalaika owa OMWAMI Nyasaye oyo shiyaloleshelakhwo Manoa nende omukhasiwe khandi tawe. Mana Manoa namanya mbu oyo abeele omumalaika owa OMWAMI Nyasaye.

²²Mana Manoa naboolela omukhasiwe ari, “Toto bwene khutsia okhufwa, shichila khuluutsi Nyasaye.”

²³Nebutswa omukhasiwe yamukalusia ari, “OMWAMI Nyasaye naba mbu yenyile okhukhwiira, shiyakhafuchiliile omusango kwefwe omusambe kata ebihaanwa biefwe ebieimele tawe; Kata shiyakhakhumanyiiye amakhuwa kano koosi kata okhukhuboolela amakhuwa shinga kano mubise bino tawe.”

²⁴Mana omukhasi oyo niyebula omwana omusiani, ne namukulikha eliira mbu, Samusoni. Omwana oyo nakhula naye OMWAMI Nyasaye namuhelesia tsikhabi.

²⁵Mana Roho owa OMWAMI Nyasaye nachaaka okhumuhelesia amaani olwa yali nali mukambi ya Sani hakari wa Zora nende Eshitaoli.