Read wanga ABAYAASI 14 Bible Online

ABAYAASI 14 - wanga bible

ABAYAASI 14

¹Inyanga yindi Samusoni yakholomokha natsia Timuna, ne nali ebweneyo yalolayo omukhaana Omufilisiti.

²Mana nakalukha ingo naboolela samwana nende nyinamwana ari, “Ndaluutsi omukhaana omufilisiti Timuna, bulano ndenyanga mundeerere abe omukhasi wanje.”

³Nebutswa samwana nende nyinamwana bamuboolela bari, “Eshichila otsie mubandu abasinde Abafilisiti okhukhaaba omukhasi nishiina? Shiokhaaba omukhaana okhurula muluyia lwefwe, olwa abandu befwe ta?” Nebutswa Samusoni yaboolela samwana ari, “Oyo niye owandenya mundeerere, okhuba yanjamisiiye.

⁴Abebusibe shibamanyanga mbu OMWAMI Nyasaye niye owali niyemiliile Samusoni mwikhuwa lino tawe, okhuba OMWAMI Nyasaye yali nakhaabanga obwiyangu bwokhulwana Abafilisiti. Mutsinyanga etsio, Abafilisiti bali nibarukanga Isiraeli.”

⁵Mana Samusoni nakholomokha natsia Timuna nali nende samwana nende nyinamwana. Olwa bali nibashibiranga mumikunda chiemitsabibu, ne italanyi imbuukha niyimuholelakhwo.

⁶Ne bwangu Roho owa OMWAMI Nyasaye nameeta Samusoni amaani, ne narandula italanyi eyo mubitonye bibili namakhonoke shinga ourandula eshimeeme shieimbusi. Ne shiyaboolelakhwo abebusibe aka yali nakholile ako tawe.

⁷Mana natsia naboola nende omukhaana oyo, naye Samusoni namuchama.

⁸Olunyuma lwetsinyanga tsindiiti Samusoni yakalukhayo okhumwenda; Nashili khunjila yakobelakhwo okhulola italanyi eya yali niyerire eyo. Ne nalola tsinzushi nende obuushi nibili mu mubili kweitalanyi eyo.

⁹Kho nabukula obuushi obwo mumukhonokwe, ne nabulia nachenda. Mana niyoola ewa samwana nende nyinamwana bali, nabahelesiakhwo obuushi obwo; Nabo nibabulia, nebutswa Samusoni shiyababoolela mbu aburusiye mumubili kweitalanyi yifwile tawe.

¹⁰Mana samwana Samusoni natsia ewabo omukhaana oyo. Naye Samusoni nakholayo lisabo. Kuno nikwo omulukha kwabasiani abaraaka bakholanga.

¹¹Olwa Abafilisiti balola Samusoni bamureerera abaraaka amakhumi kataru mbu babuutse ninaye.

¹²Kho Samusoni nababoolela ari, “Bulano ndenya okhumukhupila omunehe, nimuba nimunyala okhukubuula tsinyanga musaafu tsielisabo nitsishili okhuhwa, kho ndalamuhelesia tsingubo tsieikitani amakhumi kataru, nende tsingubo tsindi tsindayi amakhumi kataru.

¹³Nebutswa nimuba nimulanyala okhubuula ta, kho inywe mulambelesia tsingubo tsieikitani amakhumi kataru nende etsindi tsindayi amakhumi kataru.” Nabo nibamukalusia bari, “Boola omunehekwo khukuhulile.”

¹⁴Samusoni naboola ari, “Eshiokhulia shiarula mu eshilitsanga, eshimilamilu shiarula mu eshiamaani.” Ne khulwetsinyanga tsitaru bali nibashikhayilwe okhubuula omunehe okwo.

¹⁵Khunyanga yakhane, abaraaka abo nibaboolela omukhasi wa Samusoni bari, “Okatilisie omusaatsa akhubuulile omunehe, nebutswa nolakhola orio ta, khulakhusamba iwe nende abomunzu wenywe nomulilo. Inywe mukhulanjile hano kho mbu mukhunuule ebia khuli ninabio!”

¹⁶Kho omukhasi wa Samusoni natsia imbeliwe nalilanga naboola ari, “Iwe shiwayaheela ta, waasila butswa, okhupiile abandu banje omunehe, ne shiumbuulile tawe.” Naye Samusoni namukalusia ari, “Lola, eshili kata okhuboolelakhwo papa kata mama wanje ta, kho eshichila ekhuboolele iwe nishiina?”

¹⁷Omukhasiwe oyo natsiililila okhulila khulwetsinyanga musaafu tsielisabo etsio tsiosi. Nebutswa khunyanga yamusafu Samusoni namubuulila eshisina shiomunehe okwo, shichila yali namuhachiye muno. Naye omukhasi oyo natsia naboolela Abafilisiti.

¹⁸Kho khunyanga yamusafu, Samusoni nashili okhutsia munzu yokhwiyalisia[2], abandu belitookho bamuboolela bari, “Eshimilamilu okhushila obuushi nishiina? Ne eshiamaani okhushila italanyi nishiina?” Naye Samusoni nabakalusia ari, “Likalusio lienywe elo okhuula libe nilirulile khumukhasi wanje.”

¹⁹Ne bwangu Roho owa OMWAMI Nyasaye namukhola owamaani, mana nakholomokha natsia Ashikeloni, niyeerayo abandu amakhumi kataru, nibayaaya, ne nabukula tsingubo tsiabwe tsindayi nahelesia abandu bali nibabuulile omunehekwe okwo. Olunyuma lwako yakalukha ingo wabwe natililwe oburuma khu akali nikekholeshe.

²⁰Mana omukhasi wa Samusoni oyo nabashilwa omusaatsa undi, owali eshibakhwa shia Samusoni mushiselelo.