Read wanga ABAYAASI 15 Bible Online

ABAYAASI 15 - wanga bible

ABAYAASI 15

¹Mana olunyumakhwo, mutsinyanga tsiokhuchesa ingano, Samusoni yatsia okhucheniha omukhasiwe, namuyilila eshimeeme sheimbusi. Mana naboolela samwana omukhasiwe ari, “Ndenya okhutsia mushisika shiomukhasi wanje.” Nebutswa samwana omukhasiwe oyo, shiyamufuchilila tawe.

²Mana samwana omukhasiwe namuboolela ari, “Isie ndapaarirenje mbu, toto mwene wamusila, kho ndamubashiile omusaatsa undi. Nebutswa omukhaana wabwe omushe owelikondo lilayi okhumushila ali hano, onyala okhubukula omweneyo.”

³Mana Samusoni naboola ari, “Luno ndalabula eshikha khu amabi aka enzia okhukholela Abafilisiti!”

⁴Kho natsia nahamba amabwe ebikhumi bitaru, nakashiukhasia omushila khumushila ne nabukula ebitseso biomulilo nabira hakari wabuli emishila chibili.

⁵Ne olwa yali namalile okhuhafia omulilo khubichetseso ebio, yalekhula amabwe ako okhutsia mumele eyali niyishisinjiile mumikunda chia Abafilisiti. Munjila yino nolwa yasamba ebiaywa biene, neimele yali niyishisinjiile, nibiyia halala nemikunda chiemitsabibu.

⁶Olwa Abafilisiti bareeba owali nakholile amakhuwa ako, baboolelwa mbu abeele Samusoni naye akholile ario khulwa okhubela nyakhufialanyene, omusaatsa okhurula Timuna yabukula omukhasi wa Samusoni nabashila omwitsa wa Samusoni. Kho Abafilisiti nibatsia nibasamba omukhasi oyo nafwa, khandi nibasamba inzu yasamwana omukhasi oyo.

⁷Samusoni nababoolela ari, “Nikaba mbu nolwa mukholanga nditsuba mbu ndalamalila eshikwoli khwinywe kho enzie.”

⁸Mana nabaseera obululu, niyera abanji khubo; ne natsia namenya mumbinga yolwanda lwa Etamu.

⁹Mana Abafilisiti nibatikulukha nibakhupa ikambi mu Yuda, ne nibaseera litaala lia Lehi.

¹⁰Abandu ba Yuda nibabareeba bari, “Eshichila nimukhuseera nishiina?” Nabo Abafilisiti nibabakalusia bari, “Khwitsile okhuhamba Samusoni khumukhole shinga olwa naye yakhukholela.”

¹¹Kho abandu ebikhumila bitaru nibakholomokha nibatsia mumbinga yolwanda lwa Etamu ewa Samusoni yali, nibamuboolela bari, “Iwe shiomanyile mbu Abafilisiti nibo abakhurukanga ta? Kho amakhuwa shiina kano, aka okhukholeele?” Naye Samusoni nabakalusia ari, “Isie ebakholeele butswa shinga olwa nabo bayakholeele.”

¹²Abandu ba Yuda abo nibaboolela Samusoni bari, “Khwitsile hano okhukhuboha kho khukhuhaane mumakhono aka Abafilisiti.” Samusoni nababoolela ari, “Munzitsubile mbu, inywe abeene shimulanzira tawe.”

¹³Nabo nibamukalusia bari, “Nobulayi, ifwe khulakhuboha butswa obutinyu mana khukhuhane mumakhono kabwe, shikhukhwira tawe.” Kho nibamuboha nemikoye chibili emiyia, mana nibamutikulusia okhurula mumbinga tsana eyo.

¹⁴Olwa yoola Lehi, Abafilisiti betsa tsimbilo okhumwakanila nibamuboolangakhwo nomwoyo omukhongo. Mana bwangu Roho owa OMWAMI Nyasaye namukhola okhuba owamaani, nachio emikoye echiali nichimuboyile amakhono nichikwa butswa shinga obuusi obuyiile mumulilo, nabio ebibohelobie nibisialulukha butswa nibirula khumakhonoke.

¹⁵Ne nanyoola eshikumba eshibisi shioluseya lweisishili ifwile, nyiila omukhono nashibukula, niyekhoonyela eshikumba eshio okhwira abandu eshikhumila.

¹⁶Kho Samusoni niyemba naboola ari, “Neshikumba shioluseya lweisishili ndirile abandu eshikhumila; Neshikumba shioluseya shieisishili ebabunjiishe mubituuli.”

¹⁷Olunyuma lwokhwimba orio, yasukuna eshikumba eshio. Habundu bwene aha amakhuwa kano kekholeshela nihalangwa mbu, Ramatsi Lehi.[3]

¹⁸Mana Samusoni nahulila obuloho muno, ne nahabila OMWAMI Nyasaye naboola ari, “Umbelesiye obuhuli obukhongo buno, ne bulano enzia okhufwa khulwa obuloho, kho mana abandu abasinde bano bandiile?”

¹⁹Mana Nyasaye niyekula ikhombe yili mwiloba Lehi, ne amaatsi nikarulamwo. Kho Samusoni nanywa ne amaanike nikakalukha nasitikha. Khulweshio isebele eyo niyilangwa mbu, Eni-hakore. Nayo yishili Lehi okhuula bulano.

²⁰Samusoni yali omuyaasi mu Isiraeli khulwemiyika amakhumi kabili, munyanga tsia Abafilisiti barukanga Isiraeli.