Read wanga ABAYAASI 16 Bible Online

ABAYAASI 16 - wanga bible

ABAYAASI 16

¹Inyanga yindi Samusoni yatsia mwitookho elia Abafilisiti ilia Gaza, nalolayo omutamba ne niyenjila munzuye eshilo.

²Abandu belitookho elo nibamanya mbu Samusoni ali munzu eyo. Kho nibabotokhana habundu yaho, nibamukoneshela eshilo shiosi hashilibwa shielitookho. Baholela eshilo shiosi nibeparila mumioyo bari, “Khulinde okhuula olwa eshialo bushia mana khumwire.”

³Nebutswa Samusoni yakona okhuula mushilo hakari, mana nabuukha, natiila emiliango chieshilibwa shielitookho, nebiyindi biashio bibili nabisiula halala neshiyinjilo shiene; Mana nabichinjila kwibeka okhuula khubutenje bweshikulu shihengane nende Heburoni.

⁴Olunyuma lwa ako, Samusoni yaheela omukhasi undi owalangwa mbu, Delila, owamenyanga mwibanda lia Soreki.

⁵Abaruchi barano ba Abafilisiti nibetsa khumukhasi oyo nibamuboolela bari, “Okatiisie Samusoni akhuboolele ewa amaanike karulanga, khandi shinga khunyala okhumuhamba, khwamuboha mana khwamuhula. Buli mulala khwifwe alakhuhelesia tsifetsa likhumi nende ndala.”

⁶Mana Delila naboolela Samusoni ari, “Nochama mboolelakhwo ewa orusinjia amaaniko amakhongo khandi shinga omundu anyala okhukhuhula mana akhubohe.”

⁷Naye Samusoni namukalusia ari, “Nibamboha netsinzaha musaafu etsiobuyingo, khandi etsishili okhuumibwa, enyala okhuba omuteshele shinga omundu undi yesi.”

⁸Kho abaruchi ba Abafilisiti abo nibareerera Delila tsinzaha musaafu tsiobuyingo etsishili okhuumibwa, naye natsiikhoonyela okhuboha Samusoni.

⁹Ne yali nareere abandu bandi mushisika shiomukari nibalindiliile, kho nalanjilisia obutinyu ari, “Samusoni! Abafilisiti mbabo betsanga.” Naye Samusoni nakhalaka tsinzaha etsio shinga oluusi lukhalikhanga nilurebwa khumulilo. Kho shibamanyakhwo ewa amaanike karulanga tawe.

¹⁰Mana Delila naboolela Samusoni ari, “Lola, umbeeyile, niungatia, nochama mboolelakhwo shinga omundu anyala okhukhuboha.”

¹¹Samusoni namukalusia ari, “Nibamboha nemikoye emiyia echishili okhwikhonyelwakhwo ndalaba omuteshele shinga omundu undi yesi.”

¹²Kho Delila nabukula emikoye emiyia namuboyela. Mana nalanjilisia obutinyu ari, “Samusoni! Abafilisiti mbabo betsanga.” Abasaatsa abo bali nibalindiliile mushisika shiomukari. Nebutswa Samusoni yakhalaka tsinzaha etsio shinga obuusi.

¹³Mana Delila naboolela Samusoni ari, “Oshingatinjia butswa niumbeeya, mboolela shinga omundu anyala okhukhuboha.” Naye Samusoni namukalusia ari, “Noba nolukha ebikolo musaafu bieliswi lianje mungubo eyilukhungwa, mana obitinyie noluchela, ndalaba omuteshele shinga omundu undi yesi.”

¹⁴Kho Delila namuhombelesia nakona tsindoolo ne nalukha ebikolo musaafu bieliswi lia Samusoni mungubo eyilukhungwa mana nalitinyia noluchela, ne nalanga nomwoyo omukhongo ari, “Samusoni, Abafilisiti mbabo betsanga.” Nabutswa Samusoni yabuuka mundoolo, nakhwesa liswilie okhurula mungubo eyo nende muluchela olwo.

¹⁵Kho Delila namuboolela ari, “Oboolanga orie mbu, ‘Ndakhuheela’ lwomwoyokwo kulali ninasi ta? Ungatiyie butswa okhuula khataru, ne oshili okhumboolela ewa amaaniko karulanga.”

¹⁶Mana Delila natsiililila okhumureeba obushia nobushia, Samusoni nachonya muno mumwoyokwe,

¹⁷olunyuma namala namuboolela obwatieri, ari, “Omurwe kwanje kushili okhubekwakhwo, okhuba endi omunaziri owaahulilwa Nyasaye okhurula khukhwibulwa khwanje. Kho liswi lianje niliba nilibekwa, ndalaba omuteshele butswa shinga abandu bandi boosi.”

¹⁸Olwa Delila yalola mbu Samusoni amubooleele obwatieri, yarumana oburume khu Abafilisiti nababoolela ari, “Kalushe khandi okhuba yambooleele obwatieri.” Abaruchi ba Abafilisiti abo nibakalukha khandi, nibetsa namapesa.

¹⁹Mana Delila nahombelesia Samusoni nakona tsindoolo khumakuluke, ne nalanga omusaatsa undi okhubeka ebikolo musaafu bieliswilie. Mana Delila nachaaka okhumunyasia, ne amaani ka Samusoni nikahwa.

²⁰Kho Delila nalanga nomwoyo omukhongo ari, “Samusoni! Abafilisiti mbabo betsanga.” Naye Samusoni nasisimukha mundoolo napaara ari, “Ndalarula shinga olwa ekholanga buli lwosi mana enzie.” Habula shiyamanyanga mbu OMWAMI Nyasaye yali namuleshile tawe.

²¹Mana Abafilisiti nibamutiila nibamurusia tsimoni. Nibamuyila Gaza nibamuboha neminyololo chiomukasa. Nibamura khumilimo chiokhusia khuluchina mumbohe.

²²Nebutswa liswilie nilichaaka okhumela khandi.

²³Mana abaruchi ba Abafilisiti abo nibakhung'ana khulwa okhukholela Dagoni omunyasaye wabwe omusango omukhongo, nende khulwa okhwikhoya shichila bemba nibaboola bari, “Omunyasaye wefwe akhunyaliile okhuhula Samusoni omusuku wefwe.”

²⁴Ne olwa abandu bamulola, betsoomia omunyasaye wabwe nibaboola bari, “Omunyasaye wefwe Dagoni akhunyaliile okhuhula omusuku wefwe, oumululanga eshialo shiefwe khandi owera abandu befwe abanji.”

²⁵Mana olwa bali nibatsaatsahale mumioyo baboola bari, “Lanje Samusoni, mbu yetse akhukholele emibayo.” Kho nibalanga Samusoni okhurula mumbohe, niyetsa nabakholela emibayo imbeli wabwe, nibamusinjisia hakari kari lelisisi lietsisilo.

²⁶Mana Samusoni naboolela omusiani wali namutiilile omukhono ari, “Lekha endiilekhwo khutsisilo tsitiilanga inzu yino. Enzenyanga okhwisetemiakhwo.”

²⁷Ne inzu eyo yali niyitsulemwo abasaatsa nabakhasi; nende abaruchi ba Abafilisiti boosi barano, ne abandu ebikhumila bitaru, abasaatsa nabakhasi bali khushilama shieinzu eyo nibahenganga Samusoni nakholanga emibayo.

²⁸Mana Samusoni nasaaya naboola ari, “OMWAMI Nyasaye ekhusaaya mbu unzitsulile; Nyasaye nochama umetekhwo amaani lulala luno lwonyene, kho mbu emale eshikwoli khu Abafilisiti khulwa okhurusia tsimoni tsianje tsibili.”

²⁹Kho Samusoni natiila tsisilo tsibili etsia hakari kari etsiatiilanga inzu eyo. Mana niyesetamiakhwo natiila omukhonokwe omusaatsa khusilo ndala nakwo omukhasi khuyindi, ne natsiluuma

³⁰nalanjilisinjia nomwoyo omukhongo ari, “Lekha efwile halala nende Abafilisiti!” Mana naluuma namaanike koosi, ne inzu eyo niyikwila abaruchi barano ba Abafilisiti nende omundu undi yesi owali nalimwo. Kho abandu ba Samusoni yeera khukhufwakhwe bali abanji okhushila abo abayeera nashili mwoyo.

³¹Mana abasiani babwe nende abomunzu mwabwe boosi nibakholomokha okhubukula omubilikwe. Bamubukula nibatsia nibamuyabila hakari wa Zora nende Eshitaoli, mushiembekho shia Manoa olwali samwana. Samusoni yali omuyaasi mu Isiraeli khulwemiyika amakhumi kabili.