Read wanga ABAYAASI 17 Bible Online

ABAYAASI 17 - wanga bible

ABAYAASI 17

¹Omusaatsa undi yaliho, owamenyanga mushialo shiebikulu shia Efuraimu, owalangwa mbu Mika.

²Yaboolela nyinamwana ari, “Olwa omundu yakhwibila yoifetsa ebitonye eshikhumila nende eshikhumi, walaamila omwifi oyo eshilaamo shiobubi. Ndahulila nomulaamanga, lola ifetsa eyo endi ninayo, nisie owatsibukula.” Naye ninamwana naboola ari, “OMWAMI Nyasaye alaamila omwana wanje tsikhabi.”

³Mana Mika nakalusilia nyinamwana amapesa ako, naye nyina namuboolela ari, “Khulwa okhurusiaho eshilaamo eshio shileshe okhukhutiila isie omwene enzahulila OMWAMI Nyasaye ifetsa eyo. Olatsiikhoonyela okhukaasia eshifwanani eshibaatse nende eshifwanani eshisialule. Khulweshio enzia okhukhukalusilia tsifetsa etsio.”

⁴Kho olwa Mika yakalusilia nyinamwana amapesa ako, nyinamwana yabukula ifetsa ebitonye ebikhumi bibili nahelesia omwiranyi weifetsa, naye nachikasiakhwo eshifwanani eshibaatse nende eshisalule. Eshifwanani eshio nishiba munzu mwa Mika.

⁵Omundu mbu Mika uno, yali neinzuye eyokhwinamilamwo. Mana nakaasia ebifwanani nende ifoti naramwo; khandi niyahula mulala khubasianibe namukhola okhuba omwisaaliisiwe.

⁶Mutsinyanga etsio omuruchi shiyaliho mu Isiraeli tawe, kho buli mundu yakholanga shinga olwa achamile.

⁷Mutsinyanga etsio yaliho omuraaka undi Omulawi owamenyanga mwitookho lia Betselehemu mu Yuda.

⁸Omuraaka oyo yarula Betselehemu natsia okhukhaaba habundu undi ahokhumenya. Olwa yali nachendanga yoola khunzu ya Mika eyali mushialo shiebikulu shia Efuraimu.

⁹Mana Mika namureeba ari, “Orulanga heena?” Naye omuraaka oyo nakalusia ari, “Esie endi Omulawi okhurula mwitookho lia Betselehemu mu Yuda. Ekhabanga habundu ahokhumenya.”

¹⁰Mana Mika namuboolela ari, “Menyakhwo ninasi, unjelelenje amakhuwa khandi obe omwisaaliisi wanje, nasi enzia okhukhuhelesinjia ebitonye ifetsa ekhumi buli khumuyika, tsingubo tiokhwifwala buli khumuyika, tsingubo tsiokhufwala nende eshiokhulia.”

¹¹Omuraaka Omulawi oyo nafuchilila okhumenya nende Mika, ne namenyaho shinga mulala khubasiani ba Mika.

¹²Mana Mika namwahula okhuba omwisaaliisi, naye omuraaka oyo namenya mungo mwa Mika.

¹³Mana Mika naboola ari, “Bulano emanyile mbu OMWAMI Nyasaye alakholela amakhuwa amalayi shichila endi nende Omulawi shinga omwisaaliisi wanje.”