Read wanga ABAYAASI 18 Bible Online

ABAYAASI 18 - wanga bible

ABAYAASI 18

¹Mutsinyanga etsio omuruchi shiyaliho mu Isiraeli tawe. Ne mutsinyanga tsiene etsio aboluyia lwa Dani bali nibakhabanga omukunda kwokhubukula mbu bamenyemwo, shichila bali nibashili okhwinyolelakhwo omukunda kwabwe abeene mubetsimbia tsia Isiraeli.

²Kho aboluyia lwa Dani nibaahula abasaatsa abachesi barano okhurula mubeinzu ya Zora nende eya Eshitaoli okhutsia okhulambuula eshialo, kho nibaboolela abasaatsa abo bari, “Tsie mulambuule eshialo eshio.” Mana abasaatsa abo nibatsia niboola khushialo shiebikulu shia Efuraimu, ne nibamenya munzu ya Mika.

³Olwa bali nibamenyile munzu mwa Mika bamanyilisia okhuboola khwomuraaka oyo, kho nibatsia nibamureeba bari, “Niwiina owakhureera hano? Ne okholanga shiina hano? Nimakhuwa shiina akakhureera hano?”

⁴Naye nabakalusia ari, “Ndafuchilisania nende Mika ourunganga khulwa okhumukhalabanila shinga omwisaaliisiwe.”

⁵Abasaatsa abo nibaboolela omuraaka oyo bari, “Khukhusaya nochama okhureebele khu Nyasaye mbu khumanye nikali mbu oluchendo lwakasinjia luno lulaba olulayi.”

⁶Mana omwisaaliisi oyo nabakalusia ari, “Tsie nomulembe, OMWAMI Nyasaye alamwimilila khuluchendo lwenywe luno.”

⁷Kho abasaatsa barano abo nibasumukha nibatsia khwitaala lia Laishi. Ne nibalola shinga abandu bebweneyo bamenyanga obulayi shinga Abasidoni. Bali abandu abaholelefu, abomulembe khandi abalaranganangakhwo nomundu tawe; Bali nende buli shiashindu shiabakhenya. Bali nibamenyela ehale okhurula khu Abasidonia khandi shibalikhwo namakhuwa nabandu bandi tawe.

⁸Olwa abasaatsa barano abo bakalukha Zora nende Eshitaoli, aboluyia lwabwe babareeba bari, “Kafwanayo karie?”

⁹Nabo nibababoolela bari, “Rule khutsie khuseere litaala lia Laishi. Khulutsi eshialo eshio, nashio neshilayi muno. Mulamenya hano nimubula eshia mukholanga tawe. Tsie bwangu mwinjile mushialo eshio mana mushibukule.

¹⁰Olwa mwinjila mushialo eshio mulanyoola abandu abamenya shisale. Eshialo eshio neshikali khandi shili nende buli shiashindu shiomundu yakhekomba. Nyasaye amuhelesiye eshialo eshio.”

¹¹Kho abasaatsa ebikhumi bisasaba okhurula muboluyia lwa Dani barula Zora nende Eshitaoli niberechekha okhulwana.

¹²Mana nibatikulukha nibakhupa ikambi elubeka lwomumbo lwa Kiriatsi Yaarimu mu Yuda. Niko akachilanga okhuula olwa leelo habundu yaho hashilangungwa mbu, ikambi ya Dani.

¹³Mana nibatsiililila okhurula habweneyaho niboola khunzu ya Mika eyali mushialo shiebikulu shia Efuraimu.

¹⁴Mana abasaatsa barano abo, abali nibalambuula eshialo shia Laishi nibaboolela abashiabwe bari, “Mumanyilekhwo mbu ndala khutsinzu tsino yalimwo eshifwanani eshibaatse eshiafunikhwa neifetsa? Khandi bilimwo ebifwanani bia Nyasaye nende ifoti? Khulweshio mupaara mbu khukhole shiina?”

¹⁵Kho abasaatsa abo nibenjila munzu omwa Omulawi omuraaka oyo yali niyamenya, nibamureeba shinga olwa atsiilililanga.

¹⁶Nabo abasaatsa ebikhumi bisasaba belihe okhurula muboluyia lwa Dani, nibemanule nebimanulwa biabwe biokhulwana basinjila hashiliibwa.

¹⁷Nabo abasaatsa barano abokhulambuula abo nibatsia shilunji munzu nibabukula eshifwanani eshibaatse eshiafunikhwa neifetsa, nebifwanani bindi nende ifoti, naye omwisaaliisi nasinjiile hashiliibwa nabasaatsa bali nibemanule nebimanulwa bielihe abo.

¹⁸Olwa abasaatsa abo benjila munzu ya Mika nibabukula ebifwanani ebio, omwisaaliisi oyo yabareeba ari, “Mukholanga shiina?”

¹⁹Nabo nibamukalusia bari, “Holeela tsi, olaboolakhwo eshindu shiosi tawe. Olondane ninefwe mana obe omwisaaliisi wefwe khandi owokhukhuchelelanga. Elishila elindi khukano nelilena? Okhuba omwisaaliisi womundu mulala noho okhuba omwisaaliisi woluyia lwosi olwabandu ba Isiraeli?”

²⁰Kano kasangasia omwisaaliisi oyo, kho nabukula ebifwanani ne natsia nabandu abo.

²¹Mana nibashiukhana nibachaaka okhutsia nibemisiye imbeli abaana babwe, tsing'ombe tsiabwe nende emiandu chiabwe.

²²Olwa bali nibakhatsiakhwo oluchendo olurambi okhurula khunzu ya Mika yalanga abamenyanibe khulwa okhutsia okhulwana. Mana nibarula nibalondachila aboluyia lwa Dani,

²³nibabalanjilisia. Aboluyia lwa Dani nibashiukhana nibareeba Mika bari, “Eshibi nishiina? Eshichila nokhulondachila nomukanda omukhongo kuno nishiina?”

²⁴Naye Mika nabakalusia ari, “Eshichila nimureeba mbu ‘Eshibi nishiina’ nishina? Ne mubukuule ebifwanani bianje bia Nyasaye, ebia isie omwene ndakaasia, nende omwisaaliisi wanje. Eshia esikale ninashio nishiina?”

²⁵Aboluyia lwa Dani nibamuboolela bari, “Olayingana ninefwe tawe, shichila abandu befwe abeliruma lia bwangu balakhuseera. Mana iwe nende abandu beinzuyo balafwa.”

²⁶Ne nibatsiililila okhutsia. Naye Mika nalola mbu nabamaani okhumushila, kho nashiukhana nakalukha ingowe.

²⁷Kho nibabukula ebimdu bia Mika yali niyakaasia, nende omwisaaliisiwe ne nibatsia Laishi, khubandu bomulembe khandi abaholelefu. Nibabaseera netsinganga nende okhusamba litookho liabwe liosi.

²⁸Omundu shiyaliho owokhubahonia ta shichila bali nibamenya ehale nende Sidoni, khandi shibalikhwo nobwikho nabandu bandi tawe. Litookho elo liali mwibanda ahambi nende Betsirehobu. Kho aboluyia lwa Dani nibambukha litookho elo khandi mana nibamenyayo.

²⁹Mana nibakalukhasia eliira lielitookho elo okhurula khu Laishi nibalilanga mbu Dani, eliali eliira lia Dani kuuka wabwe, owali omusiani wa Yakobo.

³⁰Ne aboluyia lwa Dani nibesimishila abeene ebifwanani biokhwinamila ebio. Naye Yonatsani omusiani wa Gerishomu omwitsukhulu wa Musa nende abolwibulolwe nibakhalabanila abandu abo shinga abesaaliisi babwe okhuula olwa abandu abo batiilwa nibayilwa mushialo shiobubohe.

³¹Mana ebifwanani bia Mika ebio nibitsiililila okhuba mushialo eshio khulwa oluhoono lwaliheema lia Nyasaye liatsiililila okhuba Shilo.